ທ່ານ ໂດນັລ ທຣໍາ ປະກາດ ຂຶ້ນພາສີສິນຄ້ານໍາເຂົ້າຈາກຫລາຍປະເທດທົ່ວໂລກ ສປປ ລາວ ຕິດຕິດອັນດັບ 2 ສູງເຖິງ 48%
ສຳນັກຂ່າວຕ່າງປະເທດລາຍງານຈາກນະຄອນຫລວງວໍຊິງຕັນ ຂອງສະຫະລັດອາເມລິກາ ໃນວັນທີ 2 ເມສາ 2025 ຕາມເວລາທ້ອງຖິ່ນວ່າ: ທ່ານໂດນັລ ທຣຳ ປະທານາທິບໍດີ ສະຫະລັດ ອາເມລິກາ ໄດ້ປະກາດມາດຕະການເກັບພາສີສິນຄ້ານໍາເຂົ້າຂັ້ນຕ່ຳ 10% ແລະ ສູງເຖິງ 49% ຈາກຫລາຍປະເທດທົ່ວໂລກ, ຈະເລີ່ມມີຜົນບັງຄັບໃຊ້ໃນວັນທີ 5 ເມສາ 2025ນີ້ ແລະ ສໍາລັບປະເທດທີ່ສະຫະລັດເຫັນວ່າເກັບພາສີ ຫລື ມີມາດຕະການທາງການຄ້າ ແບບບໍ່ເປັນທໍາ ຈະຖືກເກັບພາສີຕອບໂຕ້ (Reciprocal Tariff) ທີ່ສູງຂຶ້ນ, ເຊິ່ງຈະມີຜົນວັນທີ 9 ເມສາ 2025.
ໂດຍທ່ານ ທຣໍາ ກ່າວວ່າ ຈະເລີ່ມຕົ້ນ “ຍຸກທອງຄໍາ” ໃຫ້ອາເມລິກາ, ຮອດເວລາແລ້ວທີ່ສະຫະລັດອາເມລິກາຈະຕ້ອງ “ຈະເລີນຮຸ່ງເຮືອງ” ໂດຍຈະເລີ່ມເກັບພາສີນໍາເຂົ້າລົດຈາກຕ່າງປະເທດທັງໝົດ 25% ຈະເລີ່ມຕັ້ງແຕ່ມື້ນີ້ເປັນຕົ້ນໄປ(2 ເມສາ 2025) ແລະ ໃນວັນທີ 5 ເມສາ ຈະເລີ່ມເກັບພາສີສິນຄ້ານໍາເຂົ້າຈາກຕ່າງປະເທດທັງໝົດ 10% ແລະ ໃນວັນທີ 9 ເມສາ ຈະເລີ່ມເກັບພາສີນໍາເຂົ້າແຕ່ລະປະເທດທີ່ສູງຂຶ້ນ ຕາມທີ່ໄດ້ປະກາດໄວ້.
ສໍາລັບລາຍຊື່ປະເທດທີ່ຖືກເອີ້ນເກັບພາສີນໍາເຂົ້າສິນຄ້າ ສູງເປັນອັນດັບຕົ້ນໆລວມມີ:
* ກໍາປູເຈຍ 49%
* ລາວ 48%
* ມາດາກັດສະກາ 47%
* ຫວຽດນາມ 46%
* ສີລັງກາ 44%
* ມຽນມາ 44%
* ບັງກະລາເທດ 37%
* ແຊັກບີ 37%
* ໄທ 35%
* ຈີນ 34%
* ສະວິດເຊີແລນ 31%
* ອິນເດຍ 26%
* ສ. ເກົາຫຼີ 25
* ຍີ່ປຸ່ນ 24%
* ສະຫະພາບຢູໂຣບ 20%
* ອັງກິດ 10% ແລະ ອີກຫລາຍປະເທດຈາກທົ່ວໂລກ ໂດຍເກັບພາສີຂັ້ນຕໍ່າ 10%.
