ການາດາຂຶ້ນພາສີ 25% ກັບລົດອາເມລິກາທີ່ບໍ່ໄດ້ຢູ່ໃນຂໍ້ຕົກລົງການຄ້າເສລີ
ລັດຖະບານການາດາປະກາດຂຶ້ນພາສີ 25% ກັບລົດຂອງອາເມລິກາ ເຊິ່ງບໍ່ໄດ້ຢູ່ພາຍໃຕ້ກົດລະບຽບຂອງຂໍ້ຕົກລົງການຄ້າເສລີຮ່ວມກັນ.
ນາຍົກລັດຖະມົນຕີ ມາກ ຄານີ ຜູ້ນໍາການາດາ ປະກາດຂຶ້ນພາສີ 25% ກັບລົດທຸກປະເພດທີ່ສົ່ງອອກມາຈາກອາເມລິກາ ແລະ ບໍ່ໄດ້ຢູ່ພາຍໃຕ້ເງື່ອນໄຂ ຫລື ກົດເກນຂອງຂໍ້ຕົກລົງການຄ້າໄຕພາຄີອາເມລິກາ-ແມັກຊິກ-ການາດາ ຫລື USMCA.
ມາດຕະການດັ່ງກ່າວມີມູນຄ່າປະມານ 35,600 ລ້ານໂດລາການາດາ ແລະ ຈະມີຜົນບັງຄັບໃຊ້ໃນມໍ່ໆນີ້.
ເຖິງວ່າບໍ່ໄດ້ມີຊື່ຢູ່ໃນມາດຕະການພາສີຕ່າງຕອບແທນຂອງອາເມລິກາ, ແຕ່ການາດາ ແລະ ແມັກຊິກຜະເຊີນມາດຕະການພາສີ 25% ກັບສິນຄ້າເກືອບທຸກປະເພດຢູ່ແລ້ວ ລວມທັງເຫລັກ, ອາລູມີນຽມ ແລະ ຍານພາຫະນະ.
ຂະນະທີ່ສື່ທ້ອງຖິ່ນຫລາຍແຫ່ງຂອງການາດາປະເມີນວ່າ: ມາດຕະການພາສີຕອບໂຕ້ຂອງການາດາຄັ້ງນີ້ຈະສົ່ງຜົນກະທົບຕໍ່ລົດສ່ວນບຸກຄົນ ແລະ ລົດບັນທຸກຂະໜາດນ້ອຍ ເຊິ່ງມີຊິ້ນສ່ວນຜະລິດຢູ່ອາເມລິກາເໜືອບໍ່ເຖິງ 75%.
ປັດຈຸບັນ, ອາເມລິກາສົ່ງອອກລົດມາການາດາປະມານປີລະ 67,000 ຄັນ ຫລື ປະມານ 10% ຂອງລົດທັງໝົດທີ່ມີການສົ່ງອອກຈາກອາເມລິກາ.
