ປີ 2024 ບໍລິສັດຂຸດຄົ້ນແຮ່ທາດຢູ່ແຂວງໄຊສົມບູນ ນຳເຂົ້າສານເຄມີ 38 ທາດ ເກືອບ 2 ແສນໂຕນ

ທ່ານ ພາທໍ່ ຕົງເຢີທໍ່ ຫົວໜ້າພະແນກອຸດສາຫະກຳ ແລະ ການຄ້າ ແຂວງໄຊສົມບູນ ລາຍງານຕໍ່ກອງປະຊຸມສະຫຼຸບການຈັດຕັ້ງປະຕິບັດວຽກງານຄຸ້ມຄອງເຄມີ ປະຈຳປີ 2024 ແລະ ທິດທາງແຜນການປີ 2025 ຂອງ ພະແນກອຸດສາຫະກຳ ແລະ ການຄ້າ ແຂວງ ວັນທີ 27 ມີນາ 2025ນີ້ວ່າ: ໃນໄລຍະ ເດືອນ 9-12 ປີ 2024  ມີການສະເໜີຂໍອະນຸຍາດນໍາເຂົ້າເຄມີ ທັງໝົດ 4 ບໍລິສັດຄື: ບໍລິສັດ ພູເບ້ຍ ມາຍນິງ ຈຳກັດ ນໍາເຂົ້າທັງໝົດ 26 ທາດ ນໍ້າໜັກ 190,472 ໂຕນ, ບໍລິສັດ ຮ່ວມມືພັດທະນາບໍ່ແຮ່ ໄຊສົມບູນ ຈຳກັດ ນໍາເຂົ້າ 1 ທາດ ນໍ້າໜັກ 250 ໂຕນ, ບໍລິສັດ ລາວໄທຊານ ຈິວຈິວ ມາຍນິງ ຈຳກັດ ນໍາເຂົ້າ 7 ທາດ ນໍ້າໜັກ 443 ກວ່າໂຕນ ແລະ ບໍລິສັດ ຫຼົງຈ່ຽງ ມາຍນິງ ຈຳກັດ ນໍາເຂົ້າ 4 ທາດ ນໍ້າໜັກ 157 ກວ່າໂຕນ. ລວມທາດເຄມີ ທີ່ນໍາເຂົ້າມາແຂວງໄຊສົມບູນ ມີທັງໝົດ 38 ທາດ, ນໍ້າໜັກລວມ 191,323 ກວ່າ ໂຕນ.

ກອງປະຊຸມໄດ້ເຫັນດີໃຫ້ສືບຕໍ່ເອົາໃຈໃສ່ໃນການແລກປ່ຽນບົດຮຽນ, ການປະສານສົມທົບເຊິ່ງກັນ ແລະ ກັນຢ່າງກົມກຽວ ເພື່ອພ້ອມກັນເຄື່ອນໄຫວວຽກງານຄຸ້ມຄອງເຄມີ ຢູ່ແຂວງໄຊສົມບູນ ໃຫ້ນັບມື້ມີຜົນສໍາເລັດໃນບາດກ້າວໃໝ່, ໃຫຍ່ຫຼວງກ່ວາເກົ່າ, ກ້າວໄປສູ່ການຈຳກັດ ແລະ ຫຼຸດຜ່ອນ ບັນຫາຜົນກະທົບ ທີ່ເກີດຈາກການນໍາໃຊ້ເຄມີ ຕໍ່ທຳມະຊາດ, ສິ່ງແວດລ້ອມ, ການດໍາລົງຊີວິດຂອງປະຊາຊົນ ແລະ ຄວາມສະຫງົບສຸກຂອງສັງຄົມ ໃຫ້ນັບມື້ຫຼຸດໜ້ອຍຖອຍລົງ ແລະ  ຫັນການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ ດ້ວຍ ກົດໝາຍ, ລະບຽບການ ແລະ ຕາມທິດຫັນເປັນທັນສະໄໝ, ສີຂຽວ ແລະ ຍືນຍົງ ເທື່ອລະກ້າວ.