ກະຕໍ້ທີມຊາດລາວໄປບໍ່ເຖິງຝັນຕົກຮອບ 8 ທີມສຸດທ້າຍການແຂ່ງຂັນຊີງແຊ້ມໂລກ
ການແຂ່ງຂັນກະຕໍ້ຊີງແຊ້ມໂລກທີ່ປະເທດໄທ ຈັດຂຶ້ນລະຫວ່າງວັນທີ 11-17 ທັນວານີ້ ມີທັງໜົດ 30 ປະເທດເຂົ້າຮ່ວມ ຂະນະທີ່ສະຫະພັນກະຕໍ້ແຫ່ງຊາດລາວໄດ້ສົ່ງນັກກິລາກະຕໍ້ທີມຊາດລາວຈໍານວນ 30 ຄົນເຂົ້າຮ່ວມ ໃນ 7 ລາຍການຄື: ທີມຊຸດຊາຍ-ຍິງ; ຄູ່ຊາຍ-ຍິງ; ດຽວຊາຍ-ຍິງ, ລອດບ້ວງຊາຍ ຜ່ານການແຂ່ງຂັນທີມຊາດລາວບໍ່ສາມາດໄປເຖິງຝັນຕົກຮອບ 8 ທີມສຸດທ້າຍ.
ທ້າວ ໂຍທິນ ສົມບັດພູທອນ ນັກກິລາກະຕໍ້ທີມຊາດລາວ ໃຫ້ສໍາພາດວ່າ: ການເຂົ້າຮ່ວມແຂ່ງຂັນຊີງແຊ້ມໂລກທີ່ປະເທດໄທຈັດຂຶ້ນກາງເດືອນທັນວານີ້ ຖືວ່າເປັນບົດຮຽນອັນຍິ່ງໃຫຍ່ສໍາລັບຕົນເອງຫລາຍພໍສົມຄວນ ເຊິ່ງໄດ້ພົບປະ ແລະ ຖອດຖອນບົດຮຽນກັບນັກກິລາບັນດາປະເທດໃນພາກພື້ນ ແລະ ສາກົນ,ໃນນັ້ນການເຂົ້າຮ່ວມແຂ່ງຂັນຄັ້ງນີ້ ທາງສະຫະພັນກະຕໍ້ແຫ່ງຊາດລາວໄດ້ສົ່ງນັກກິລາເຂົ້າຮ່ວມຈໍານວນ 30 ຄົນ ໂດຍຈະເນັ້ນນັກກິລາຮຸ່ນເຍົາວະຊົນເປັນຈໍານວນຫລາຍ. ຜ່ານການແຂ່ງຂັນນັກກິລາຂອງພວກເຮົາບໍ່ສາມາດຜ່ານເຂົ້າຮອບທັງ 2 ປະເພດ ເພາະວ່ານັກກິລາແຕ່ລະປະເທດລ້ວນແຕ່ມີປະສົບການຫລາຍພໍສົມຄວນ ໂດຍສະເພາະໄທ ເຊິ່ງເປັນປະເທດອັນດັບຕົ້ນຂອງກິລາປະເພດນີ້. ດັ່ງນັ້ນ ຈຶ່ງເຮັດໃຫ້ນັກກິລາຂອງລາວບໍ່ສາມາດຜ່ານເຂົ້າຮອບໃນແຕ່ລະຮຸ່ນ. ສໍາລັບຜົນງານຂອງນັກກິລາທີມຊາດຊາຍຂອງພວກເຮົາເຂົ້າຮ່ວມທັງໝົດ 3 ລາຍການຄື: ທີມດຽວຕົກແຕ່ຮອບທໍາອິດ, ທີມດັບເບິ້ນສາມາດຜ່ານເຂົ້າຮອບ 8 ທີມສຸດທ້າຍ ແຕ່ບໍ່ສາມາດເອົາຊະນະກັບທີມຊາດໄທ ຈຶ່ງຕົກຮອບ 8 ທີມສຸດທ້າຍ; ສ່ວນທີມຊຸດກໍເຊັ່ນດຽວກັນເຂົ້າຮອບ 8 ທີມສຸດທ້າຍ ແຕ່ລົງສະໜາມຄັ້ງສຸດທ້າຍເສຍໃຫ້ທີມຊາດເກົາຫລີ; ຂະນະທີ່ທີມຊາດຍິງກໍເຊັນດຽວກັນໄດ້ພຽງແຕ່ຜ່ານເຂົ້າຮອບ 8 ທີມໃນ 4 ລາຍການ.
