ນະຄອນຫລວງວຽງຈັນ ລຶບລ້າງຄອບຄົວທຸກຍາກໄດ້ 99,43% ຍັງອີກ 0.57% ເທົ່າກັບ 899 ຄອບຄົວ
ທ່ານ ນາງ ສຸມາລີ ທໍາມະວົງ ຫົວໜ້າພະແນກພາຍໃນ ນະຄອນຫຼວງວຽງຈັນ ລາຍງານຕໍ່ກອງປະຊຸມສະຫຼຸບວຽກງານກໍ່ສ້າງຮາກຖານການເມືອງ ວຽກງານພັດທະນາຊົນ ນະບົດແກ້ໄຂຄວາມທຸກຍາກ ແລະ ວຽກ 3 ສ້າງປີ 2023-2024 ແລະ ທິດທາງແຜນການປີ 2025 ວັນທີ 1 ເມສາ 2025 ນີ້ວ່າ: ວຽກງານພັດທະນາຊົນນະບົດແກ້ໄຂຄວາມທຸກຍາກ ແລະ ວຽກ 3 ສ້າງ ນວ ມີ 9 ເມືອງ ມີ 4 ເມືອງໃນເທດສະບານ 5 ເມືອງເປັນເຂດຊານເມືອງ ມີທັງໝົດ 481 ບ້ານ.
ວຽກງານພັດທະນາຊົນນະບົດແກ້ໄຂຄວາມທຸກຍາກທົ່ວ ນວ ມີ 2 ຈຸດສຸມ ເພື່ອສ້າງບ້ານໃຫຍ່ເປັນຕົວເມືອງນ້ອຍໃນຊົນນະບົດຄື: ຈຸດສຸມບ້ານໃຫຍ່ນາຈະເລີນ ຈຸດສຸມບ້ານຊໍ້ ເມືອງສັງທອງ ຜ່ານການປະເມີນຄືນ 2024 ບັນລຸມາດຖານ 100% ແລະ ສະເໜີເພື່ອຮັບຮອງ.
ກໍານົດເພີ່ມ 1 ຈຸດສຸມພັດທະນາລະຫວ່າງສູນກາງ ແລະ ທ້ອງຖິ່ນຄື: ບ້ານນາໂງມເກົ່າ-ບ້ານນາໂງມໃໝ່-ບ້ານນາຕານ ເມືອງໄຊທານີ ຜ່ານການປະເມີນບັນລຸ 14 ມາດຖານ ຍັງບໍ່ທັນບັນລຸ 2 ມາດຖານຄື: ມາດຖານທີ 8 ບໍ່ມີສູນລວມບໍລິ ການເຕັກນິກກະສິກໍາ ແລະ ມາດຖານທີ 9 ບໍ່ມີຫົວໜ່ວຍທະນາຄານ ແລະ ການເງິນຈຸລະພາກ ການປະເມີນຜົນຕາມມາດຖານພົ້ນທຸກ.
ມາດຖານການພັດທະນາຕາມດໍາລັດ 348/ລບ ມີຄອບຄົວພົ້ນທຸກ 155,493 ຄອບຄົວ ເທົ່າກັບ 99,43% ຄອບຄົວທຸກຍາກ 899 ຄອບ ຄົວ ເທົ່າກັບ 0.57% ຄອບຄົວພັດທະນາ 142,698 ຄອບຄົວ ເທົ່າກັບ 91.24% ຄອບຄົວບໍ່ພັດທະນາ 10,268 ຄອບຄົວ ເທົ່າກັບ 6.57% ບ້ານພັດທະນາ 379 ບ້ານ ເທົ່າກັບ 78.79% ຍັງບໍ່ບັນລຸ 102 ບ້ານ ເທົ່າກັບ 21.21% ມາຮອດປັດຈຸບັນສາມາດຮັບຮອງເມືອງພົ້ນທຸກສໍາເລັດແລ້ວ 9 ເມືອງ ເທົ່າກັບ 100%.
