ໜັກແນ່ນອນທີມຈາກຫວຽດນາມຜົນງານດີນອກບ້ານ ກຽມບຸກມາຢາມ ລາວໂຕໂຢຕ້າ ລຸ້ນເຂົ້າຊີງແມ່ຂອງຄລັບ 2017
ແຟນບານຊາວລາວ ກໍຄື ລາວໂຕໂຢຕ້າ ເອັຟຊີ ໜາວໆຮ້ອນໆ ເມື່ອການແຂ່ງຂັນບານເຕະ ໂຕໂຢຕ້າ ແມ່ຂອງ ຄລັບ ແຊ້ມປ້ຽນຊິບ 2017 ຮອບຮອງຊະນະເລີດ ທີມມັກຂອງຕົນເອງຕ້ອງພົບກັບ Sanna Khanh Hoa ທີມຈາກ ສສ ຫວຽດນາມ ທີ່ຜົນງານນອກບ້ານດີ ເມື່ອບຸກຖະຫລົ່ມ ບິກເກັດ ອັງກໍ 5-1 ຜ່ານເຂົ້າຮອບຮອງຊະນະເລີດ.
ພາຍຫລັງທີ່ Sanna Khanh Hoa ລົງສະໜາມພົບກັບ ບິກເກັດ ອັງກໍ ທີມຈາກກຳປູເຈຍ ສະເໝີກັນ 4-4 ກ່ອນທີ່ນັດທີ 2 ຈະເປັນ ຊານນາ ຈະສ້າງຜົນງານໂດດເດັ່ນບຸກເອົາຊະນະທີມຈາກກຳປູເຈຍຂາດລອຍ 5-1 ເຮັດໃຫ້ຄະແນນລວມ 2 ນັດ ຊານນາ ເອົາຊະນະໄປ 9-5 ຜ່ານເຂົ້າຮອບຮອງຊະນະເລີດພົບກັບ ລາວໂຕໂຢຕ້າ ເອັຟຊີ.
ສຳລັບ ລາວໂຕໂຢຕ້າ ເອັຟຊີ ປັດຈຸບັນມີຄວາມພ້ອມ 100% ຈະເປີດບ້ານຮັບການມາຢາມ Sanna Khanh Hoa ທີມຈາກຫວຽດນາມ ໃນເວລາ 18:30 ໂມງ ຂອງວັນທີ 17 ທັນວານີ້ ທີ່ສະໜາມກິລາແຫ່ງຊາດ ຫລັກ 16 ເຊິ່ງໄດ້ປຽບແຂ່ງຂັນໃນບ້ານ ແຕ່ທີມຈາກ ສສ ຫວຽດນາມ ຊຸດນີ້ມາດີ 2 ນັດຍິງໄປເຖິງ 9 ປະຕູ ໂດຍສະເພາະນອກບ້ານຜົນງານດີສຸດໆ. ດັ່ງນັ້ນ ລາວໂຕໂຢຕ້າ ເອັຟຊີ ຕ້ອງຄຶກຄັກຂຶ້ນກວ່າເກົ່າ ເພາະ ລາວໂຕໂຢຕ້າ ເຄີຍແຂ່ງຂັນລາຍການນີ້ມາແລ້ວ 2 ຄັ້ງບໍ່ຜ່ານຮອບຄັດທຳອິດຈັກຄັ້ງ.
ເຖິງຢ່າງໃດກໍຕາມ, ນັດນີ້ແຂ່ງຂັນໃນບ້ານ ແລະ ຮຽກຮ້ອງໃຫ້ແຟນບານເອົາໃຈຊ່ວຍກັນຫລາຍ ເຊື່ອວ່າຈະເປັນແຮງໃຈໃຫ້ກັບນັກເຕະຮຶດສູ້ຈົນກ້າວສູ່ໄຊຊະນະ ເພື່ອລຸ້ນເຂົ້າຮອບຊີງຊະນະເລີດ ແລະ ຮັກສາສິດໃນຮອບຮອງ ຫລື ສ້າງປະຫວັດສາດຢືນໃນຮອບຊີງຊະນະເລີດ (ຖ້າໄດ້ແຊ້ມ) ຕໍ່ໄປ.
