ສະພາຄວາມໝັ້ນຄົງສປຊຈະໃຫ້ຍົກເລີກ ການຕັດສິນໃຈຂອງອາເມລິກາ ເລື່ອງເຢລູຊາເລມ
ສະພາຄວາມໝັ້ນຄົງແຫ່ງສະຫະປະຊາຊາດກຳລັງພິຈາລະນາຮ່າງມະຕິທີ່ຈະປະກາດວ່າ: ການຕັດສິນໃຈໃດໆກ່ຽວກັບສະຖານະຂອງເຢລູຊາເລມຈະບໍ່ມີຜົນທາງກົດໝາຍ ແລະ ຈະຕ້ອງຍົກເລີກໄປ, ພາຍຫລັງປະທານາທິບໍດີ ໂດນັນ ທຣຳ ຜູ້ນຳອາເມລິກາ ປະກາດຮັບຮອງນະຄອນເຢລູຊາເລມເປັນເມືອງຫລວງຂອງອິດສະລາແອນ.
ເຖິງຢ່າງໃດກໍຕາມ, ຮ່າງຖະແຫລງການ 1 ໜ້າຂອງເອຢິບທີ່ໄດ້ຮັບການແຈກຢາຍເຜີຍແຜ່ໃນສະມາຊິກສະພາຄວາມໝັ້ນຄົງ ສປຊ 15 ປະເທດໃນວັນທີ 16 ທັນວາ ບໍ່ໄດ້ລະບຸໂດຍກົງເຖິງອາເມລິກາ ຫລື ປະທານາທິບໍດີ ທຣຳ. ນັກການທູດກ່າວວ່າ: ຮ່າງຖະແຫລງການດັ່ງກ່າວໄດ້ຮັບການສະໜັບສະໜູນເປັນວົງກວ້າງ, ແຕ່ຈະຕ້ອງໄດ້ຮັບການລົງມະຕິຈາກອາເມລິການຳ. ເຈົ້າໜ້າທີ່ທູດຄາດວ່າ: ສະພາຄວາມໝັ້ນຄົງ ສປຊ ຈະລົງມະຕິໃນອາທິດນີ້ ໂດຍຈຳເປັນຕ້ອງໄດ້ຮັບການສະໜັບສະໜູນ 9 ສຽງ ແລະ ຕ້ອງບໍ່ມີການໃຊ້ສິດຢັບຢັ້ງຈາກສະມາຊິກຖາວອນໄດ້ແກ່ ອາເມລິກາ, ຝຣັ່ງ, ອັງກິດ, ຣັດເຊຍ ຫລື ຈີນ ເພື່ອຜ່ານຮ່າງມະຕິດັ່ງກ່າວ.
