2 ນັກເຕະລາວເຂົ້າຮ່ວມແຂ່ງຂັນໄທລີກ

ໃນວັນທີ 18 ທັນວານີ້ ທີ່ປະເທດໄທ ໄດ້ມີພິທີເຊັນສັນຍາລະຫວ່າງສະໂມສອນເອັສຣາ ເອັຟຊີ ກັບສະໂມສອນຊົນບູລີ ເອັຟຊີ ແລະ ສະໂມສອນນ່ານ ເອັຟຊີ ເພື່ອເອົາ 2 ນັກເຕະລາວ ທ້າວ ພັດທະນາ ພົມມະເທບ, ທ້າວ ສົມຊາຍ ແກ້ວຫານາມ ຈາກສະໂມສອນໃນລາວ ເຂົ້າຮ່ວມການແຂ່ງຂັນບານ​ເຕະໄທພຣີເມຍລີກ 2018.

ຕາມການໃຫ້ສໍາພາດຂອງທ່ານ ສຸກອາພອນ ວົງຈຽງຄໍາ ຄູຝຶກສະໂມສອນເອັສຣາ ເອັຟຊີ ວ່າ: ພາຍຫລັງສໍາເລັດການແຂ່ງຂັນບານເຕະລາວພຣີເມຍລີກ ແລະ ດີວີຊັນ 1 ຂອງສະຫະພັນບານເຕະແຫ່ງຊາດຈັດຂຶ້ນແລ້ວ ພວກເຮົາກໍເລັ່ງຝຶກຊ້ອມນັກກິລາສະໂມສອນຂອງພວກເຮົາຕະຫລອດ ເພື່ອເຂົ້າຮັບໃຊ້ການແຂ່ງຂັນລາຍການຕ່າງໆ, ນັກກິລາແຕ່ລະຄົນລ້ວນແຕ່ມີທັກສະການຫລິ້ນດີຫລາຍຄົນ ເຊິ່ງແຕ່ລະຄົນກໍໄດ້ສັງກັດຢູ່ສະໂມສອນຕ່າງໆໃນການແຂ່ງຂັນລາວພຣີເມຍລີກປີຜ່ານມາ ໂດຍສະເພາະທ້າວ ພັດທະນາ ພົມມະເທບ ທີ່ເປັນນັກກິລາຕົວຫລັກຂອງທີມຊາດລາວ ເຂົ້າຮ່ວມການແຂ່ງຂັນທຸກລາຍການໃນພາກພື້ນ ແລະ ສາກົນ. ຂະນະທີ່ຜ່ານມາທ້າວ ພັດທະນາ ພົມມະເທບ ເຄີຍເຂົ້າຮ່ວມຄັດເລືອກຢູ່ກັບສະໂມສອນ ກາລະສິນ ເອັຟຊີ ດີວີຊັນ 3 ຂອງໄທລີກ ປະເທດໄທ ໃນທ້າຍເດືອນພຶດສະພາຜ່ານມານີ້. ຫລັງຈາກນັ້ນກໍກັບມາຮັບໃຊ້ຊາດເຂົ້າຮ່ວມງານກິລາມະຫະກໍາຊີເກມຄັ້ງທີ 29 ຈັດຂຶ້ນທີ່ປະເທດມາເລເຊຍທ້າຍເດືອນສິງຫາ. ຫລັງຈາກນັ້ນ ຈຶ່ງກັບມາເຊັນສັນຍາຫລິ້ນໃຫ້ສະໂມສອນຊົນບູລີ ເອັຟຊີ ປະເທດໄທອີກເປັນຄັ້ງທີ 2 ທີ່ໄດ້ເຂົ້າຮ່ວມການແຂ່ງຂັນໄທພຣີເມຍລີກເປັນເວລາ 2 ປີ. ສໍາລັບຜົນງານຂອງທ້າວ ພັດທະນາ ພົມມະເທບ ເຄີຍຫລິ້ນໃຫ້ສະໂມສອນເອັສຣາ ເອັຟຊີ, ລ້ານຊ້າງ ຢູໄນເຕັດ, ວຽງຈັນ ຢູໄນເຕັດ. ສ່ວນຜົນງານຕິດທີມຊາດລຸ້ນອາຍຸ 14 ປີ, 16 ປີ ແລະ 19 ປີ. ຂະນະທີ່ທ້າວ ສົມຊາຍ ແກ້ວຫານາມ ກໍເປັນອີກນັກເຕະໜຶ່ງມາຈາກສະໂມສອນຂອງພວກເຮົາທີ່ໄດ້ເຊັນສັນຍາກັບສະໂມສອນນ່ານ ເອັຟຊີ ເປັນເວລາ 1 ປີ ເຊິ່ງເປັນຄັ້ງທໍາອິດ.