ທ່ານ ທຣໍາ ປະກາດເດີນໜ້າເກັບພາສີນໍາເຂົ້າ ເຖິງວ່າທົ່ວໂລກກັງວົນຜົນກະທົບເສດຖະກິດ-ຫຸ້ນຕົກ
ທ່ານ ໂດນັລ ທຣໍາ ປະທານາທິບໍດີອາເມລິກາ ປະກາດເດີນໜ້າເກັບພາສີນໍາເຂົ້າຢ່າງເດັດຂາດ ເຖິງວ່າທົ່ວໂລກຈະກັງວົນເຖິງຜົນກະທົບທາງເສດຖະກິດ ແລະ ຕະຫລາດຫຸ້ນຈະຫລຸດລົງ ໂດຍທ່ານ ທຣໍາ ເນັ້ນວ່າ: ການເກັບພາສີເປັນຢາຂົມທີ່ຈໍາເປັນ ເພື່ອຟື້ນຟູເສດຖະກິດ ແລະ ດຶງການລົງທຶນ-ການຈ້າງວຽກກັບຄືນສູ່ອາເມລິກາ.
ຕະຫລາດຫຸ້ນທົ່ວໂລກຫລຸດລົງໜັກ ຫລັງປະກາດມາດຕະການຂຶ້ນພາສີນໍາເຂົ້າຮອບໃໝ່ ໂດຍ JP Morgan ຄາດວ່າ: ມີໂອກາດ 60% ທີ່ອາເມລິກາ ແລະ ໂລກຈະເຂົ້າສູ່ສະພາບເສດຖະກິດຫລຸດຖອຍ ເພາະມາດຕະການພາສີທຣໍາ 2.0.
ຂະນະທີ່ທ່ານ ທຣໍາ ແລະ ທີມເສດຖະກິດອາເມລິກາ ປະຕິເສດຄວາມສ່ຽງທີ່ເສດຖະກິດຈະຫລຸດຖອຍ. ພ້ອມລະບຸວ່າ: ມາດຕະການທາງດ້ານພາສີຊ່ວຍສ້າງອໍານາດຕໍ່ລອງໃຫ້ອາເມລິກາ ເຊິ່ງປັດຈຸບັນມີຢ່າງໜ້ອຍ 50 ປະເທດຕິດຕໍ່ມາຂໍເຈລະຈາການຄ້າໃນໄລຍະມໍ່ໆນີ້ ໂດຍອາເມລິກາຈະຍັງເດີນໜ້າມາດຕະການພາສີຕອບໂຕ້ (Reciprocal Tariffs) ຕໍ່ບັນດາປະເທດຄູ່ຄ້າທີ່ອາເມລິກາເບິ່ງວ່າມີການປະຕິບັດທີ່ບໍ່ເປັນທໍາ ໃນວັນທີ 9 ເມສານີ້.
ທ່ານ ສະກ໊ອດ ເບສເຊນ ລັດຖະມົນຕີກະຊວງການເງິນອາເມລິກາ ແລະ ທ່ານ ຮາວເວິດ ລັດນິກ ລັດຖະມົນຕີກະຊວງການຄ້າ ອອກມາປົກປ້ອງນະໂຍບາຍການຄ້າທີ່ເນັ້ນປົກປ້ອງອາເມລິກາຂອງທ່ານ ທຣໍາ. ພ້ອມລະບຸວ່າ: ມາດຕະການທາງດ້ານພາສີເຫລົ່ານີ້ຄືຄວາມພະຍາຍາມໃນການປ່ຽນແປງລະບົບການຄ້າໂລກ ໂດຍຢືນຢັນວ່າຈະບໍ່ມີການເລື່ອນເກັບພາສີນໍາເຂົ້າແຕ່ຢ່າງໃດ.
ທ່າທີຂອງລັດຖະບານທຣໍາ 2.0 ເຮັດໃຫ້ແຮງກົດດັນທາງການເມືອງເພີ່ມສູງຂຶ້ນ ເລີ່ມມີຜູ້ຊຸມນຸມປະທ້ວງຕໍ່ຕ້ານແນວທາງການບໍລິຫານປະເທດຂອງທ່ານ ທຣໍາ ອອກມາເຄື່ອນໄຫວຕາມຖະໜົນ. ຂະນະທີ່ທ່ານ ເຈີໂຣມ ພາວເວລ ປະທານທະນາຄານກາງອາເມລິກາ (Fed) ເຕືອນວ່າ: ມາດຕະການທາງພາສີເຫລົ່ານີ້ອາດເຮັດໃຫ້ເກີດສະພາບເງິນເຟີ້ສູງຂຶ້ນ ແລະ ການເຕີບໃຫຍ່ຊ້າລົງ.
ອ້າງອີງ:
- https://www.ft.com/content/a6b7b682-e712-4eb3-9e06-9d95e23170a0
- https://www.bbc.com/news/articles/c2093qgx14po
- https://www.bbc.com/news/live/ce3qnyr7y94t
