ປະທານສະພາເນັ້ນຕ້ອງສ້າງຜູ້ພິພາກສາທີ່ດີໃຫ້ຫລາຍ

ໃນໂອກາດເຂົ້າຮ່ວມ ແລະ ໂອ້ລົມຕໍ່ກອງປະຊຸມຜູ້ພິພາກສາທົ່ວປະເທດຄັ້ງ ທີ 9 ຂອງທ່ານປະທານສະພາແຫ່ງຊາດນາງ ປານີ ຢາທໍຕູ້ ເມື່ອບໍ່ດົນມານີ້, ໂດຍທ່ານໄດ້ເນັ້ນໃຫ້ຜູ້ພິພາກສາທຸກຂັ້ນສືບຕໍ່ເອົາໃຈໃສ່ສຶກສາອົບຮົມການເມືອງແນວຄິດໃຫ້ພະນັກງານມີຄວາມໜັກແໜ້ນ, ເພື່ອເຊີດຊູບົດບາດຂອງອົງການຕຸລາການ ກໍຄືສ້າງຄວາມເປັນເອກະພາບທາງດ້ານທັດສະນະ ແລະ ການກະທຳຢູ່ໃນສານປະຊາຊົນແຕ່ລະຂັ້ນໃຫ້ມີຄວາມປອດໃສເຂັ້ມແຂງ, ຕັ້ງໜ້າປະຕິບັດໜ້າທີ່ການເມືອງຂອງຕົນຢ່າງໜັກແໜ້ນ, ເອົາໃຈໃສ່ປັບປຸງການຈັດຕັ້ງຂອງສານປະຊາຊົນໃຫ້ມີຄວາມເຂັ້ມແຂງສອດຄ່ອງກັບສະພາບຕົວຈິງຂອງວຽກງານສານ ກໍຄືການຂະຫຍາຍຕົວຂອງເສດຖະກິດ-ສັງຄົມຂອງຊາດ ແລະ ເຊື່ອມໂຍງກັບພາກພື້ນ ແລະ ສາກົນ, ໄປຄຽງຄູ່ການເອົາໃຈໃສ່ບຳລຸງສ້າງຜູ້ພິພາກສາ, ພະນັກງານຂອງສານ ເພື່ອໃຫ້ມີທັດສະນະຫລັກໝັ້ນການເມືອງໜັກແໜ້ນ, ເປັນແບບຢ່າງນຳໜ້າໃນການປະຕິບັດລະບຽບກົດໝາຍ, ຕ້ອງເອົາໃຈໃສ່ຍົກລະດັບດ້ານວິຊາສະເພາະ, ວິຊາການ ແລະ ພາສາຕ່າງປະເທດໃຫ້ສູງຂຶ້ນ ເພື່ອຮັບປະກັນໃຫ້ການພິຈາລະນາຕັດສິນຄະດີໃຫ້ບັນລຸຄາດໝາຍວາງໄວ້, ທັງໃຫ້ຮັບປະກັນຄຸນນະພາບ, ມີຄວາມຖືກຕ້ອງ ແລະ ເປັນທຳ, ເອົາໃຈໃສ່ພັດທະນາປັບປຸງ ແລະ ຍົກລະດັບພື້ນຖານໂຄງລ່າງທີ່ຈຳເປັນໃຫ້ແກ່ການເຄື່ອນໄຫວວຽກງານ ແລະ ອັນສໍາຄັນແມ່ນຕ້ອງສ້າງໃຫ້ໄດ້ຜູ້ພິພາກສາທີ່ດີ, ເກັ່ງ ແລະ ຜູ້ທີ່ພົ້ນເດັ່ນໃນຂະບວນການເຄື່ອນໄຫວວຽກງານຕົວຈິງເພື່ອເປັນແບບຢ່າງນຳໜ້າກໍຄືການດຳລົງຊີວິດທີ່ປອດໃສຂາວສະອາດ, ດຸໝັ່ນຄົ້ນຄວ້າ, ຮ່ຳຮຽນ, ປະຢັດມັດທະຍັດ, ບໍ່ອາດຍາສິດ ແລະ ບໍ່ສະແຫວງຫາຜົນປະໂຫຍດສ່ວນຕົວທີ່ບໍ່ຊອບທຳ.