ຄາດຄະເນປີ 2017 ກອງຄຸ້ມຄອງພາສີ VI ຈະເກັບລາຍຮັບເຂົ້າງົບປະມານໄດ້ 1.000 ຕື້ກວ່າກີບ
ຄາດວ່າປີ 2017 ກອງຄຸ້ມຄອງພາສີ VI (ແຂວງຄໍາມ່ວນ ແລະ ແຂວງສະຫວັນນະເຂດ) ຈະເກັບລາຍຮັບເຂົ້າງົບປະມານໃຫ້ໄດ້ຢ່າງໜ້ອຍ 1.021 ຕື້ກີບ ເທົ່າກັບ 113,65% ຂອງແຜນການປີ, ໃນນັ້ນແຂວງສະຫວັນນະເຂດຈະປະຕິບັດໄດ້ 616 ຕື້ກວ່າກີບ ແລະ ແຂວງຄຳມ່ວນ 282 ຕື້ກວ່າກີບ.
ທ່ານ ສີສະຫວາດ ໄຊຍະວົງ ຮອງຫົວໜ້າກອງຄຸ້ມຄອງພາສີ VI, ທັງເປັນຫົວໜ້າກອງກວດກາພາສີປະຈໍາແຂວງຄໍາມ່ວນ ໄດ້ລາຍງານຕໍ່ທ່ານຮອງນາຍົກລັດຖະມົນຕີ, ລັດຖະມົນຕີກະຊວງການເງິນ ໃນໂອກາດເຄື່ອນໄຫວຊຸກຍູ້ການຈັດເກັບລາຍຮັບເຂົ້າງົບປະມານຢູ່ແຂວງສະຫວັນນະເຂດ ໃນລະຫວ່າງວັນທີ 24-25 ພະຈິກຜ່ານມານີ້ວ່າ: ກອງຄຸ້ມຄອງພາສີ VI ໄດ້ຮັບການປະກາດການຈັດຕັ້ງເປັນທາງການໃນວັນທີ 13 ຕຸລາ 2017 ນີ້ ມີຂອບເຂດການເຄື່ອນໄຫວຊີ້ນຳ-ນຳພາວຽກງານຢູ່ແຂວງສະຫວັນນະເຂດ ແລະ ແຂວງຄຳມ່ວນ ເຊິ່ງປະກອບມີດ່ານພາສີສາກົນ 4 ດ່ານ, ດ່ານທ້ອງຖິ່ນ 2 ດ່ານ, ດ່ານປະເພນີ 7 ດ່ານ.
ໃນປີ 2017, ກອງຄຸ້ມຄອງພາສີ VI ໄດ້ຮັບມອບໝາຍໃຫ້ຈັດເກັບລາຍຮັບເຂົ້າງົບປະມານທັງໝົດ 898 ຕື້ກວ່າກີບ ກວມເອົາ 13,54% ຂອງແຜນການລາຍຮັບພາສີທົ່ວປະເທດ, ໃນນັ້ນແຂວງສະຫວັນນະເຂດໃຫ້ໄດ້ 616 ຕື້ກວ່າກີບ, ແຂວງຄຳມ່ວນ 282 ຕື້ກວ່າກີບ. ໃນໄລຍະ 10 ເດືອນຜ່ານມານີ້ ທົ່ວກອງຄຸ້ມຄອງພາສີ VI ສາມາດຈັດເກັບໄດ້ 868 ຕື້ກວ່າກີບ ທຽບໃສ່ແຜນການປີເທົ່າກັບ 96,60% ເພີ່ມຂຶ້ນເກືອບ 30% ທຽບໃສ່ໄລຍະດຽວກັນຂອງປີຜ່ານມາ.
