ລາວ-ຫວຽດນາມ ເລັ່ງສົ່ງເສີມການຄ້າສອງຝ່າຍໃຫ້ຫລາຍຂຶ້ນ
ໃນວັນທີ 19 ທັນວານີ້, ກະຊວງອຸດສາຫະກຳ ແລະ ການຄ້າລາວ ແລະ ຫວຽດນາມ, ໄດ້ຮ່ວມປະຊຸມເພື່ອເລັ່ງສົ່ງເສີມການຄ້າສອງຝ່າຍຂຶ້ນທີ່ນະຄອນຫລວງວຽງຈັນ, ໂດຍການເປັນປະທານຮ່ວມຂອງທ່ານ ບຸນມີ ມະນີວົງ ຮອງລັດຖະມົນຕີກະຊວງອຸດສາຫະກຳ ແລະ ການຄ້າລາວ ແລະ ທ່ານ ເຈີນກ໋ວກແຂ່ງ ຮອງລັດຖະມົນຕີກະຊວງອຸດສາຫະກຳ ແລະ ການຄ້າຫວຽດນາມ. ເພື່ອຮ່ວມປືກສາຫາລືການຊຸກຍູ້ສົ່ງເສີມການຮ່ວມມືດ້ານການຄ້າ, ການລົງທຶນລະຫວ່າງສອງປະເທດບັນລຸມູນຄ່າເປົ້າໝາຍວາງໄວ້.
ທ່ານຮອງລັດຖະມົນຕີກະຊວງອຸດສະຫະກໍາ ແລະ ການຄ້າລາວ ກ່າວວ່າ: ໃນໄລຍະຜ່ານມາ, ການຮ່ວມມືດ້ານການຄ້າລະຫວ່າງສອງປະເທດແມນ່ໄດ້ປະຕິບັດຕາມກອບສັນຍາວ່າດ້ວຍການຮ່ວມມືທະວີພາຄີສອງຝ່າຍໄລຍະ 2016-2020 ແລະ ຂໍ້ຕົກລົງວ່າດ້ວຍການຮ່ວມມືລະຫວ່າງລັດຖະບານສອງປະເທດ, ອັນໄດ້ປະກອບສ່ວນເຮັດໃຫ້ການພົວພັນທາງດ້ານເສດຖະກິດ-ການຄ້າສອງຝ່າຍມີບາດກ້າວຂະຫຍາຍຕົວຢ່າງຕັ້ງໜ້າຄື: ລວມມູນຄ່າການຄ້າສອງຝ່າຍໃນປີ 2008 ບັນລຸ 422 ລ້ານໂດລາສະຫະລັດ ແລະ ອີກ 5 ປີຕໍ່ມາຄື: ປີ 2013 ໄດ້ເພີ່ມຂຶ້ນ 1.125 ລ້ານໂດລາສະຫະລັດ, ປີ 2014 ເພີ່ມ ຂຶ້ນເປັນ 1.284 ລ້ານໂດລາສະຫະລັດ ແລະ ໃນປີ 2015 ເຫັນວ່າໄດ້ຫລຸດລົງເລັກໜ້ອຍ 1.220 ລ້ານໂດລາສະຫະລັດ ແລະ ໃນປີ 2016 ໄດ້ສືບຕໍ່ ຫລຸດລົງມາໃນລະດັບ 823 ລ້ານກວ່າໂດລາສະຫະລັດ. ຈາກຕົວເລກດັ່ງກ່າວ ສະແດງໃຫ້ເຫັນວ່າ: ມູນຄ່າການຄ້າສອງຝ່າຍມີການປ່ຽນແປງຂຶ້ນລົງ ແລະ ຍັງບໍ່ສູງເທົ່າທີ່ຄວນ, ເມື່ອທຽບກັບກົນໄກການຮ່ວມມືທີ່ເອື້ອອຳນວຍ ແລະ ທ່າແຮງບົ່ມຊ້ອນຂອງສອງປະເທດ, ທີ່ເຫັນວ່າມີຊາຍແດນຕິດຈອດກັນຫລາຍພັນກິໂລແມັດ ແລະ ມີດ່ານສາກົນ 8 ແຫ່ງ, ດ່ານທ້ອງຖິ່ນ 7 ແຫ່ງ ແລະ ດ່ານປະເພນີ 19 ແຫ່ງ.
ທ່ານຮອງລັດຖະມົນຕີກະຊວງອຸດສະຫະກໍາ ແລະ ການຄ້າຫວຽດນາມ ກ່າວວ່າ: ໃນຕໍ່ໜ້ານີ້, ເພື່ອເຮັດໃຫ້ມູນຄ່າການຄ້າສອງຝ່າຍບັນລຸເປົ້າໝາຍວາງໄວ້ຈະຕ້ອງໄດ້ເພີ່ມລາຍການປະເພດສິນຄ້າສົ່ງອອກ-ນຳເຂົ້າໃຫ້ມີຄວາມຫລາກຫລາຍກວ່າເກົ່າ, ຕິດພັນກັບການລົງທຶນເຂົ້າໃນຂົງເຂດການຜະລິດກະສິກຳ, ອຸດສາຫະກຳປຸງແຕ່ງຢ່າງກວ້າງຂວາງ, ເພື່ອສ້າງຜະລິດຕະພັນທີ່ມີທ່າແຮງໃນການສົ່ງອອກໄປຫວຽດນາມ, ປັບປຸງວິທີການລົງທຶນ ແລະ ການພັດທະນາຂົງເຂດໄຟຟ້ານ້ຳຕົກ, ຂຸດຄົ້ນບໍ່ແຮ່ ແລະ ດ້ານອຸດສາຫະກຳອື່ນໆທີ່ລາວມີທ່າແຮງ, ໄປຄຽງຄູ່ການໝູນໃຊ້ທ່າແຮງຂອງແລວທາງເສດຖະກິດຕາເວັນອອກ-ຕາເວັນຕົກ ແລະ ລະບົບການຂົນສົ່ງທີ່ມີມາດຕະຖານໃນຕໍ່ໜ້າ.
