ປ່ຽນຄະນະບໍລິຫານງານ ຄພລ ຊຸດທີ III ຮັບໜ້າທີ່ລະຫວ່າງປີ 2017-2020
ຄະນະບໍລິຫານງານ ຄະນະກໍາມະການພາລາແລັມປິກແຫ່ງຊາດ (ຄພລ) ຊຸດທີ III ໄດ້ຮັບການແຕ່ງຕັ້ງຢ່າງເປັນທາງການ ເມື່ອວັນທີ 11 ທັນວາ ທີ່ຫ້ອງປະຊຸມຄະນະກໍາມະການໂອແລັມປິກແຫ່ງຊາດລາວ ໃຫ້ກຽດເຂົ້າຮ່ວມໂດຍທ່ານນາງ ແສງເດືອນ ຫລ້າຈັນທະບູນ ລັດຖະມົນຕີກະຊວງສຶກສາທິການ ແລະ ກິລາ, ທ່ານ ບົວລານ ສິລິປັນຍາ ຮອງລັດຖະມົນຕີກະຊວງສຶກສາທິການ ແລະ ກິລາ ແລະ ທ່ານ ສີທາດ ຈັນທະບູລີ ຫົວໜ້າກົມກິລາມວນຊົນ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມຢ່າງພ້ອມພຽງ.
ໂອກາດດັ່ງກ່າວ, ທ່ານນາງ ແສງເດືອນ ຫລ້າຈັນທະບູນ ລັດຖະມົນຕີກະຊວງສຶກສາທິການ ແລະ ກິລາ ກ່າວໃນພິທີວ່າ: ໂດຍປະຕິບັດຕາມລັດຖະທໍາມະນູນຂອງຄະນະກໍາມະການພາລາແລັມປິກແຫ່ງຊາດລາວ ແລະ ສອດຄ່ອງກັບລັດຖະທໍາມະນູນຂອງຄະນະກໍາມະການພາລາແລັມປິກສາກົນ (IPC) ແລະ ພາລາແລັມປິກອາຊີ ທີ່ການປະຕິບັດງານແຕ່ລະຄັ້ງຈະມີຮອບວຽນ 4 ປີ. ດັ່ງນັ້ນ ຈຶ່ງມີການແຕ່ງຕັ້ງຄະນະບໍລິການງານ ຄພລ ຊຸດໃໝ່ ກໍຄືຊຸດທີ III ຢ່າງເປັນທາງການ.
ເຊິ່ງໃນພິທີດັ່ງກ່າວ ໄດ້ຕົກລົງເຫັນດີເລືອກທ່ານນາງ ແສງເດືອນ ຫລ້າຈັນທະບູນ ລັດຖະມົນຕີກະຊວງສຶກສາທິການ ແລະ ກີລາ ຂຶ້ນມາຮັບໜ້າທີ່ປະທານ ຄພລ ຄົນໃໝ່ ໂດຍກ່າວຮັບວ່າ: ການຮັບໜ້າທີ່ນີ້ຖືວ່າເປັນສິ່ງທີ່ມີກຽດແກ່ພວກເຮົາ ແລະ ຈະພ້ອມຈິດພ້ອມໃຈ, ສຸມທຸກສະຕິປັນຍາ, ເຫື່ອແຮງ, ເວລາ ເພື່ອປະຕິບັດໜ້າທີ່, ພາລະກິດຂອງຂະບວນການກິລາພາລາແລັມປິກຕາມຍຸດທະສາດ, ແຜນການ ແລະ ເປົ້າໝາຍທີ່ວາງໄວ້ ແຕ່ນີ້ຮອດປີ 2020. ຂໍໃຫ້ບັນດາທ່ານ, ການຈັດຕັ້ງກິລາທີ່ກ່ຽວຂ້ອງທຸກພາກສ່ວນ ຕະຫຼອດຮອດຜູ້ໃຫ້ການສະໜັບສະໜູນ ຈົ່ງສືບຕໍ່ອູ້ມຊູ ແລະ ໃຫ້ການຮ່ວມມືໃນການປະຕິບັດພາລະກິດອັນມີກຽດນີ້ຕໍ່ໄປ.
ສໍາລັບຄະນະບໍລິຫານງານ ຄພລ ຊຸດເກົ່າ (ຊຸດທີ II) ນັບແຕ່ປີ 2005 ຈົນເຖິງປີ 2017 ໂດຍທ່ານ ບົວລານ ສິລິປັນຍາ ຮອງປະທານຄະນະກໍາມະການກິລາແຫ່ງຊາດໃນເມື່ອກ່ອນ ແລະ ເປັນຮອງລັດຖະມົນຕີກະຊວງສຶກສາທິການ ແລະ ກິລາໃນປັດຈຸບັນ ເປັນປະທານ ກ່ອນຈະມອບຕໍາແໜ່ງຕໍ່ໃຫ້ກັບ ທ່ານນາງ ແສງເດືອນ ຫລ້າຈັນທະບູນ ລັດຖະມົນຕີກະຊວງສຶກສາທິການ ແລະ ກິລາ ເປັນປະທານຊຸດໃໝ່ (ຊຸດທີ III) ແລະ ມີຄະນະບໍລິຫານງານອີກ 20 ທ່ານຮ່ວມປະຕິບັດວາລະແຕ່ນີ້ຮອດປີ 2020.
