WHO ຂໍເງິນຊ່ວຍເຫລືອສຸກເສີນ 8 ລ້ານໂດລາ ຮັກສາຊີວິດເຫຍື່ອແຜ່ນດິນໄຫວຢູ່ມຽນມາ

          ອົງການອະນາໄມໂລກ (WHO) ຮຽກຮ້ອງການສະໜັບສະໜູນເງິນຊ່ວຍເຫລືອສຸກເສີນຈໍານວນ 8 ລ້ານໂດລາສະຫະລັດ ເພື່ອໃຊ້ໃນການຊ່ວຍເຫລືອຜູ້ປະສົບໄພແຜ່ນດິນໄຫວໃນພື້ນທີ່ພາກກາງຂອງມຽນມາ ເຊິ່ງສົ່ງຜົນເຮັດໃຫ້ມີຜູ້ເສຍຊີວິດແລ້ວຢ່າງໜ້ອຍ 2,000 ຄົນ ແລະ ບາດເຈັບອີກຫລາຍພັນຄົນ.

        WHO ກ່າວວ່າ: ຕອນນີ້ໄດ້ຍົກລະດັບໃຫ້ການຊ່ວຍເຫລືອສຸກເສີນເປັນລະດັບສູງສຸດ ໂດຍເງິນຊ່ວຍເຫລືອສຸກເສີນດັ່ງກ່າວຈະຖືກໃຊ້ໃນການປິ່ນປົວຜູ້ບາດເຈັບ, ປ້ອງກັນພະຍາດລະບາດ ແລະ ຟື້ນຟູບໍລິການສຸຂະພາບທີ່ຈໍາເປັນໃນໄລຍະ 30 ວັນຕໍ່ໜ້າ.

       ຂະນະທີ່ການໃຫ້ການຊ່ວຍເຫລືອຜູ້ປະສົບໄພເຂົ້າສູ່ວັນທີ 6 ເຊິ່ງຫລາຍປະເທດເຊັ່ນ: ລາວ, ໄທ, ຈີນ, ອິນເດຍ, ສິງກະໂປ, ມາເລເຊຍ ແລະ ຣັດເຊຍ ໄດ້ສົ່ງເຈົ້າໜ້າທີ່ ພ້ອມອຸປະກອນໄປຊ່ວຍເຫລືອ ແລະ ຍັງເດີນໜ້າຄວາມພະຍາຍາມຄົ້ນຫາຜູ້ລອດຊີວິດທີ່ຖືກຝັງຢູ່ກ້ອງຊາກອາຄານບ້ານເຮືອນຕ່າງໆຢ່າງຕໍ່ເນື່ອງ.

        ທັງນີ້, ແຜ່ນດິນໄຫວຂະໜາດ 7.7 ທີ່ເກີດຂຶ້ນລະຫວ່າງທີ່ມີການເຮັດພິທີລະໝາດໃນເດືອນລໍມາດອນ ຍັງສົ່ງຜົນເຮັດໃຫ້ມັດສະຢິດເກົ່າແກ່ກວ່າ 50 ແຫ່ງຢູ່ມັນທະເລ ແລະ ສະກາຍພັງຖະຫລົ່ມລົງມາ ແລະ ເຮັດໃຫ້ມີຊາວມຸດສະລິມເສຍຊີວິດເພີ່ມເປັນ 570 ຄົນແລ້ວ.

         ສ່ວນອົງການກາແດງ ແລະ ສະພາສ້ຽວວົງເດືອນສາກົນ (International Federation of Red Cross and Red Crescent Societies: IFRC) ຊີ້ວ່າ: ສະຖານະການທີ່ເກີດຂຶ້ນຢູ່ມຽນມາຕອນນີ້ ເປັນວິກິດດ້ານມະນຸດສະທໍາທີ່ມີຄວາມຊັບຊ້ອນ ແລະ ມີຄວາມຕ້ອງການການຊ່ວຍເຫລືອດ້ານມະນຸດສະທໍາເພີ່ມຂຶ້ນຕໍ່ເນື່ອງທຸກຊົ່ວໂມງ.

        ໂດຍຫລັງເກີດແຜ່ນດິນໄຫວໃນວັນທີ 28 ມີນາ ຍັງມີລາຍງານວ່າກອງທັບມຽນມາຍັງເດີນໜ້າໂຈມຕີທາງອາກາດຖະຫລົ່ມຝ່າຍຕໍ່ຕ້ານໃນບາງພື້ນທີ່ ສົ່ງຜົນເຮັດໃຫ້ສະຖານະການທະວີຄວາມຮຸນແຮງຂຶ້ນອີກ.

        ຂະນະທີ່ລັດຖະບານເອກະພາບແຫ່ງຊາດ (NUG) ຫລື ລັດຖະບານເງົາຂອງມຽນມາ ໄດ້ປະກາດຢຸດປະຕິບັດການທາງທະຫານຊົ່ວຄາວໃນພື້ນທີ່ທີ່ໄດ້ຮັບຜົນກະທົບຈາກແຜ່ນດິນໄຫວ ໂດຍກອງກໍາລັງພິທັກປະຊາຊົນ (PDF) ເຊິ່ງເປັນກອງກໍາລັງຕິດອາວຸດຂອງ NUG ຈະຢຸດການສູ້ຮົບກັບກອງທັບມຽນມາເປັນເວລາ 2 ອາທິດ ເລີ່ມແຕ່ວັນທີ 30 ມີນາ ເພື່ອເປີດທາງໃຫ້ມີການຊ່ວຍເຫລືອດ້ານມະນຸດສະທໍາ.

ອ້າງອີງ:

• https://www.bbc.com/news/live/c04z4wzgq5qt
• https://www.irrawaddy.com/news/world/live-updates-death-toll-rises-foreign-rescue-teams-arrive-nug-announces-military-pause-and-more.html