ສ.ເກົາຫລີ ກຽມຈັດການເລືອກຕັ້ງປະທານາທິບໍດີຄົນໃໝ່ 3 ມິຖຸນານີ້
ສ.ເກົາຫລີ ຕັດສິນໃຈຈັດການເລືອກຕັ້ງປະທານາທິບໍດີໃນວັນທີ 3 ມິຖຸນານີ້ ເພື່ອເລືອກຕັ້ງຜູ້ສືບຕໍ່ຕໍາແໜ່ງຈາກທ່ານ ຢຸນຊອກຢໍ ອະດີດປະທານາທິບໍດີ ສ.ເກົາຫລີ ທີ່ສານລັດຖະທໍາມະນູນຫາກໍມີມະຕິຖອດຖອນຈາກຕໍາແໜ່ງຜູ້ນໍາປະເທດໃນທ້າຍອາທິດຜ່ານມານີ້.
ໂດຍທ່ານ ຮັນດ໊ອກຊູ ນາຍົກລັດຖະມົນຕີ ສ.ເກົາຫລີ ທີ່ກໍາລັງຮັກສາການຕໍາແໜ່ງປະທານາທິບໍດີມີແຜນຈະຢືນຢັນກໍານົດດັ່ງກ່າວໃນກອງປະຊຸມຄະນະລັດຖະບານທີ່ມີກໍານົດຈັດຂຶ້ນໃນວັນທີ 8 ເມສານີ້.
ຕາມກົດໝາຍ ສ.ເກົາຫລີ ການເລືອກຕັ້ງປະທານາທິບໍດີຈະຕ້ອງຈັດຂຶ້ນພາຍໃນ 60 ວັນຫລັງຈາກສານລັດຖະທໍາມະນູນມີມະຕິຖອດຖອນທ່ານ ຢຸນຊອກຢໍ ອອກຈາກຕໍາແໜ່ງ ເນື່ອງຈາກຄວາມພະຍາຍາມໃນການປະກາດກົດໄອຍະການເສິກເມື່ອທ້າຍປີ 2024 ໂດຍກ່ອນໜ້ານີ້ ສ.ເກົາຫລີ ເຄີຍຈັດການເລືອກຕັ້ງຂຶ້ນພາຍໃນ 60 ວັນມາແລ້ວເຊັ່ນກັນໃນປີ 2017 ຈາກກໍລະນີທີ່ທ່ານ ນາງ ພັກກີນເຮ ໄດ້ຮັບມະຕິໃຫ້ຖືກຖອດຖອນຈາກຕໍາແໜ່ງ ເນື່ອງຈາກພົວພັນຄະດີທຸຈະລິດ ແລະ ໃຊ້ອໍານາດໂດຍບໍ່ຖືກຕ້ອງ.
ຄະນະກໍາມະການການເລືອກຕັ້ງແຫ່ງຊາດ ສ.ເກົາຫລີ (NEC) ເລີ່ມເປີດໃຫ້ຜູ້ສະໝັກລົງທະບຽນລ່ວງໜ້າແລ້ວ ຖ້າກໍານົດດັ່ງກ່າວໄດ້ຮັບການຢືນຢັນ ຜູ້ສະໝັກຈະຕ້ອງລົງທະບຽນພາຍໃນວັນທີ 11 ພຶດສະພາ ແລະ ໄລຍະເວລາຫາສຽງຢ່າງເປັນທາງການຈະເລີ່ມຂຶ້ນໃນວັນທີ 12 ພຶດສະພາເປັນຕົ້ນໄປ. ຂະນະທີ່ລັດຖະກອນ ຫລື ເຈົ້າໜ້າທີ່ລັດຕ້ອງການລົງສະໝັກຮັບເລືອກຕັ້ງເປັນປະທານາທິບໍດີຈະຕ້ອງລາອອກຈາກຕໍາແໜ່ງເກົ່າຢ່າງໜ້ອຍ 30 ວັນກ່ອນວັນເລືອກຕັ້ງ ເຮັດໃຫ້ຈະຕ້ອງລາອອກພາຍໃນວັນທີ 4 ພຶດສະພາ.
ປະທານາທິບໍດີທີ່ໄດ້ຮັບເລືອກຕັ້ງໃໝ່ຈະເຂົ້າຮັບຕໍາແໜ່ງທັນທີ ຫລັງຈາກປະກາດຜົນການເລືອກຕັ້ງ ໂດຍບໍ່ມີການຈັດຕັ້ງທີມຖ່າຍໂອນອໍານາດ ເພື່ອໃຫ້ ສ.ເກົາຫລີ ພົ້ນຈາກສະພາບຢຸດສະງັກທາງການເມືອງໄດ້ໂດຍໄວທີ່ສຸດ.
ອ້າງອີງ:
- https://en.yna.co.kr/view/AEN20250407002052315
- https://www.japantimes.co.jp/news/2025/04/07/asia-pacific/politics/south-korea-cabinet-election-date/
- https://www.reuters.com/world/asia-pacific/south-korea-tentatively-sets-presidential-election-june-3-yonhap-says-2025-04-07/
