IPhone ຕິດອັນດັບ 1 ກ້ອງທີ່ໃຊ້ຫຼາຍທີ່ສຸດໃນ Flickr

Flickr ໄດ້ເປີດເຜີຍຂໍ້ມູນສຸດຍອດກ້ອງປະຈໍາປີ 2017 ໂດຍລະບຸວ່າ IPhone ເປັນກ້ອງທີ່ຊ່າງພາບນິຍົມໃນການຖ່າຍຮູບຫຼາຍທີ່ສຸດເຖິງ 54% ຊຶ່ງຫຼາຍກວ່າກ້ອງຮູບແບບອື່ນໆ ທັງໝົດທີ່ລວມກັນ.

Flickr (ຟລິຄເກີຣ໌) ເປັນເວັບໄຊສໍາລັບເກັບຮູບພາບດິຈິຕອນ ໂດຍອັບໂຫຼດຈາກຜູ້ໃຊ້ງານ ແລະ ສາມາດແບ່ງປັນໃຫ້ຜູ້ອື່ນເບິ່ງໄດ້.

            ທາງເວັບໄຊໄດ້ໃຫ້ຂໍ້ມູນວ່າ ໂດຍປົກກະຕິແລ້ວຮູບພາບທີ່ຖືກອັບໂຫຼດລົງ Flickr  ນັ້ນ ຈະຖ່າຍດ້ວຍໂທລະສັບມືຖືເຖິງ 50% ແລະ ຖ່າຍດ້ວຍກ້ອງຖ່າຍຮູບແບບອື່ນໆຄື: DSLR, ກ້ອງ Point & Shoot (ກ້ອງຄອມແພຄສໍາລັບຖ່າຍຮູບງ່າຍໆ) ແລະ ກ້ອງ Mirrorless ເປັນຈໍານວນ 33%, 12% ແລະ 4% ຕາມລໍາດັບ.

            ເຫດຜົນໜຶ່ງທີ່ເຮັດໃຫ້ໂທລະສັບມືຖືເປັນທີ່ນິຍົມໃຊ້ໃນການຖ່າຍພາບຫຼາຍທີ່ສຸດນັ້ນ ກໍເພາະກ້ອງໃນໂທລະສັບມືຖືໄດ້ມີການພັດທະນາສັກກະຍະພາບຫຼາຍຂຶ້ນ, ມີຄວາມລະອຽດຫລາຍຂຶ້ນ, ໃຊ້ເລນ 2 ຕົວ ແລະ ປະມວນຜົນຮ່ວມກັບຊອບແວ ແລະ AI ບໍ່ວ່າຈະເປັນ Hauwei ທີ່ພັດທະນາກ້ອງຮ່ວມກັບ Leica, Pixel 2 ຂອງ Google ແລະ iPhone ຂອງ Apple.

            ທາງ Flickr ໄດ້ກ່າວວ່າ 9 ໃນ 10 ອັນດັບ ຂອງອຸປະກອນທີ່ໄດ້ຮັບຄວາມນິຍົມໃນການຖ່າຍພາບຫຼາຍທີ່ສຸດເປັນ iPhone ຮຸ່ນຕ່າງໆ ໂດຍ 3 ອັນດັບທໍາອິດຄື:  iPhone 6, iPhone 6s ແລະ iPhone 5s ຕາມລໍາດັບ ແລະ ສໍາລັບກ້ອງໜຶ່ງດຽວທີ່ບໍ່ແມ່ນໂທລະສັບມືຖືກໍຄື: Canon 5D Mark III ຊຶ່ງຢູ່ໃນອັນດັບ 9.

            ສໍາລັບກ້ອງທີ່ໄດ້ຮັບຄວາມນິຍົມຮອງຈາກ iPhone (54%) ກໍຄື: Canon (23%) ແລະ Nikon (18%) ຕາມລໍາດັບ.

            ຄວາມນິຍົມໃນການຖ່າຍພາບດ້ວຍ iPhone ນັ້ນ ເລີ່ມປະກົດໃຫ້ເຫັັນຊັດເຈນເມື່ອປີ 2015 ທີ່ Apple ສາມາດຕິດອັນດັບ 1 ຂອງ Flickr ໄດ້ດ້ວຍຈໍານວນເຖິງ 30% ແລະ ໃນປີ 2016 ກໍຍັງຕິດອັນດັບທີ 1 ເຊັ່ນກັນ ດ້ວຍຈໍານວນເຖິງ 47%.