ນັກກິລາເຈັດສະກີລາວ ຍາດໄດ້ ອັນດັບທີ 3 ລາຍການລະດັບໂລກ
ໃນວັນທີ 12 ທັນວາ 2017 ທີ່ຂົວມິດຕະພາບ (ລາວ-ໄທ) ໄດ້ມີພິທີຕ້ອນຮັບນັກກິລາເຈັດສະກີລາວໄດ້ເຂົ້າຮ່ວມແຂ່ງຂັນລາຍການ Jet ski World Cup Thailand 2017 ທີ່ຫາດຈອມທຽນ ພັດທະຍາ ປະເທດໄທ ແລະ ສາມາດຍາດໄດ້ອັນດັບທີ 3 ໃນປະເພດ AMATEUR RUNABOUT STOCK ໂດຍໃຫ້ກຽດຕ້ອນຮັບໂດຍທ່ານ ຄໍາສະຫວັນ ໂຄດໄຊ ຮອງຫົວໜ້າພະແນກສຶກສາທິການ ແລະ ກິລານະຄອນຫລວງ, ມີປະທານສະຫະພັນເຈັດສະກີນະຄອນຫລວງວຽງຈັນ ພ້ອມດ້ວຍໝູ່ເພື່ອນ.
ໂອກາດດັ່ງກ່າວ ທ່ານ ຄໍາສະຫວັນ ໂຄດໄຊ ຮອງຫົວໜ້າພະແນກສຶກສາທິການ ແລະ ກິລາ ນະຄອນຫລວງວຽງຈັນ ກ່າວວ່າ: ຕົນເອງໃນນາມຕາງໜ້າພະແນກສຶກສາທິການ ແລະ ກິລານະຄອນຫລວງວຽງຈັນ ຂໍຍ້ອງຍໍຊົມເຊີຍຕໍ່ສະຫະພັນເຈັດສະກີນະຄອນຫລວງວຽງຈັນທີ່ສາມາດສ້າງນັກກິລາລຸຸ້ນໜຸ່ມນ້ອຍຂຶ້ນເພື່ອພັດທະນາວົງການກິລາຂອງລາວຕະຫລອດມາ ໂດຍສະເພາະທ້າວ ເທບພະລັກ ໄຂຄໍາພິທູນ ທີ່ສາມາດຍາດໄດ້ອັນດັບ 3 ໃນລາຍການລະດັບໂລກ ເຊິ່ງຖືເປັນຄັ້ງປະຫວັດສາດຂອງວົງການກິລາບ້ານເຮົາ. ຢ່າງໃດກໍຕາມ, ຂໍໃຫ້ສຶບຕໍ່ຝຶກຝົນຫລໍ່ຫລອມຕົວເອງ ເພື່ອສືບຕໍ່ສ້າງຜົນງານຕໍ່ໄປ.
ຂະນະດຽວກັນ ທ້າວ ເທບພະລັກ ໄຂຄໍາພິທູນ ໃຫ້ສໍາພາດວ່າ: ລາຍການດັ່ງກ່າວມີນັກກິລາມາຈາກ 33 ປະເທດເຂົ້າຮ່ວມ ເຊິ່ງຮູບແບບການແຂ່ງຂັນແຕ່ລະລຸ້ນແມ່ນໄດ້ຄັດໃຫ້ເຂົ້າຮອບ 18 ຄົນສຸດທ້າຍເພື່ອໃຫ້ເຂົ້າແຂ່ງຂັນໃນຮອບຕໍ່ໄປ. ສະເພາະລາວເຮົາໄດ້ສົ່ງນັກກິລາເຂົ້າຮ່ວມຈໍານວນ 3 ຄົນໃນ 3 ລາຍການ ແຕ່ບໍ່ສາມາດຜ່ານເຂົ້າຮອບຄັດເລືອກ 2 ຄົນ, ສ່ວນຕົນເອງແມ່ນຜ່ານເຂົ້າຮອບ 18 ຄົນ ແລະ ສາມາດຍາດໄດ້ອັນດັບທີ 3 ເຊິ່ງໄດ້ສ້າງໃບໜ້າອັນໃໝ່ໃຫ້ກັບວົງການກິລາເຈັດສະກີບ້ານເຮົາອີກຄັ້ງ. ແນວໃດກໍຕາມ ການເຂົ້າຮ່ວມແຂ່ງຂັນຄັ້ງນີ້ກໍປາສະຈາກບໍ່ໄດ້ການສະໜັບສະໜູນຈາກ ມັງກອນທອງ ຟາມ, ທີມວຽງຈັນ ເຈັດສະກີ, ສະຫະພັນເຈັດສະກີ ນະຄອນຫລວງວຽງຈັນ ແລະ ສະໂມສອນລອຍນໍ້າເຈັດສະກີ.
