ເອັຟເອ ນັດສືບສວນກໍລະນີ ມູຣິນໂຢ ບຸກຫ້ອງແຕ່ງຕົວຂອງ ແມນຊິຕີ້ ຈົນມີເລືອດ
ສະຫະພັນບານເຕະອັງກິດ (ເອັຟເອ) ລົງມືສອບສວນເຫດການວຸ້ນວາຍພາຍໃນຫ້ອງແຕ່ງຕົວ ຫລັງຈົບການແຂ່ງຂັນນັດດາບີ້ແມັດລະຫວ່າງ ແມນເຊັສເຕີ ຢູໄນເຕັດ ເສຍໃຫ້ກັບ ແມນເຊັສເຕີ ຊິຕີ້ 1-2 ໃນການແຂ່ງຂັນບານເຕະ ພຣີເມຍລີກ ອັງກິດ ທີ່ສະໜາມໂອລ ແທຣຟຟອດ ໃນວັນທີ 10 ທັນວານີ້ ແລະ ຂີດເສັ້ນໃຫ້ທັງ 2 ທີມມາຊີ້ແຈງໃນວັນທີ 13 ທັນວານີ້.
ພາຍຫລັງ ມີເຣີ ສື່ຕ່າງປະເທດເປີດເຜີຍວ່າ: ໂຈເຊ ມູຣິນໂຢ ຜູ້ຈັດການທີມຂອງ ແມນເຊັສເຕີ ຢູໄນເຕັດ ກັບ ເອແດຊອນ ຜູ້ຮັກສາປະຕູຂອງ ແມນເຊັສເຕີ ຊິຕີ້ ຖຽງກັນ ຫລັງນັດດາບີ້ແມັດແຫ່ງເມືອງແມນເຊັສເຕີ.
ແຫລ່ງຂ່າວລະບຸວ່າ: ມູຣິນໂຢ ຍ່າງໄປຫ້ອງແຕ່ງຕົວຂອງ ແມນເຊັສເຕີ ຊິຕີ້ ເພື່ອຂໍໃຫ້ນັກເຕະທີມຢາມຫລຸດສຽງສະຫລອງລົງ, ແຕ່ກາຍເປັນວ່າໄປຖຽງກັບ ເອແດຊອນ ຈົນສະຖານະການໄປກັນໃຫຍ່, ມີສຽງໂຮ ແລະ ມີຫລາຍຄົນມາຮ່ວມວົງ ເຊິ່ງໃນຝັ່ງຂອງ ແມນເຊັສເຕີ ຢູໄນເຕັດ ມີພະຍານບອກວ່າມີ ໂຣເມລູ ລູກາກູ ແລະ ຊິລວິໂນ ລໍໂຣ ຜູ້ຮັກສາປະຕູລວມຢູ່ນຳ.
ເຊື່ອວ່າມີຄົນທີ່ຮ່ວມກັບເຫດການດັ່ງກ່າວທີ່ເກີດຂຶ້ນໃນຫ້ອງແຕ່ງຕົວ ແລະ ນອກຫ້ອງແຕ່ງຕົວທີມຢາມ ຫລາຍເຖິງ 20 ຄົນ ໂດຍຂ່າວບອກວ່າ: ມູຣິນໂຢ ປຽກໄປດ້ວຍນ້ຳຫລັງອອກມາຈາກຫ້ອງດັ່ງກ່າວ, ສ່ວນ ແມນເຊັສເຕີ ຊິຕີ້ ນັ້ນ ມິເກລ ອາເຕຕາ ທີ່ມີບາດແຜເລືອດອອກບ່ອນເບົາຕາ ກ່ອນທີ່ເຫດການດັ່ງກ່າວຈະສະຫງົບລົງ ເມື່ອເຈົ້າໜ້າທີ່ຕຳຫລວດ ແລະ ເຈົ້າໜ້າທີ່ສະໜາມມາຫ້າມ.
ຫລ້າສຸດສື່ຕ່າງປະເທດລະບຸວ່າ: ເຫດການດັ່ງກ່າວບໍ່ມີການເປີດເຜີຍຕາມການລາຍງານຂອງ ໄມເຄິລ ໂອລິເວີ ຜູ້ຕັດສິນເປັນເຫດໃຫ້ ເອັຟເອ ຕ້ອງສືບສວນຂໍ້ເທັດຈິງ ແລະ ຂີດເສັ້ນໃຫ້ທັງ 2 ສະໂມສອນ ມາຊີ້ແຈງພາຍໃນວັນທີ 13 ທັນວານີ້.
