ຫລວງພະບາງມີຫລາຍກິດຈະກຳດຶງດູດປີທ່ອງທ່ຽວລາວ 2018

ໃນງານຖະແຫລງຂ່າວ ເພື່ອນຳ ສະເໜີກິດຈະກຳຕ່າງໆ ເພື່ອດຶງດູດການທ່ອງທ່ຽວນີ້ໄດ້ ຈັດຂຶ້ນ ຢູ່ຫລວງພະບາງໃນວັນທີ 9 ທັນວານີ້, ໂດຍມີບັນດາການ ນຳຂັ້ນແຂວງ, ຜູ້ປະກອບ ການທຸລະກິດ, ທູຕານຸທູດປະຈຳ ສປປ ລາວ ເຂົ້າຮ່ວມ, ເຊິ່ງທ່ານ ວົງສະຫວັນ ເທບພະຈັນ ຮອງເຈົ້າ ແຂວງຫລວງພະບາງ, ປະທານຄະນະຊີ້ນຳປີທ່ອງທ່ຽວລາວ 2018 ກ່າວວ່າ: ເພື່ອຮອງຮັບ ປີທ່ອງທ່ຽວລາວນີ້, ຫລວງພະ ບາງໄດ້ກຳນົດຍຸດທະສາດພັດທະນາການທ່ອງທ່ຽວທຳມະຊາດ, ວັດທະນະທຳ ແລະ ປະຫວັດສາດເປັນໃຈກາງ ແລະ ມີ ການບໍລິການແບບ ຄົບວົງຈອນ ໂດຍຜ່ານໄປສູ່ບັນດາແຂວງ ພາກເໜືອຂອງລາວ ແລະ ອະນຸພາກພື້ນ.

+ ແຂວງເຊກອງມີຫລາຍກິດຈະກຳທີ່ໜ້າທ່ຽວຊົມໃນປີທ່ອງທ່ຽວ

+ ທ່ຽວຊົມວັດພະບາດແອວຂັນແລ້ວພາກັນມາຂີ່ເຮືອແພທ່າງ່ອນ

ກິດຈະກຳຕ່າງໆ ສຳລັບປີ ທ່ອງທ່ຽວລາວ 2018 ແມ່ນໄດ້ ເລີ່ມຕົ້ນແຕ່ເດືອນທັນວານີ້, ໄປ ຮອດທ້າຍປີ 2018 ປະກອບມີ 37 ກິດຈະກຳດ້ວຍກັນ ແລະ ໃນ ນີ້ລວມມີ 7 ກິດຈະກຳຫລັກຄື: ງານປະກວດຂັບລຳພື້ນເມືອງ ຫລວງພະບາງ, ງານສະເຫລີມ ສະຫລອງປີທ່ອງທ່ຽວລາວ 2018 ຢ່າງເປັນທາງການ ແລະ ບຸນປີໃໝ່ລາວ, ງານງາມແທ້ໂອ້ ຫລວງພະບາງທີ່ສະທ້ອນໃຫ້ ເຫັນຄວາມເປັນຫລວງພະບາງ, ງານເທດສະການອາຫານພື້ນ ເມືອງ, ງານວາງສະແດງສິນຄ້າຫັດຖະກຳ, ສາທິດກິດຈະກຳທີ່ ຕິດພັນກັບຊີວິດທີ່ເປັນເອກະລັກ ຂອງແຂວງ, ການສະແດງສິນ ລະປະຂອງຊົນເຜົ່າຕ່າງໆ ແລະ ງານສຳມະນາວ່າດ້ວຍການ ທ່ອງທ່ຽວແບບຍືນຍົງລະ ຫວ່າງພາກລັດ ແລະ ພາກທຸລະ ກິດໃນໂອກາດວັນທ່ອງທ່ຽວ ໂລກ, ງານທັດສະນະສຶກສາ ທ່ຽວຊົມວິຖີຊີວິດຊາວບ້ານການ ຕ່ຳຫູກທໍໃໝ, ສາທິດການຍ້ອມ ສີຜ້າແບບທຳມະຊາດບ້ານນາຍາງ, ຊິມໝາກກ້ຽງຫວານ ເມືອງນ້ຳບາກ ແລະ ທ່ຽວຊົມ ທຳມະຊາດເມືອງງອຍ, ກິດຈະ ກຳຖີບລົດເພື່ອຫລຸດຜ່ອນມົນ ລະພິດ, ງານມະໂຫລານຮູບ ເງົາຫລວງພະບາງ ແລະ ງານບູຮານ “ງານ Ancient LuangPrabang” ທີ່ເດີ່ນຕະ ຫລາດແລງ ແລະ ເຮືອນມໍລະດົກ. ນອກຈາກນັ້ນຍັງຈະມີກິດ ຈະກຳ ແລະ ບຸນປະເພນີຂອງ ບັນດາເມືອງຕ່າງໆເຊັ່ນ: ການ ທ່ອງທ່ຽວທາງດ້ານກະສິກຳ ແລະ ທຳມະຊາດທີ່ເມືອງພູຄູນ, ງານວາງສະແດງເຄື່ອງຫັດຖະ ກຳປັ້ນດິນເຜົາທີ່ເມືອງຈອມ ເພັດ, ບຸນປະເພນີກິນຈຽງຂອງ ເຜົ່າມົ້ງ ແລະ ບຸນປະເພນີຂອງ ເຜົ່າກຶມມຸ, ເຜົ່າລື້ເມືອງປາກອູ, ບຸນອອກພັນສາ ແລະ ຊ່ວງ ເຮືອ ເມືອງຊຽງເງິນ, ບຸນບັ້ງໄຟທີ່ ເມືອງນານ ແລະ ອື່ນໆອີກ, ເພື່ອ ສ້າງໃຫ້ປີທ່ອງທ່ຽວລາວ 2018 ທີ່ແຂວງຫລວງພະບາງ ມີຄວາມປະທັບໃຈ ແລະ ປະສົບຜົນສຳເລັດຈົບງາມ.