ລາວຫາລືກ່ຽວກັບວຽກງານການເຕີບໂຕສີຂຽວ
ໃນວັນທີ 21 ທັນວານີ້, ກະຊວງແຜນການ ແລະ ການລົງທຶນຮ່ວມກັບ ສະຖາບັນຄົ້ນຄວ້າເສດຖະກິດແຫ່ງຊາດໄດ້ຈັດສຳມະນາກ່ຽວກັບການສ້າງຄວາມເຂົ້າໃຈ ແລະ ຍົກລະດັບຄວາມຮູ້ກ່ຽວກັບວຽກງານການເຕີບໂຕສີຂຽວ, ໂດຍການເປັນປະທານຂອງທ່ານ ກິແກ້ວ ຈັນທະບູລີ ຮອງລັດຖະມົນຕີກະຊວງແຜນການ ແລະ ການລົງທຶນ, ມີຜູ້ຕາງໜ້າຈາກກະຊວງກ່ຽວຂ້ອງຕ່າງໆເຂົ້າຮ່ວມນໍາດ້ວຍ, ເພື່ອປຶກສາຫາລື ແລະ ແລກປ່ຽນຄຳຄິດເຫັນໃນການເພີ່ມຄວາມເຂົ້າໃຈເລິກເຊິ່ງກ່ຽວກັບແຜນງານສະໜັບສະໜູນຈາກກອງທຶນສິ່ງແວດລ້ອມການກະກຽມຄວາມພ້ອມ ແລະ ກົນໄກໃນການລະດົມທຶນເຂົ້າໃນໂຄງການທີ່ຕິດພັນກັບສິ່ງແວດລ້ອມ, ຮັບຮູ້ເຖິງທ່າແຮງ ແລະ ຂະແໜງການທີ່ເປັນບຸລິມະສິດຂອງການເຕີບໂຕສີຂຽວໃນ ສປປ ລາວ. ທັງນີ້, ກໍເພື່ອສ້າງຄວາມເຂົ້າໃຈ ແລະ ຍົກລະດັບຄວາມຮູ້ກ່ຽວກັບວຽກງານການເຕີບໂຕສີຂຽວ ເຊິ່ງຈະເນັ້ນໃສ່ການສຶກສາແຜນງານກະກຽມຄວາມພ້ອມ ແລະ ກົນໄກໃນການລະດົມທຶນເຂົ້າໃນວຽກງານສີຂຽວ.
ຄຽງຄູ່ກັບການເພີ່ມທະວີກົນໄກປະສານງານລະຫວ່າງຂະແໜງການ, ພາກສ່ວນລັດຖະບານ ແລະ ອົງການຈັດຕັ້ງສາກົນຢູ່ໃນກອບຂອງວຽກງານ ການເຕີບໂຕສີຂຽວ. ພ້ອມດຽວກັນ, ຜູ້ເຂົ້າຮ່ວມຍັງໄດ້ຮັບຟັງການສະເໜີຜົນໄດ້ຮັບຂອງການປະເມີນທ່າແຮງ ແລະ ຄວາມເປັນໄປໄດ້ການເຕີບໂຕສີຂຽວຂອງ ສປປ ລາວ.
ສຳມະນາຄັ້ງນີ້, ທີ່ປຶກສາທາງດ້ານການເງິນຈາກກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ແລະ ສະຖະບັນການເຕີບໂຕສີຂຽວສາກົນໄດ້ນໍາສະເໜີຫົວຂໍ້ກ່ຽວກັບແຜນງານສະໜັບສະໜູນການກະກຽມຄວາມພ້ອມ ໃນການລະດົມທຶນເຂົ້າໃນໂຄງການສິ່ງແວດລ້ອມໃນ ສປປ ລາວ ແລະ ຜົນການປະເມີນຄວາມເປັນໄປໄດ້ການເຕີບໂຕສີຂຽວຂອງ ສປປ ລາວ, ຊຶ່ງເປັນເອກະສານສຳຄັນໃນການເຂົ້າຫາແຫລງທຶນທີ່ເປັນບຸລິມະສິດຂອງເສດຖະກິດລາວ.
