ເປີດສູນການຄ້າ ໂຣໂຢ ຢູ່ເຂດເສດຖະກິດສະເພາະບຶງທາດຫຼວງ
ສູນການຄ້າໂຣໂຢ ຢູ່ໃນເຂດເສດຖະກິດສະເພາະບຶງທາດຫຼວງ,ນະຄອນຫຼວງວຽງຈັນ.ໄດ້ເປີດໃຫ້ບໍລິການຊື້-ຂາຍຢ່າງເປັນທາງການແລ້ວໃນມື້ວານນີ້,ມີຜະລິດຕະພັນລາວຫຼາຍຢ່າງລວມທັງພືດຜັກປອດສານພິດແລະ ສິນຄ້າທີ່ມີຊື່ສຽງຫຼາຍຍີ່ຫໍ້ຈາກຕ່າງປະເທດ ແລະສິນຄ້າຂອງບໍລິສັດໂຣໂຢ ຈຳນວນໜຶ່ງຂາຍໃນລາຄາຂາຍສົ່ງ.
ທ່ານ ສົມກຽດ ສີຫາລາດ ຄະນະສະພາບໍລິຫານເຂດເສດຖະກິດສະເພາະ ບຶງທາດຫຼວງກ່າວໃນພິທີວ່າ:ລັດຖະບານເລັ່ງພັດທະນາບຶງທາດຫຼວງໃຫ້ເປັນເມືອງໃໝ່ທັນສະໄໝ,ເປັນຈຸດທ່ອງທ່ຽວໜຶ່ງປະກອບມີຫລາຍກິດຈະການ ເພື່ອຮັບໃຊ້ເຂດເສດຖະກິດສະເພາະບຶງທາດຫຼວງແລະຊາວນະຄອນຫຼວງວຽງຈັນ,ທຸກຄົນສາມາດເຂົ້າມາທ່ຽວແລະຈັບຈ່າຍຊື້ສິນຄ້າຢູ່ທີ່ນີ້ໄດ້.
ທ່ານ ນາງ ມົນທິດາ ລາສີ ປະທານບໍລິສັດໂຣໂຢ ເຈົ້າຂອງ ສູນການຄ້າໂຣໂຢ ສຸເປີມາເກັດ ກ່າວວ່າ:ພວກເຮົາໄດ້ພະຍາຍາມສ້າງສິ່ງດີໆແລະສູນການຄ້າແຫ່ງນີ້ ໄດ້ເປີດໂອກາດໃຫ້ຄົນລາວເຮົາສາມາດນຳເອົາ ຜະລິດຕະພັນຂອງຕົນເຂົ້າມາຂາຍໂດຍສະເພາະພືດຜັກປອດສານພິດຈາກກຸ່ມຜະລິດພືດຜັກອິນຊີທົ່ວນະຄອນຫຼວງເຂົ້າມາຂາຍແລະສິນຄ້າທີ່ມີຊື່ສຽງຈາກໄທ,ຈີນ,ຍີ່ປຸ່ນລວມທັງສິນຄ້າຂອງບໍລິສັດຂາຍໃນລາຄາສົ່ງຂອງໂຮງງານ ສິນຄ້າທີ່ນີ້ລ້ວນແຕ່ມີຄຸນນະພາບ ຕອບສະໜອງໄດ້ທຸກຄວາມຕ້ອງການຂອງລູກຄ້າ.
