ເປີດການແຂ່ງຂັນໝາກເສິກຊີງຂັນ ຮອງປະທານປະເທດ ສປປ ລາວ

ໃນວັນທີ 22 ທັນວານີ້ ທີ່ສະໜາມກິລາລ້ານຊ້າງອິນດໍ ບ້ານໂພນປາເປົ້າ ເມືອງໄຊເສດຖາ ນະຄອນຫລວງວຽງຈັນ ໄດ້ມີພິທີເປີດການແຂ່ງຂັນກິລາໝາກເສິກເພື່ອຊີງຂັນຮອງປະທານປະເທດ ສປປ ລາວ ຂຶ້ນ ໂດຍໃຫ້ກຽດ​ເຂົ້າຮ່ວມຂອງທ່ານ ພັນຄໍາ ວິພາວັນ ຮອງປະທານປະເທດ ສປປ ລາວ, ທ່ານ ຄໍາມະນີ ອິນທິລາດ ລັດຖະມົນຕີກະຊວງພະລັງງານ ແລະ ບໍ່ແຮ່, ທັງເປັນປະທານສະຫະພັນກິລາໝາກເສິກແຫ່ງຊາດລາວ, ມີບັນດານັກກິລາເຂົ້າຮ່ວມຈໍານວນຫລວງຫລາຍ.

ທ່ານປະທານສະຫະພັນກິລາໝາກເສິກແຫ່ງຊາດລາວໄດ້ກ່າວໃນພິທີເປີດວ່າ: ນັບແຕ່ໄດ້ຮັບການສ້າງຕັ້ງຂຶ້ນປີ 2010 ເປັນຕົ້ນມາ ສະຫະພັນໝາກເສິກແຫ່ງຊາດລາວກໍໄດ້ມີການເຄື່ອນໄຫວຕະຫລອດມາ ແຕ່ຍ້ອນກິລາປະເພດນີ້ຍັງເປັນກິລາທີ່ບໍ່ໄດ້ຮັບຄວາມສົນໃຈຫລາຍປານໃດຈາກມວນຊົນ ແຕ່ຍ້ອນຄວາມເອົາໃຈໃສ່ໃກ້ຊິດຕິດແທດຂອງກະຊວງສຶກສາທິການ ແລະ ກິລາ ໂດຍສະເພາະກົມກິລາລະດັບສູງຈຶ່ງໄດ້ນໍາເອົາກິລາປະເພດນີ້ເຂົ້າເຜີຍແຜ່ໃນໂຮງຮຽນຕ່າງໆທົ່ວປະເທດ ພ້ອມທັງຈັດການແຂ່ງຂັນຂຶ້ນເລື້ອຍໆ. ສໍາລັບການແຂ່ງຂັນຊີງຂັນຮອງປະທານປະເທດປະຈໍາປີ 2017 ຄັ້ງນີ້ ນອກຈາກຈະເປັນການສ້າງຂະບວນການຕ້ອນຮັບວັນສໍາຄັນຂອງຊາດແລ້ວຍັງເປັນການຄັດເລືອກເອົານັກກິລາດີເດັ່ນເປັນຕົວແທນເຂົ້າຮ່ວມແຂ່ງຂັນໃນລະດັບພາກພື້ນ ແລະ ສາກົນໃນອະນາຄົດ. ພິເສດແມ່ນກະກຽມຄວາມພ້ອມເຂົ້າຮ່ວມການແຂ່ງຂັນ ລາວໂອເພັນ ທີ່ຈະຈັດຂຶ້ນໃນຕົ້ນເດືອນມັງກອນ 2018 ເຊິ່ງຈະມີບັນດາປະເທດໃນພາກພຶ້ນເຂົ້າຮ່ວມ, ພ້ອມທັງກະກຽມຄວາມພ້ອມໃຫ້ແກ່ນັກກິລາເຂົ້າຮ່ວມແຂ່ງຂັນກິລາແຫ່ງຊາດ 2018 ທີ່ແຂວງຊຽງຂວາງເປັນເຈົ້າພາບ.

ການແຂ່ງຂັນຄັ້ງນີ້ມີ 2 ປະເພດຄື: ບລີຕສ (BLITZ) 3 ນາທີ ແລະ ຮາປິດ 10 ນາທີ ເຊິ່ງປະກອບມີ 8 ລາຍການ; ສໍາລັບການແຂ່ງຂັນແຕ່ລະລາຍການແມ່ນຈະແຂ່ງຂັນແບບສະສົມຄະແນນເພື່ອເຂົ້າຮອບຕໍ່ໄປ.