20 ອັນດັບສິນຄ້າທີ່ໄດ້ຮັບຜົນກະທົບຈາກພາສີທ່ານ ທຣໍາ ໜັກສຸດ
ສໍານັກຂ່າວ CNBC ລາຍງານວ່າ: ການປະກາດຂຶ້ນພາສີສິນຄ້ານໍາເຂົ້າຈາກທົ່ວໂລກຂອງທ່ານ ໂດນັລ ທຣໍາ ມີທ່າອ່ຽງຈະດັນໃຫ້ລາຄາສິນຄ້າຫລາຍຊະນິດປັບສູງຂຶ້ນ, ຂະນະທີ່ລາຄາສິນຄ້າບາງປະເພດເຊັ່ນ: ເຄື່ອງໜັງ ອາດຖີບຕົວສູງໜັກກວ່າສິນຄ້າອື່ນໆ.
ນັກເສດຖະສາດຄາດຄະເນວ່າ: ຜົນກະທົບຕໍ່ພາກຄົວເຮືອນນັ້ນຈະແຕກຕ່າງກັນໄປຂຶ້ນຢູ່ກັບພຶດຕິກໍາການໃຊ້ຈ່າຍຂອງແຕ່ລະຄອບຄົວ, ແຕ່ຖ້າເບິ່ງໃນພາບໃຫຍ່ຈະເຫັນວ່າຫລາຍຄອບຄົວ ໂດຍສະເພາະກຸ່ມທີ່ມີລາຍໄດ້ໜ້ອຍຈະໄດ້ຮັບຜົນກະທົບໃນລະດັບໜຶ່ງ.
ບົດວິເຄາະຂອງ Budget Lab ຈາກ Yale University ລະບຸວ່າ: ໂດຍສະເລ່ຍແລ້ວ ແຕ່ລະຄອບຄົວຈະສູນເສຍອໍານາດຊື້ປະມານ 3,800 ໂດລາສະຫະລັດຕໍ່ປີ ອັນເປັນຜົນຈາກນະໂຍບາຍພາສີຂອງທ່ານ ທຣໍາ ແລະ ນະໂຍບາຍຕອບໂຕ້ຂອງປະເທດຕ່າງໆທີ່ອອກມາໃນໄລຍະນີ້. ພ້ອມໝາຍເຫດວ່າ: ການວິເຄາະດັ່ງກ່າວຍັງບໍ່ໄດ້ລວມພາສີຕອບໂຕ້ 34% ທີ່ຈີນຫາກໍປະກາດໃຊ້ຕໍ່ສິນຄ້າສົ່ງອອກທັງໝົດຂອງອາເມລິກາໃນອາທິດຜ່ານມາ ເຊິ່ງຈະມີຜົນບັງຄັບໃຊ້ໃນວັນທີ 10 ເມສານີ້.
ທັງນີ້, ມູນຄ່າການສົ່ງອອກສິນຄ້າຂອງອາເມລິກາໄປຈີນໃນປີ 2024 ມີເກືອບ 1.4 ແສນລ້ານໂດລາ ໂດຍຈີນຖືເປັນຕະຫລາດສົ່ງອອກໃຫຍ່ເປັນອັນດັບ 3 ຂອງອາເມລິກາ ຮອງຈາກການາດາ ແລະ ແມັກຊິກ.
ສິ່ງທີ່ໜ້າສົນໃຈຄືອຸດສາຫະກໍາເຄື່ອງນຸ່ງຫົ່ມເປັນໜຶ່ງໃນກຸ່ມທີ່ໄດ້ຮັບຜົນກະທົບຈາກນະໂຍບາຍພາສີສູງ ໂດຍຄາດຄະເນວ່າລາຄາເສື້ອຜ້າ, ເກີບ, ຖົງມື, ກະເປົາ, ຜ້າຂົນສັດ ແລະ ຜ້າໄໝ ຈະເພີ່ມຂຶ້ນປະມານ 10-20%. ເຖິງຢ່າງໃດກໍຕາມ, ນັກວິເຄາະບາງສ່ວນຄາດຄະເນວ່າ: ການປັບຂຶ້ນຂອງລາຄາສິນຄ້າບາງປະເພດຈະບໍ່ໄດ້ເປັນໄປແບບປຸບປັບ ອາດໃຊ້ເວລາ 5 ປີ ຫລື ຫລາຍກວ່ານັ້ນຈຶ່ງຈະເກີດຂຶ້ນ ໂດຍເສື້ອຜ້າ ແລະ ເກີບສ່ວນຫລາຍທີ່ຂາຍຢູ່ອາເມລິກາຜະລິດຂຶ້ນໃນປະເທດຈີນ, ຫວຽດນາມ, ສີລັງກາ ແລະ ບັງກະລາແດດ ທີ່ຕ່າງຖືກພາສີຕອບໂຕ້ສູງຈາກທ່ານ ທຣໍາ.
