ລັດຖະບານມຽນມາປະກາດຢຸດຍິງຊົ່ວຄາວ ເພື່ອຊ່ວຍເຫລືອຜູ້ປະສົບໄພແຜ່ນດິນໄຫວ
ລັດຖະບານມຽນມາປະກາດຢຸດຍິງຊົ່ວຄາວຈົນຮອດວັນທີ 22 ເມສາ ເພື່ອຊ່ວຍເຫລືອຜູ້ປະສົບໄພຈາກແຜ່ນດິນໄຫວຮຸນແຮງຂະໜາດ 7.7 ໃນວັນທີ 28 ມີນາຜ່ານມາ ເຊິ່ງມີຜູ້ເສຍຊີວິດແລ້ວ 3,000 ກວ່າຄົນ, ບາດເຈັບອີກ 4,500 ກວ່າຄົນ ແລະ ຍັງມີຜູ້ສູນຫາຍອີກຫລາຍຮ້ອຍຊີວິດ.
ຂະນະທີ່ລັດຖະບານເອກະພາບແຫ່ງຊາດ (NUG) ເຊິ່ງເປັນຝ່າຍຕໍ່ຕ້ານລັດຖະບານທະຫານ ໄດ້ປະກາດຢຸດໂຈມຕີຝ່າຍກົງກັນຂ້າມເປັນເວລາ 2 ອາທິດ ນັບແຕ່ວັນທີ 30 ມີນາເປັນຕົ້ນໄປ ເພື່ອອໍານວຍຄວາມສະດວກໃນການຊ່ວຍເຫລືອຜູ້ປະສົບໄພເຊັ່ນດຽວກັນ.
ຫລາຍພື້ນທີ່ປະສົບໄພກໍາລັງຂາດເຂີນຢາ ແລະ ນໍ້າສະອາດ. ໂຄສົກເລຂາທິການສະຫະປະຊາຊາດລະບຸວ່າ: ປະຊາຊົນຊາວມຽນມາ 300,000 ຄົນ ສະເພາະຢູ່ນະຄອນຫລວງເນປີດໍ ເມືອງຫລວງຂອງມຽນມາກໍາລັງຕ້ອງການການຊ່ວຍເຫລືອ. ຂະນະທີ່ທີມກູ້ໄພຈາກຕ່າງປະເທດຍັງເດີນໜ້າຄົ້ນຫາຜູ້ລອດຊີວິດຢ່າງຕໍ່ເນື່ອງ ເຖິງວ່າຈະຜ່ານມາເກືອບ 1 ອາທິດແລ້ວ.
ເຖິງຢ່າງໃດກໍຕາມ, ແອມເນສຕີ້ ອິນເຕີເນຊັນແນລ ລາຍງານວ່າ: ກອງທັບມຽນມາຍັງໂຈມຕີທາງອາກາດຕໍ່ໄປພາຍຫລັງເກີດແຜ່ນດິນໄຫວ. ອີກທັງຫລາຍພື້ນທີ່ຂອງມຽນມາຢູ່ນອກການຄວບຄຸມຂອງລັດຖະບານທະຫານ ເນື່ອງຈາກຖືກປົກຄອງໂດຍກຸ່ມກະບົດຊາດພັນ ເຮັດໃຫ້ການປະເມີນສະຖານະການຕ່າງໆເຮັດໄດ້ຍາກຍິ່ງຂຶ້ນ.
ໂດຍສື່ທ້ອງຖິ່ນມຽນມາຄື MRTV ລາຍງານວ່າ: ພົນເອກອາວຸໂສ ມິນອ່ອງຫລ່າຍ ປະທານສະພາບໍລິຫານແຫ່ງລັດ (SAC) ແລະ ນາຍົກລັດຖະມົນຕີມຽນມາ ຈະເດີນທາງເຂົ້າຮ່ວມກອງປະຊຸມຜູ້ນໍາ BIMSTEC ຄັ້ງທີ 6 ໃນວັນທີ 4 ເມສານີ້ ຢູ່ປະເທດໄທ ໂດຍເນັ້ນຈະຫາລືກ່ຽວກັບການຮັບມືແຜ່ນດິນໄຫວຄັ້ງໃຫຍ່ທີ່ເກີດຂຶ້ນ ທ່າມກາງສຽງຄັດຄ້ານຈາກບັນດາອົງກອນດ້ານສິດທິມະນຸດທີ່ຮຽກຮ້ອງໃຫ້ໄທປະຕິເສດບໍ່ໃຫ້ຜູ້ນໍາທະຫານມຽນມາເຂົ້າຮ່ວມກອງປະຊຸມລະດັບພາກພື້ນໃນຄັ້ງນີ້.
ອ້າງອີງ:
- https://edition.cnn.com/2025/04/02/asia/myanmar-earthquake-ceasefire-military-intl?cid=ios_app
- https://apnews.com/article/myanmar-thailand-earthquake-a5ce6c6bd211eba0df4a1e0bf6808a43
- https://www.npr.org/2025/04/03/nx-s1-5350471/myanmar-ceasefire-earthquake
