ລາວ-ໄທເພີ່ມທະວີການຮ່ວມມືຮັກສາຄວາມສະຫງົບຕາມຊາຍແດນ
ກອງປະຊຸມຄະນະກຳມະການຮ່ວມມືຮັກສາຄວາມສະຫງົບຮຽບຮ້ອຍຕາມຊາຍແດນລະຫວ່າງລາວ-ໄທຄັ້ງທີ 24 ໄດ້ສໍາເລັດລົງເມື່ອທ້າຍອາທິດຜ່ານມານີ້, ທີ່ນະຄອນຫລວງວຽງຈັນ, ໂດຍການເປັນປະທານຮ່ວມລະຫວ່າງທ່ານພົນໂທ ຈັນສະໝອນ ຈັນຍາລາດ ລັດຖະມົນຕີກະຊວງປ້ອງກັນປະເທດລາວ ແລະ ທ່ານພົນເອກ ປຣະວິດ ວົງສຸວັນ ຮອງນາຍົກລັດຖະມົນຕີ, ລັດຖະມົນຕີກະຊວງກະລາໂຫມແຫ່ງຣາຊະອານາຈັກໄທ,ພ້ອມດ້ວຍເຈົ້າໜ້າທີ່ກ່ຽວຂ້ອງສອງຝ່າຍເຂົ້າຮ່ວມ.
ກອງປະຊຸມຄັ້ງນີ້, ສອງຝ່າຍໄດ້ຕີລາຄາຜົນການຈັດຕັ້ງປະຕິບັດບົດບັນທຶກກອງປະຊຸມຂອງຄະນະກຳມະການດັ່ງກ່າວໃນຄັ້ງທີ 23 ທີ່ບາງກອກຣາຊະອານາຈັກໄທ, ເຊິ່ງເຫັນວ່າການຮ່ວມມືສອງຝ່າຍມີຄວາມກ້າວໜ້າ ແລະ ເປັນຮູບປະທຳຫລາຍຂຶ້ນ, ອັນໄດ້ເຮັດໃຫ້ສະພາບຕາມແນວບໍລິເວນຊາຍແດນສອງປະເທດມີຄວາມສະຫງົບ ແລະ ເປັນລະບຽບຮຽບຮ້ອຍດີຂຶ້ນເປັນລໍາດັບ, ໂດຍສະເພາະວຽກງານປະສານງານ, ການຮ່ວມມືຮັກສາປ້ອງກັນຕາຝັ່ງເຈື່ອນ, ການແກ້ໄຂການດູດຫີນ-ຊາຍຕາມແມ່ນ້ຳຂອງ ແລະ ແມ່ນ້ຳເຫືອງ, ການຕ້ານການກໍ່ການຮ້າຍສາກົນ, ການຮ່ວມມືໃນຂອບເຂດອາຊຽນ, ການສະກັດກັ້ນການຄ້າຂາຍສັດຜິດກົດໝາຍ ແລະ ອື່ນໆ, ພ້ອມທັງເຫັນດີເພີ່ມທະວີການຮ່ວມມືກັນໃຫ້ຫລາຍຂຶ້ນກວ່າເກົ່າ, ໂດຍສະເພາະນອກຈາກການຮ່ວມມືໃນວຽກງານຮັກສາຄວາມສະຫງົບຕາມຊາຍແດນແລ້ວ, ສອງຝ່າຍຍັງໄດ້ຕົກລົງໃຫ້ມີການແລກປ່ຽນກິດຈະກໍາທາງດ້ານວັດທະນາທໍາ ແລະ ກິລາລະຫວ່າງກອງທັບປະຊາຊົນລາວ ແລະ ກອງທັບຣາຊະອານາຈັກໄທໃນແຕ່ລະປີຕື່ມອີກ, ບົນພື້ນຖານແນໃສ່ເຮັດໃຫ້ຊາຍແດນກາຍເປັນຊາຍແດນແຫ່ງສັນຕິພາບ ແລະ ເສີມຂະຫຍາຍສາຍພົວພັນຮ່ວມມືລະຫວ່າງສອງຊາດ, ສອງກອງທັບສອງປະເທດລາວ-ໄທໃຫ້ແໜ້ນແຟ້ນຍິ່ງຂຶ້ນ.