ນອກຈາກນີ້, Budget Lab ຍັງວິເຄາະອີກວ່າ: ລາຄາຍານພາຫະນະ ແລະ ຊິ້ນສ່ວນລົດອາດເພີ່ມສູງຂຶ້ນກວ່າ 8%, ສ່ວນ Bank of Americal ປະເມີນວ່າ: ລາຄາລົດໃໝ່ອາດເພີ່ມຂຶ້ນເຖິງ 10,000 ໂດລາສະຫະລັດ ຖ້າຜູ້ຜະລິດລົດເລືອກໃຫ້ຜູ້ບໍລິໂພກຕ້ອງແບກຮັບຜົນກະທົບທັງໝົດຈາກນະໂຍບາຍພາສີຕອບໂຕ້.
ແລະ ນີ້ຄື 20 ອັນດັບສິນຄ້າທີ່ຄາດວ່າຈະໄດ້ຮັບຜົນກະທົບສູງສຸດ ລຽງຈາກຫລາຍຫາໜ້ອຍ.
- ຜະລິດຕະພັນເຄື່ອງໜັງ: ລາຄາເພີ່ມ 18.3%
- ເຄື່ອງແຕ່ງກາຍ: ລາຄາເພີ່ມ 16.9%
- ພືດຜົນ: ລາຄາເພີ່ມ 13.3%
- ໂລຫະ: ລາຄາເພີ່ມ 12.3%
- ຂົນສັດ/ໄໝ: ລາຄາເພີ່ມ 10.9%
- ເຂົ້າແປຮູບ: ລາຄາເພີ່ມ 10.3%
- ເຄື່ອງໃຊ້ໄຟຟ້າ: ລາຄາເພີ່ມ 10%
- ເຄື່ອງຕັດຫຍິບ: ລາຄາເພີ່ມ 9.6%
- ຍານພາຫະນະ ແລະ ສ່ວນປະກອບ: ລາຄາເພີ່ມ 8.4%
- ເຄື່ອງຈັກ ແລະ ອຸປະກອນ: ລາຄາເພີ່ມ 6.6%
- ໂລຫະເຫລັກ/ເຫລັກກ້າ: ລາຄາເພີ່ມ 6.5%
- ຜະລິດຕະພັນຢາງ ແລະ ປລາສຕິກ: ລາຄາເພີ່ມ 6.4%
- ຜະລິດຕະພັນຈາແຮ່ (ແກ້ວ, ຊີມັງ): ລາຄາເພີ່ມ 6.4%
- ອຸປະກອນການຂົນສົ່ງ (ລົດຖີບ, ລົດຈັກ): ລາຄາເພີ່ມ 6%
- ຜະລິດຕະພັນຈາກໂລຫະ (ບ່ວງສ້ອມ, ນັອດ, ສະກູ ແລະ ອື່ນໆ): ລາຄາເພີ່ມ 5.8%
- ອຸດສາຫະກໍາການຜະລິດ (ເຄື່ອງປະດັບ, ອຸປະກອນກິລາ, ອຸປະກອນທາງການແພດ ແລະ ອື່ນໆ): ລາຄາເພີ່ມ 4.8%
- ຄອມພິວເຕີ, ເອເລັກໂຕຣນິກ + ອຸປະກອນອອບຕິກ: ລາຄາເພີ່ມ 4.5%
- ການປະມົງ: ລາຄາເພີ່ມ 4%
- ຜັນ, ໝາກໄມ້, ຖົ່ວ: ລາຄາເພີ່ມ 4%
- ຜະລິດຕະພັນຈາກໄມ້: ລາຄາເພີ່ມ 3.3%
ອ້າງອີງ:
