ຈໍານວນຜູ້ເສຍຊີວິດຈາກແຜ່ນດິນໄຫວຢູ່ມຽນມາເພີ່ມສູງເກີນ 2,000 ຄົນ ຂາດເຂີນຢາ-ອຸປະກອນການແພດຊ່ວຍຜູ້ລອດຊີວິດ
ທາງການມຽນມາລາຍງານຈໍານວນຜູ້ເສຍຊີວິດຈາກແຜ່ນດິນໄຫວເພີ່ມສູງເກີນ 2,000 ຄົນ. ຂະນະທີ່ການກູ້ໄພ, ຄົ້ນຫາ ແລະ ຊ່ວຍເຫລືອຜູ້ລອດຊີວິດເປັນໄປດ້ວຍຄວາມຍາກລໍາບາກ ເນື່ອງຈາກຂາດເຂີນບຸກຄະລາກອນ ແລະ ອຸປະກອນ. ມີປະຊາຊົນຄົນໜຶ່ງກ່າວຕໍ່ນັກຂ່າວ BBC ວ່າ: ພວກເຂົາຕ້ອງຂຸດຫາຜູ້ທີ່ຕົກຄ້າງຢູ່ກ້ອງຊາກດ້ວຍມືເປົ່າ.
ສໍານັກງານເພື່ອການປະສານງານດ້ານມະນຸດສະທໍາແຫ່ງສະຫະປະຊາຊາດ (OCHA) ລະບຸວ່າ: ຊາກຫັກພັງ ແລະ ຖະໜົນທີ່ຖືກຕັດຂາດໃນຫລາຍພື້ນທີ່ເປັນອຸປະສັກຕໍ່ການສົ່ງການຊ່ວຍເຫລືອບັນເທົາທຸກຢູ່ມຽນມາ.
ເວລານີ້ປະຊາຊົນມຽນມາປະສົບສະພາບຂາດເຂີນຢາ ແລະ ເຄື່ອງມືການແພດຂັ້ນຮຸນແຮງ ເຊິ່ງລວມທັງຊຸດປະຖົມພະຍາບານສຸກເສີນ, ຖຸງບັນຈຸເລືອດ, ຢາສະຫລົບ ແລະ ອຸປະກອນຊ່ວຍເຫລືອ ເຊິ່ງເຮັດໃຫ້ພາລະກິດກູ້ໄພ ແລະ ບັນເທົາທຸກມີຄວາມຍາກລໍາບາກຍິ່ງຂຶ້ນ.
ເມືອງທີ່ໄດ້ຮັບຜົນກະທົບຈາກແຜ່ນດິນໄຫວຢ່າງໜັກມີເຈົ້າໜ້າທີ່ສາທາລະນະສຸກບາງສ່ວນເຂົ້າເຖິງພື້ນທີ່ເຊັ່ນ: ເມືອງມັນທະເລ, ມະເກວ, ເນປີດໍ ແລະ ສະກາຍໃນເຂດພາກກາງ ແລະ ຕາເວັນຕົກສຽງເໜືອ, ແຕ່ປະສົບບັນຫາໃນການເບິ່ງແຍງຜູ້ບາດເຈັບຈໍານວນຫລາຍ, ສ່ວນຢູ່ເຂດພາກໃຕ້ມີອີກຫລາຍເມືອງທີ່ໄດ້ຮັບຜົນກະທົບຢ່າງໜັກເຊັ່ນ: ຢອງຊາເວ, ກະລໍ ແລະ ປິນຫລວງ.
ມຽນມາກໍາລັງຢູ່ໃນສະພາບສົງຄາມກາງເມືອງລະຫວ່າງຝ່າຍລັດຖະບານທະຫານ ແລະ ກຸ່ມຕິດອາວຸດຕ່າງໆ ນັບແຕ່ເຫດການລັດຖະປະຫານເມື່ອ 4 ປີກ່ອນ, ແຕ່ເວລານີ້ລັດຖະບານບໍ່ໄດ້ປົກຄອງພື້ນທີ່ສ່ວນຫລາຍ ການຊ່ວຍເຫລືອຈຶ່ງມີອຸປະສັກເພີ່ມຂຶ້ນ.
ເຖິງວ່າມຽນມາຫາກໍຜະເຊີນແຜ່ນດິນໄຫວຄັ້ງໃຫຍ່ ແລະ ຍັງມີອາບເຕີຊັອກອີກຫລາຍຮອບ, ແຕ່ມີລາຍງານວ່າ: ກອງທັບຍັງເດີນໜ້າໂຈມຕີທາງອາກາດໃສ່ຫລາຍພື້ນທີ່ຂອງມຽນມາ ເຊິ່ງສະຫະປະຊາຊາດ (UN) ປະນາມການໂຈມຕີເຫລົ່ານີ້ວ່າເປັນສິ່ງທີ່ໜ້າລັງກຽດ ແລະ ຍອມຮັບບໍ່ໄດ້, ພ້ອມຮຽກຮ້ອງໃຫ້ລັດຖະບານທະຫານຢຸດປະຕິບັດການທາງທະຫານທັງໝົດທັນທີ.
ອ້າງອີງ:
- https://edition.cnn.com/world/live-news/myanmar-thailand-earthquake-03-29-25-intl-hnk/index.html
- https://www.bbc.com/news/articles/c5y0y1py7ppo
- https://www.bbc.com/news/articles/cy7x7r8m3xlo
