ສປປ ລາວ ແລະ ອຸຍນິເຊັບ ທົບທວນຜົນການຮ່ວມມືປະຈຳປີ 2017
ກະຊວງແຜນການ ແລະ ການລົງທຶນ ຮ່ວມກັບອົງການສະຫະປະຊາຊາດ ສໍາລັບເດັກອຸຍນິເຊັບ ແລະ ບັນດາຄູ່ຮ່ວມພັດທະນາ, ອົງການຈັດຕັ້ງສາກົນປະຈໍາລາວ ໄດ້ຈັດເວທີສົນທະນາປຶກສາຫາລື ເພື່ອທົບທວນຄືນການຈັດຕັ້ງປະຕິບັດແຜນງານຮ່ວມມື ປະຈຳປີ 2017 ຂຶ້ນໃນວັນທີ 12 ທັນວານີ້ ທີ່ນະຄອນຫລວງວຽງຈັນ, ໂດຍມີທ່ານ ກິແກ້ວ ຈັນທະບູຣີ ຮອງລັດຖະມົນຕີກະຊວງແຜນການ ແລະ ການລົງທຶນ, ທ່ານ Octavian Bivol ຜູ້ຕາງໜ້າອົງການອຸຍນິເຊັບປະຈຳລາວ ແລະ ຜູ້ຕາງໜ້າຈາກກະຊວງ, ອົງການ, ຂະແໜງການອ້ອມຂ້າງສູນກາງ ແລະ ທ້ອງຖິ່ນ ເຂົ້າຮ່ວມເປັນຈຳນວນຫລາຍ.
ກອງປະຊຸມໄດ້ເປີດໂອກາດໃຫ້ບັນດາຜູ້ແທນໄດ້ປຶກສາຫາລືຖອດຖອນບົດຮຽນ ເຊິ່ງກັນ ແລະ ກັນ ເພື່ອປັບປຸງການວາງແຜນໂຄງການ ແລະ ການເຂົ້າເຖິງຊຸມຊົນ ທີ່ດ້ອຍໂອກາດ ຢູ່ເຂດຫ່າງໄກສອກຫລີກ ໃຫ້ດີຂຶ້ນກວ່າເກົ່າ, ໂດຍໄດ້ທົບທວນຄືນຄວາມຄືບໜ້າ ແລະ ຜົນສຳເລັດດ້ານຕ່າງໆໃນປີ 2017 ເຊິ່ງເປັນປີທຳອິດຂອງການປະຕິບັດ ແຜນຮ່ວມມືລະດັບປະເທດ ລະຫວ່າງລັດຖະບານລາວ ແລະ ອົງການຢູນີເຊັບ 2017-2021 ພ້ອມນັ້ນ, ຍັງໄດ້ກຳນົດໂຄງການບູລິມະສິດ ສຳລັບປີ 2018 ອີກດ້ວຍ.
ທ່ານ ກິແກ້ວ ຈັນທະບູຣີ ກ່າວເປີດພິທີວ່າ: ແຜນການຮ່ວມມືລະດັບຊາດ ຂອງອົງການອຸຍນິເຊັບ 2017-2021 ຮ່ວມກັບລັດຖະບານແຫ່ງ ສປປ ລາວ ແມ່ນສອດຄ່ອງກັບແຜນພັດທະນາເສດຖະກິດ-ສັງຄົມ ແຫ່ງຊາດ ຄັ້ງທີ 8, ເປົ້າໝາຍການພັດທະນາແບບຍືນຍົງ ແລະ ສ້າງຂຶ້ນບົນພື້ນຖານກອບການຮ່ວມມື ຂອງຄູ່ຮ່ວມງານອົງການສະຫະປະຊາຊາດເຊັ່ນ: ການປົກປ້ອງສັງຄົມ, ການປ່ຽນແປງຂອງອາກາດ ແລະ ໄພພິບັດ, ການສຶກສາ, ວຽກງານສາທາລະນະສຸກ, ນ້ຳສະອາດ ແລະ ສຸຂະອະນາໄມ, ວຽກງານໂພຊະນາການ, ສະຖາບັນ ແລະ ນະໂຍບາຍ ແລະ ວຽກງານຍຸຕິທຳ. ເປົ້າໝາຍລວມຂອງແຜນງານລະດັບປະເທດ ແມ່ນເພື່ອຮັບປະກັນໃຫ້ເດັກ ໂດຍສະເພາະເດັກທີ່ດ້ອຍໂອກາດ ໄດ້ຊົມໃຊ້ສິດທິຂອງເຂົາເຈົ້າໃນການຢູ່ລອດ, ການພັດທະນາ ແລະ ການໄດ້ຮັບການປົກປ້ອງ. ພ້ອມນັ້ນ, ແຜນງານລະດັບປະເທດແມ່ນແນໃສ່ວຽກງານສາທາລະນະສຸກ ແລະ ໂພຊະນາການ, ແຜນງານນ້ຳ, ສຸຂະອະນາໄມ, ການປ່ຽນແປງດິນຟ້າອາກາດ, ການສຶກສາ, ວຽກງານປົກປ້ອງ ແລະ ການຢູ່ຮ່ວມກັນໃນສັງຄົມ.
.ສໍາລັບແຜນການຮ່ວມມືໃນຕໍ່ໜ້າ ລະຫວ່າງລັດຖະບານລາວ ແລະ ອົງການ UNICEF ແມ່ນຈະເລັ່ງໃສ່ຮ່ວມກັນສືບຕໍ່ພັດທະນາ ແລະ ສ້າງແຜນງານຮ່ວມມືໃນການເປັນຄູ່ຮ່ວມງານທີ່ດີ ປະກອບສ່ວນເຂົ້າໃນແຜນພັດ ທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ 8 ໃຫ້ບັນລຸເປົ້າໝາຍທີ່ວາງໄວ້.
