ສາທາສັ່ງຢຸດຕິການດຳເນີນທຸລະກິດຫ້ອງກວດພະຍາດຈົ່ງຊານ
ກົມປິ່ນປົວ ແລະ ຟື້ນຟູໜ້າທີ່ການກະຊວງສາທາລະນະສຸກສົມທົບກັບພະແນກສາທາລະນະສຸກນະຄອນຫຼວງວຽງຈັນ ແລະ ຫ້ອງການສາທາລະນະສຸກ 9 ຕົວເມືອງລົງຕິດຕາມກວດກາການເຄື່ອນໄຫວໃຫ້ບໍລິການບັນດາຫ້ອງກວດພະຍາດພາກເອກະຊົນຢູ່ນະຄອນຫຼວງວຽງຈັນທີ່ເຄື່ອນໄຫວບໍ່ຖືກຕ້ອງ, ໂດຍສະເພາະ ການເອົາໃບອະນຸຍາດໃຫ້ຜູ້ອື່ນເຊົ່າ ແລະ ຫ້ອງກວດພະຍາດຂອງຄົນຕ່າງປະເທດທີ່ເປີດເອງ ແລະ ເຊົ່າໃບອະນຸຍາດຂອງຄົນລາວ ເພື່ອສອດຄ່ອງກັບແຜນປະຕິຮູບສາທາລະນະສຸກໃນໄລຍະໃໝ່ ທັງເປັນການປະຕິບັດກົດໝາຍວ່າດ້ວຍການປິ່ນປົວຢ່າງເຂັ້ມງວດ.
ທ່ານ ບຸນໜັກ ໄຊຊະນະສົງຄາມ ຫົວໜ້າກົມປິ່ນປົວ ແລະ ຟື້ນຟູໜ້າທີ່ການ ຫົວໜ້າຊີ້ນຳທີມງານວິຊາການ, ພ້ອມດ້ວຍຄະນະໄດ້ລົງກວດກາຫ້ອງກວດພະຍາດຈົງຊານຢູ່ບ້ານໂພນທັນເມືອງໄຊເຊດຖານະຄອນຫລວງວຽງຈັນ, ແຕ່ກ່ອນເປັນຫ້ອງກວດພະຍາດທີ່ເປີດຂຶ້ນໂດຍເຊົ່າໃບອະນຸຍາດຂອງຄົນລາວ, ປັດຈຸບັນໄດ້ເປີດເອງ, ເປັນຫ້ອງກວດພະຍາດເອກະຊົນຕ່າງປະເທດ (ຈີນ) ທີ່ບໍ່ໄດ້ຮັບອະນຸຍາດຈາກກະຊວງສາທາລະນະສຸກ ເຄື່ອນໄຫວບໍ່ຖືກຕ້ອງ ຜ່ານມາເຄີຍຖືກຕັກເຕືອນໃຫ້ຢຸດເຊົາ 2 ຄັ້ງ ພ້ອມນີ້ຍັງບໍ່ປະຕິບັດຕາມຄຳແນະນຳເປີດບໍລິການແກ່ຍາວມາເຖິງປັດຈຸບັນ ມີການໂຄສະນາຜ່ານສື່ຕ່າງໆ ເຊິ່ງແມ່ນຂໍ້ຫ້າມຂອງກະຊວງສາທາລະນະສຸກ ຜ່ານການລົງກວດກາຄັ້ງນີ້ ໄດ້ເຮັດບົດບັນທຶກພ້ອມທັງເຕືອນໃຫ້ຢຸດເຊົາ ແລະ ປິດກິດຈະການບໍ່ໃຫ້ກາຍວັນທີ 30 ທັນວາ 2017 ຖ້າບໍ່ຢຸດເຊົາຈະໄດ້ໃຊ້ມາດຕະການຂັ້ນເດັດຂາດທາງກົດໝາຍ.
