ທ່ານ ທຣໍາ ຂູ່ຂຶ້ນພາສີຈີນອີກ 50% ຖ້າບໍ່ຍົກເລີກຂຶ້ນພາສີໂຕ້ກັບ ສ່ວນຈີີນຕອບກັບ ບໍ່ຍອມຮັບແບັກເມວ ພ້ອມ “ສູ້ເຖິງທີ່ສຸດ”
ປະທານາທິບໍດີ ໂດນັລ ທຣໍາ ຂອງອາເມລິກາ ປະກາດຄໍາຂູ່ກໍານົດອັດຕາພາສີສິນຄ້ານໍາເຂົ້າຈາກຈີນເພີ່ມອີກ 50% ນັບແຕ່ວັນທີ 9 ເມສາຕາມເວລາທ້ອງຖິ່ນ ຖ້າລັດຖະບານຈີນບໍ່ຍົກເລີກການຂຶ້ນພາສີ 34% ຕໍ່ສິນຄ້າຈາກອາເມລິກາ ເພື່ອໂຕ້ກັບມາດຕະການພາສີອາກອນຕອບໂຕ້ທີ່ທ່ານ ທຣໍາ ປະກາດເມື່ອວັນທີ 2 ເມສາ.
“ຖ້າຈີນບໍ່ຖອນການປັບຂຶ້ນພາສີນໍາເຂົ້າ 34% ຈາກທີ່ລະເມີດການຄ້າມາຢ່າງຍາວນານພາຍໃນວັນທີ 8 ເມສາ 2025 ອາເມລິກາຈະເກັບພາສີນໍາເຂົ້າຈາກຈີນເພີ່ມອີກ 50% ນັບແຕ່ວັນທີ 9 ເມສາ. ນອກຈາກນີ້ ການເຈລະຈາກັບຈີນທັງໝົດກ່ຽວກັບກອງປະຊຸມທີ່ຈີນຮ້ອງຂໍຈະສິ້ນສຸດລົງ!” ທ່ານ ທຣໍາ ໂພສຂໍ້ຄວາມຜ່ານ Truth Social ວັນທີ 7 ເມສາ.
ທັງນີ້, ທ່ານ ທຣໍາ ກໍານົດພາສີອາກອນຕອບໂຕ້ສໍາລັບຈີີນ 34% ໂດຍເພີ່ມຈາກ 20% ທີ່ບັງຄັບໃຊ້ໄປໃນເດືອນມີນາ ເຊິ່ງຈາກປະກາດຫລ້າສຸດ ຖ້າບັງຄັບໃຊ້ແທ້ ຈະສົ່ງຜົນເຮັດໃຫ້ສິນຄ້າຈາກຈີນທີ່ນໍາເຂົ້າອາເມລິກາອາດຕ້ອງເສຍພາສີສູງເຖິງ 104%.
ຂະນະທີ່ທ່ານ ທຣໍາ ກ່າວຢູ່ທໍານຽບຂາວໃນວັນທີ 7 ເມສານີ້ ຢືນຢັນວ່າຈະບໍ່ພິຈາລະນາຢຸດການບັງຄັບໃຊ້ພາສີອາກອນຕອບໂຕ້ ເພື່ອເປີດທາງໃຫ້ມີການເຈລະຈາກັບປະເທດຕ່າງໆ.
“ເຮົາບໍ່ໄດ້ສົນໃຈເລື່ອງນັ້ນ ເຮົາມີປະເທດຕ່າງໆທີ່ກຽມເຈລະຈາຂໍ້ຕົກລົງກັບເຮົາ ແລະ ຈະມີຂໍ້ຕົກລົງທີ່ເປັນທໍາ”.
ຈີນພ້ອມ “ສູ້ເຖິງທີ່ສຸດ”
ກະຊວງການຄ້າຈີນ ປະກາດຈະບໍ່ຍອມຮັບການແບັກເມວຂອງອາເມລິກາໂດຍເດັດຂາດ ແລະ ໃຫ້ຄໍາໝັ້ນວ່າຈະຕໍ່ສູ້ກັບການຂຶ້ນພາສີຂອງທ່ານ ທຣໍາ “ຈົນເຖິງທີ່ສຸດ”.
ຂະນະທີ່ຊີ້ວ່າ: ຄໍາຂູ່ຂຶ້ນພາສີສິນຄ້າຈີນເພີ່ມອີກ 50% ຂອງທ່ານ ທຣໍາ ຖືເປັນ “ຄວາມຜິດພາດທີ່ທັບຊ້ອນຄວາມຜິດພາດ” ແລະ ຮຽກຮ້ອງໃຫ້ຜູ້ນໍາອາເມລິກາຍົກເລີກແຜນຂຶ້ນພາສີນໍາເຂົ້າທັງໝົດ ແລະ ໃຫ້ແກ້ໄຂຄວາມແຕກຕ່າງລະຫວ່າງອາເມລິກາ ແລະ ຈີນຜ່ານການເຈລະຈາ.
ປະກາດຂອງທ່ານ ທຣໍາ ສົ່ງຜົນເຮັດໃຫ້ຕະຫລາດຫຸ້ນທົ່ວໂລກຜັນຜວນຫລາຍ ເນື່ອງຈາກນັກລົງທຶນກັງວົນວ່າມາດຕະການພາສີຕອບໂຕ້ຂອງທ່ານ ທຣໍາ ອາດສົ່ງຜົນເຮັດໃຫ້ລາຄາສິນຄ້າສູງຂຶ້ນ. ຂະນະທີ່ຄວາມຕ້ອງການຊື້ຫລຸດລົງ ເຊິ່ງອາດນໍາໄປສູ່ການເກີດສະພາບເສດຖະກິດຫລຸດຖອຍທົ່ວໂລກ.
ໂດຍມູນຄ່າຕະຫລາດຫຸ້ນອາເມລິກາຫລຸດລົງຢ່າງໜັກຫລັງເປີດຕະຫລາດວັນທີ 7 ເມສາ. ຂະນະທີ່ຕະຫລາດຫຸ້ນເອີຣົບ ລວມທັງ FTSE 100 ຂອງລອນດອນ ປິດຕະຫລາດຫລຸດລົງຫລາຍກວ່າ 4%.
ສ່ວນດັດຊະນີຫຸ້ນອາຊີຫລຸດລົງຢ່າງໜັກ ໂດຍດັດຊະນີ Hang Seng ຂອງຮົງກົງຫລຸດລົງຫລາຍກວ່າ 13% ຖືເປັນການຫລຸດລົງໃນມື້ດຽວຄັ້ງໃຫຍ່ທີ່ສຸດນັບແຕ່ປີ 1997.
ອ້າງອີງ:
- https://apnews.com/article/trump-tariffs-stock-market-52a00ea2bb92a067ee72343941b02cd4
- https://www.channelnewsasia.com/world/trump-threat-tariffs-china-global-markets-trade-war-5049726
- https://www.bbc.com/news/live/cp8vyy35g3mt