ເດືອນທັນວາ 2024 ໄດ້ຈັດພິທີຮັບຮອງເອົາເມືອງປາກງື່ມເປັນເມືອງພົ້ນທຸກ ໄດ້ຮັບໃບຢັ້ງຢືນຈາກທ່ານນາຍົກລັດຖະມົນຕີ ເພື່ອຮັບຮອງເມືອງເຂັ້ມແຂງຮອບດ້ານຕາມດໍາລັດ 348/ລບ ໄດ້ 5 ເມືອງຄື: ເມືອງຈັນທະບູລີ ສີສັດຕະນາກ ໄຊເສດຖາ ສີໂຄດຕະບອງ ແລະ ຫາດຊາຍຟອງສະເພາະແຜນການ ປີ 2025 ຄາດຄະເນໃນເດືອນມີນາໃຫ້ສໍາເລັດ 2 ເມືອງຄື: ເມືອງສັງທອງ ແລະ ເມືອງນາຊາຍທອງ ເດືອນກໍລະກົດ 2025 ຄາດຄະເນໃຫ້ໄດ້ຮັບຮອງອີກ 2 ເມືອງຄື: ເມືອງໄຊທານີ ແລະ ເມືອງປາກງື່ມ ທ້າຍປີ 2025 ນວ ສາມາດປະກາດເມືອງເຂັ້ມແຂງຮອບດ້ານຕາມດໍາລັດ 348/ລບ ໃຫ້ສໍາເລັດ 100% ແລະ ສາມາດປະກາດບ້ານໃຫຍ່ເປັນຕົວເມືອງນ້ອຍໃນຊົນນະບົດໄດ້ 2 ບ້ານຄື: ບ້ານໃຫຍ່ນາຈະເລີນ ແລະ ບ້ານຊໍ້ ເມືອງສັງທອງ ຕິດພັນກັບວຽກງານພັດທະນາຊົນນະບົດແກ້ໄຂຄວາມທຸກຍາກ ແລະ ວຽກ 3 ສ້າງ ນວ ຍັງໄດ້ຮັບການຮ່ວມມື ແລະ ໄດ້ຮັບການຊ່ວຍ ເຫຼືອຈາກຈີນ ຈາກການຈັດຕັ້ງປະຕິບັດໂຄງການແມ່ນໍ້າຂອງ-ແມ່ນໍ້າລ້ານຊ້ານ ຢູ່ບ້ານຊໍ້ ເມືອງສັງທອງ 2 ໂຄງການ ຄື: ໂຄງການປັບປຸງຫໍວາງສະແດງ ແລະ ໂຄງການສ້າງວີດີໂອຂຽນປຶ້ມປະຫວັດບ້ານຊໍ້ ເມືອງສັງທອງ ການຮ່ວມມືກັບ ສ ເກົາຫຼີ ຂອງມູນນິທິເຊມາອຸນ ປະຈໍາລາວ ເປັນ ການພັດທະນາບ້ານ ແລະ ຊຸກຍູ້ການຜະລິດຢູ່ 2 ບ້ານ ຂອງເມືອງປາກງື່ມຄື: ບ້ານປາກກວາງ ແລະ ບ້ານໂນນຊາຍ.
ໃນພິທີຍັງໄດ້ມອບໃບຢັ້ງຢືນໃຫ້ພະນັກງານທີ່ລົງຮາກຖານການເມືອງພັດທະນາຊົນນະບົດແກ້ໄຂຄວາມທຸກຍາກ ແລະ ວຽກງານ 3 ສ້າງ ກອງເລຂາຊ່ວຍວຽກ ມອບໃບຢັ້ງຢືນຮັບຮອງເມືອງພົ້ນທຸກ 8 ເມືອງ ແລະ ເມືອງເຂັ້ມແຂງຮອບດ້ານ 5 ເມືອງ ໃຫ້ກຽດມອບໂດຍທ່ານ ອານຸ ພາບ ຕຸນາລົມ ແລະ ສືບຕໍ່ແຕ່ງຕັ້ງພະນັກງານຫັນລົງຮາກຖານການ ເມືອງພັດທະນາຊົນນະບົດ ແກ້ໄຂຄວາມທຸກຍາກ ແລະ ວຽກງານ 3 ສ້າງຊຸດໃໝ່ ປະຈໍາປີ 2025 ແລະ ຕອນທ້າຍຂອງກອງປະຊຸມຍັງໄດ້ຮັບຟັງການໂອ້ລົມຈາກສະຫາຍເລຂາຄະນະພັກ ນວ ໃນການຫັນລົງຮາກ ຖານການເມືອງໃນຕໍ່ໜ້າອີກດ້ວຍ.
ທີ່ມາ: ໜັງສືພິມວຽງຈັນໃໝ່
