ຟັງເພງລະຫ່ວາງອ່ານໜັງສືຊ່ວຍໃຫ້ລູກສະຫລາດຂຶ້ນ
ເພງສ່ວນຫລາຍທີ່ເດັກນ້ອຍມັກຟັງໃນປະຈຸບັ້ນນີ້ເບິ່ງຄືວ່າຈະບໍ່ໜ້າສົນໃຈສຳລັບພໍ່ແມ່ຫລາຍໆຄົນ, ເພງຈັງຫວະໄວໆທີ່ເປັນທີ່ຮູ້ຈັກມັກຈະມີເນື້ອເພງທີ່ກ່າວເຖິງການຈັດລ້ຽງສັງສັນ ເຊິ່ງມັກມາພ້ອມກັບທ່າເຕັ້ນຍົວະໃຈ, ແຕ່ມີຫຍັງບາງຢ່າງທີ່ຢູ່ໃນເພງສະໄໝນີ້. ແຕ່ກ່ອນທີ່ທ່ານຈະຖອນຫາຍໃຈ ຫລື ເຈັບຫົວນຳເດັກນ້ອຍສະໄໝນີ້ ເມື່ອທ່ານໄດ້ຍິນວ່າລູກກຳລັງຮ້ອງເພງ ແລະ ເຕັ້ນເພງຫຍັງຢູ່ນັ້ນ ເຮົາຂໍບອກໃຫ້ທ່ານຮູ້ວ່າການຟັງເພງຂະນະອ່ານໜັງສືຈະຊ່ວຍເພີ່ມຄວາມສາມາດໃນການຮຽນຮູ້ ແລະ ການໃຊ້ສະມາທິໄດ້.
ດຣ. ເອມມ່າ ເກຣ ນັກຈິດຕະວິທະຍາຄລີນິກແບ່ງປັນຂໍ້ມູນຈາກວຽກງານວິໄຈຂອງນາງໃຫ້ເຮົາຮູ້ວ່າ : ການຟັງເພງຂະນະອ່ານໜັງສື ແລະ ທົບທວນບົດຮຽນນັ້ນມີຜົນດີຕໍ່ການຮຽນຮູ້ແນວໃດ Spotify ເຊິ່ງເປັນບໍລິການດົນຕີດິຈິຕັອນເຈົ້າໜຶ່ງ ເປັນຜູ້ໃຫ້ນາງເຮັດວິໄຈໃນເລື່ອງນີ້.
ຫາກທ່ານສາມາດເບິ່ງຂ້າມເນື້ອເພງ ຫລື ທ່າເຕັ້ນປະກອບທີ່ອ່າວຮຸນແຮງຂອງເພງດັງໆບາງເພງໃນຍຸກນີ້ໄດ້ ທ່ານກໍຈະພົບວ່າຈັງຫວະດົນຕີແບບໃດທີ່ຊ່ວຍກະຕຸ້ນການຮຽນຮູ້ຂອງລູກສຳລັບວິຊາຕ່າງໆ ເຊັ່ນ : ຄະນິດສາດ, ວິທະຍາສາດທຳມະຊາດ ແລະ ພາສາ ເຊິ່ງທັກສະສຳຄັນໃນວິຊາຄະນິດສາດແມ່ນຄວາມສາມາດໃນການຈັດການກັບຄວາມຈິງ ແລະ ແກ້ໄຂບັນຫາ, ຂະບວນການດັ່ງກ່າວຕ້ອງໃຊ້ສະໝອງເບື້ອງຊ້າຍ. ການຟັງເພງທີ່ມີຈັງຫວະ 50 – 80 ເທື່ອຕໍ່ນາທີ ຊ່ວຍໃຫ້ໃຈເຢັນລົງ ເຊິ່ງຊ່ວຍໃຫ້ການຄິດໃຊ້ເຫດຜົນ ແລະ ສະໝອງສາມາດຮຽນຮູ້ ແລະ ຈື່ຈຳຂໍ້ມູນໃໝ່ໆໄດ້.
ສ່ວນວິຊາວິທະຍາສາດທຳມະຊາດນັ້ນ ເພງຄລາດສິກທີ່ມີຈັງຫວະ 60 – 70 ເທື່ອຕໍ່ນາທີ ຊ່ວຍໃຫ້ນັກຮຽນໆໄດ້ດົນຂຶ້ນ ແລະ ຈື່ຈຳຂໍ້ມູນໄດ້ຫລາຍຂຶ້ນ ທຳນອງເພງ ແລະ ລະດັບສຽງທີ່ກ້ວາງຊ່ວຍເສີມການຮຽນວິທະຍາສາດໄດ້. ສະຖິຕິສະແດງໃຫ້ເຫັນວ່ານັກຮຽນທີ່ຮຽນວິທະຍະສາດຂະນະທີ່ຟັງເພງມີຄະແນນສອບເຄັງວິຊານີ້ຫລາຍກ່ວາຄ່າສະເລ່ຍ 12% ເມື່ອປຽບທຽບກັບນັກຮຽນທີ່ບໍ່ໄດ້ຟັງເພງລະຫ່ວາງຮຽນ.
ພາສາອັງກິດ, ຮູບເງົາ ແລະ ສິລະປະ : ສະໝອງເບື້ອງຂວາປະມວນຄວາມຄິດສ້າງສັນ ວຽກງານວິໄຈສະແດງໃຫ້ເຫັນວ່າ ຫາກນັກຮຽນຟັງເພງຣັອກ ແລະ ເພງປັອບທີ່ເຕັມໄປດ້ວຍອາລົມ ຈະເຮັດໃຫ້ເພີ່ມຄວາມຕື່ນເຕັ້ນທີ່ມີທ່າອ່ຽງວ່າຈະສົ່ງເສີມຄວາມສາມາດທາງສິລະປະໄດ້, ການຟັງເພງແບບນີ້ຈະເປັນປະໂຫຍດຢ່າງຍິ່ງເມື່ອຮຽນຮູ້ວິຊາພາສາອັງກິດ, ຮູບເງົາ, ການບັນເທີງ ຫລື ສິລະປະ ທີ່ຕ້ອງໃຊ້ຄວາມຄິດສ້າງສັນຫລາຍໆ ເຊິ່ງດົນຕີສາມາດເຮັດໃຫ້ເຮົາພ້ອມທີ່ຈະຮຽນວິຊາປະເພດທີ່ເໝາະສົມ ຫາກທ່ານເຮັດຕາມເຄັດລັບທີ່ກ່າວມາຂ້າງເທິງ ແລະ ເຂົ້າໃຈວ່າດົນຕີມີຂໍ້ດີຕໍ່ການຮຽນແນວໃດ ບາງເທື່ອທ່ານອາດຈະມີລາຍການເພງສຳລັບການຮຽນຮູ້ທີ່ດີທີ່ສຸດ (ທີ່ມີເນື້ອເພງທ່ີເໝາະສົມຕໍ່ເດັກ) ສຳລັບລູກຂອງທ່ານກໍໄດ້.
