AFC ຫ້າມສະໂມສອນລາວໂຕໂຢຕ້າຮ່ວມ AFC Cup 2018 ຈາກກໍລະນີມີສ່ວນລ໋ອກຜົນບານ
ສະໂມສອນລາວໂຕໂຢຕ້າເອັຟຊີ LAO TOYOTA FC ແຊ້ມບານເຕະ ລາວພຣີເມຍລີກ 2017 ຖືກສະຫະພັນບານເຕະເອເຊຍ (AFC) ລົງໂທດຫ້າມບໍ່ໃຫ້ເຂົ້າຮ່ວມການແຂ່ງຂັນບານເຕະເອເອັຟຊີຄັບ 2018 (AFC Cup 2018) ຫລັງຈາກຖືກກ່າວຫາວ່າມີສ່ວນກ່ຽວຂ້ອງທາງກົງ ຫລື ທາງອ້ອມໃນການລ໋ອກຜົນບານໃນການແຂ່ງຂັນບານເຕະເອເອັຟຊີຄັບໃນປີ 2015-2016.
ອີງຕາມຂໍ້ມູນຈາກເວັບໄຊຂອງສະຫະພັນບານເຕະແຫ່ງຊາດລາວ (ສຕລ) ໃຫ້ຮູ້ວ່າ: ໜ່ວຍງານກວດກາການເຂົ້າຮ່ວມການແຂ່ງຂັນ (Entry Control Body) ຂອງ AFC ໄດ້ແຈ້ງຕໍ່ກອງປະຊຸມໃນວັນທີ 13 ທັນວາ 2017 ສະໂມສອນລາວໂຕໂຢຕ້າເອັຟຊີ ບໍ່ສາມາດເຂົ້າຮ່ວມໃນການແຂ່ງຂັນບານເຕະ AFC Cup 2018 ໄດ້, ເນື່ອງຈາກຖືກກ່າວຫາວ່າມີສ່ວນກ່ຽວຂ້ອງທາງກົງ ຫລື ທາງອ້ອມໃນການລ໋ອກຜົນການແຂ່ງຂັນບານເຕະ AFC Cup ລະດູການ 2015-2016 ເຊິ່ງການກະທຳດັ່ງກ່າວແມ່ນຜິດຕໍ່ມາດຕາ 12.8 ຂອງກົດລະບຽບການເຂົ້າຮ່ວມການແຂ່ງຂັນບານເຕະລະດັບສະໂມສອນຂອງ AFC 2017-2020 (Entry Manual for AFC Cup Competitions 2017-2020) ໂດຍຄະນະກຳມະການຈັດການແຂ່ງຂັນຂອງ AFC ຈະຈັດຕັ້ງປະຕິບັດຄຳຕັດສິນດັ່ງກ່າວ ແລະ ປັດຈຸບັນນີ້, ສະໂມສອນລາວໂຕໂຢຕ້າເອັຟຊີ ກຳລັງຢູ່ໃນຂັ້ນຕອນການອຸທອນ.
ສ່ວນເວັບໄຊສະໂມສອນລາວໂຕໂຢຕ້າເອັຟຊີ ລະບຸວ່າ: ພວກຕົນໄດ້ຊີ້ແຈງຕາມທີ່ AFC ສະເໜີມາຫາແລ້ວ ແລະ ທີມລາວໂຕໂຢຕ້າໄດ້ພົ້ນຂໍ້ກ່າວຫາແລ້ວ, ສ່ວນທີ່ມີຂ່າວຈາກທາງ AFC ແລະ ຈາກສື່ຕ່າງໆນັ້ນສະໂມສອນລາວໂຕໂຢຕ້າເອັຟຊີ ຍັງບໍ່ໄດ້ມີການອອກມາຖະແຫລງຂ່າວ ຫລື ໃຫ້ຂໍ້ມູນຕ່າງໆ ແລະ ເບື້ອງຕົ້ນຂໍຊີ້ແຈງວ່າ: ເລື່ອງດັ່ງກ່າວໄດ້ມີການຕັດສິນໄປກ່ອນໜ້ານັ້ນແລ້ວວ່າ ສະໂມສອນລາວໂຕໂຢຕ້າເອັຟຊີບໍ່ໄດ້ມີຄວາມຜິດ ແລະ ບໍ່ໄດ້ມີຄວາມກ່ຽວຂ້ອງກັບການລ໋ອກຜົນການແຂ່ງຂັນໃດໆ. ອີງຕາມເອກະສານ AFC Disciplinary Committee Decision 2017 021DC01. All charges against Lao Toyota FC are dismissed (ທຸກຂໍ້ກ່າວຫາໃຫ້ລາວໂຕໂຢຕ້າເອັຟຊີ ແມ່ນຖືກຍົກຟ້ອງ) ທາງສະໂມສອນຂໍຢືນຢັນວ່າ: ບໍ່ໄດ້ມີເຈດຕະ
ນາໃນການບໍລິຫານທີມທີ່ຂັດຕໍ່ນະໂຍບາຍ ແລະ ຂໍ້ກຳນົດຂອງ FIFA/AFC ລວມເຖິງຈະບໍ່ຍອມໃຫ້ການກະທຳໃດໆທັງພາຍໃນ ແລະ ພາຍນອກ ອັນເປັນເຫດໃຫ້ສະໂມສອນ ແລະ ວົງການບານເຕະເສຍຫາຍ. ທັງນີ້ບັນຫາດັ່ງກ່າວເກີດຂຶ້ນຈາກນັກເຕະພຽງບາງຄົນ ແລະ ທາງສະໂມສອນໄດ້ທຳການຍົກເລີກສັນຍາ ແລະ ໄດ້ຊີ້ແຈງໄປກ່ອນໜ້ານີ້ແລ້ວ. ສະນັ້ນ ທາງສະໂມສອນໄດ້ຍື່ນເລື່ອງຊີ້ແຈງ ແລະ ສອບຖາມເຫດຜົນເຖິງ AFC ເພື່ອປົກປ້ອງສິດ ແລະ ສັກສີຂອງສະໂມສອນ ລາວໂຕໂຢຕ້າ ເອັຟຊີ ຜ່ານທາງທະນາຍຄວາມຂອງສະໂມສອນ ເນື່ອງຈາກເຮົາໄດ້ພິສູດ ແລະ ໄດ້ຮັບການຕັດສິນວ່າ ພົ້ນຂໍ້ກ່າວຫາແລ້ວ ແຕ່ຍ້ອນເຫດໃດເຖິງຍັງຕັດສິດການເຂົ້າຮ່ວມແຂ່ງຂັນລາຍການ AFC Cup 2018 ຂອງພວກເຮົາ.
