BBC ມີລາຍໄດ້ຫລຸດລົງປີລະ 1,000 ລ້ານປອນ ນັບແຕ່ປີ 2010
ບໍລິສັດແຜ່ພາບກະຈາຍສຽງອັງກິດ ຫລື BBC ເປີດເຜີຍວ່າ: ລາຍໄດ້ຂອງອົງກອນຫລຸດລົງເຖິງ 1,000 ລ້ານປອນຕໍ່ປີ ເມື່ອທຽບໃສ່ປີ 2010 ຖືເປັນຄວາມທ້າທາຍທາງການເງິນຄັ້ງສໍາຄັນ.
BBC ຄາດຄະເນວ່າ: ຈະມີລາຍໄດ້ 6,100 ລ້ານປອນ ໃນປີງົບປະມານ 2025/26 ແຕ່ເປັນການຫລຸດລົງ 1,000 ລ້ານປອນຕໍ່ປີ ນັບແຕ່ປີ 2010 ເມື່ອຄິດໄລ່ເຖິງອັດຕາເງິນເຟີ້.
ລາຍງານປະຈໍາປີລະບຸວ່າ: BBC ດໍາເນີນງານຢ່າງມີປະສິດທິພາບ ລວມທັງການເລີກຈ້າງພະນັກງານ 2,000 ຄົນ ພາຍໃນໄລຍະ 5 ປີຜ່ານມາ ແລະ ໄດ້ບັນລຸຂີດຈໍາກັດຂອງຜົນກໍາໄລໃນອະນາຄົດທີ່ສໍາຄັນຈາກແນວທາງນີ້ແລ້ວ.
BBC ເຊິ່ງເປັນສື່ເກົ່າແກ່ທີ່ສຸດຂອງອັງກິດ ກໍາລັງຜະເຊີນຄວາມທ້າທາຍໃນການລະດົມທຶນ, ເນື້ອໃນ ໃນລະດັບທີ່ບໍ່ເຄີຍປາກົດມາກ່ອນ ເນື່ອງຈາກການຮ່ວມມືໃນການຜະລິດຮ່ວມກັບຜູ້ໃຫ້ບໍລິການສະຕຣີມມິ່ງ ແລະ ບໍລິສັດສື່ລະດັບໂລກຫລຸດລົງທົ່ວທຸກພາກສ່ວນ.
ເຖິງຢ່າງໃດກໍດີ, BBC ໄດ້ຮັບເງິນທຶນສ່ວນຫລາຍຈາກຄ່າທໍານຽມໃບອະນຸຍາດຈາກເຈົ້າຂອງໂທລະພາບ, ແຕ່ຄ່າທໍານຽມດັ່ງກ່າວຖືກໂຈະມາເປັນເວລາ 2 ປີແລ້ວ ທ່າມກາງສະພາບອັດຕາເງິນເຟີ້ທົ່ວໄປເພີ່ມສູງຂຶ້ນຢ່າງວ່ອງໄວ.
ປັດຈຸບັນ, ລັດຖະບານອັງກິດກໍາລັງພິຈາລະນາ “ກົດບັດພະລາດຊະທານຂອງ BBC” (Royal Charter) ເຊິ່ງເປັນໃບອະນຸຍາດທີ່ກ່ຽວຂ້ອງກັບການເບິ່ງແຍງອົງກອນ.
ຂະນະທີ່ BBC ຮຽກຮ້ອງໃຫ້ກົດບັດພະລາດຊະທານສະບັບໃໝ່ປົກປ້ອງຄວາມເປັນອິດສະຫລະ, ຮັບຮອງວ່າ BBC ສາມາດດໍາລົງຢູ່ໄດ້ຢ່າງຍືນຍົງໃນໄລຍະຍາວ ລວມທັງຮັບຮອງເງິນທຶນທີ່ພຽງພໍ ແລະ ເຊື່ອຖືໄດ້ ແລະ ອະນຸຍາດໃຫ້ BBC ຕອບສະໜອງຕໍ່ຄວາມຕ້ອງການຂອງຜູ້ຊົມທີ່ປ່ຽນແປງໄປ ດ້ວຍຄວາມວ່ອງໄວ ແລະ ຄ່ອງຕົວ.
