ຈອດລົດມັກງ່າຍ ອາດກາຍເປັນບັນຫາໜັກໜ່ວງຕໍ່ສັງຄົມ
ໂດຍ: ຜາຕຸງ
ຄວາມມັກງ່າຍຂອງຄົນເຮົາມັນບໍ່ມີມື້ສິ້ນສຸດເປັນ ນອກຈາກຄວາມມັກງ່າຍໃນການຖິ້ມສິ່ງເສດເຫຼືອຂອງຈຳພວກຂີ້ເຫຍື່ອນັ້ນແລ້ວ ການໃຊ້ລົດໃຊ້ຖະໜົນກໍເຊັ່ນດຽວກັນ ກໍຍັງມີຫຼາຍໆຄົນຄວາມມັກ ງ່າຍໄດ້ກາຍເປັນເງົາຕາມຕົວຂອງຜູ້ຂັບລົດໄປແລ້ວ ເຊິ່ງມັນສະແດງອອກຫຼາຍຮູບແບບໃນເວລາຂັບລົດຕາມຖະໜົນຫົນທາງ ເປັນຕົ້ນ ແລ່ນລົດຕາມໃຈດ້ວຍຄວາມໄວເກີນກຳນົດ, ແລ່ນແຊງຊ້າຍແຊງຂວາ, ແລ່ນສວນທາງ (ຢ້ອນສອນ), ລ້ຽວລົດກະທັນຫັນຕັດໜ້າລົດຄັນອື່ນ, ແລ່ນລົດຕາມທາງຄົນຍ່າງ.
ນອກຈາກນັ້ນແລ້ວສິ່ງທີ່ຄົນຂັບລົດຈຳນວນໜຶ່ງທີ່ມັກງ່າຍນັ້ນ ແມ່ນການຈອດລົດຢູ່ທາງຄົນຍ່າງ, ຈອດລົດບໍ່ແນບຂອບທາງ ຊ້ຳບໍ່ໜຳເວລາຈອດລົດພໍແຕ່ມີຫວ່າງກໍຫົວສຸບເຂົ້າປ່ອຍທ້າຍລົດອອກມາໃສ່ຫົນທາງສ້າງການກີດຂວາງໃຫ້ຜູ້ທີ່ສັນຈອນໄປມາ ຊຶ່ງການກະທຳທັງໝົດນີ້ແມ່ນເກີດຈາກຄວາມຂີ້ຄ້ານມັກງ່າຍ ເອົາແຕ່ຄວາມສະບາຍມາໃຫ້ແຕ່ຜູ້ຂັບລົດຈຳນວນບໍ່ໜ້ອຍເທົ່ານັ້ນ ເຖິງມັນຈະສ້າງຄວາມເດືອດຮ້ອນໃຫ້ຜູ້ອື່ນກໍບໍ່ໄດ້ສົນໃຈນຳ ແລະ ການກະທຳເຊັ່ນນີ້ມັນສ້າງຄວາມສ່ຽງໃຫ້ເກີດອຸປະຕິເຫດງ່າຍຂຶ້ນ ແຕ່ຫາກໂຊກບໍ່ດີ ເມື່ອຍເກີີດຂຶ້ນແລ້ວພັດມັກໂທດຄົນອື່ນສະເໝີ.
ຍ້ອນວ່າທຸກມື້ນີ້ມີຜູ້ໃຊ້ລົດໃຊ້ຖະໜົນມີຈຳນວນຫຼາຍ, ຈຳນວນໜຶ່ງກໍມີໃບອະນຸຍາດໃນການຂັບຂີ່ແລ້ວ ແລະ ອີກຈຳນວນບໍ່ໜ້ອຍພັດຍັງບໍ່ທັນມີໃບອະນຸຍາດການຂັບຂີ່ ພໍແຕ່ວ່າຂັບໄດ້ຂັບເປັນກໍພາກັນລົງສູ່ຖະໜົນແລ້ວທັ້ງໆທີ່ບໍ່ຮູ້ລະບຽບການໃນການສັນຈອນເລີຍ ຍັງຖືເບົາໂດຍສະເພາະແມ່ນຜູ້ທ່ີຂັບຂີ່ລົດໃຫຍ່ ມັກຈະເອົາລັດເອົາປຽບ ຜູ້ທີ່ໃຊ້ລົດນ້ອຍ ຫຼືຄົນຍ່າງຕາມຫົນທາງ ດ້ວຍຫຼາຍຮູບແບບ ເປັນຕົ້ນຂັບຕັດໜ້າ, ຂັບກວມທາງທັງສອງຊ່ອງຈະລາຈອນ, ຈອດລົດຢູ່ບ່ອນຄັບແຄບ, ຈອດກວມທາງມ້າລາຍ, ແລ່ນໄວເກີນກຳນົດ, ຈອດລົດຢູ່ບ່ອນຫ້າມຈອດ ຈອດລົດຕາມແຄມທາງເວລາໄຂປະຕູບໍ່ລະວັງ ແລະ ອື່ນໆອີກຫຼາຍກໍລະນີ ການກະທຳຄືແນວນັ້ນ ນອກຈາກອາດພາໃຫ້ເກີດອຸປະຕິເຫດທາງຖະໜົນແລ້ວ ມັນຍັງບົ່ງບອກເຖິງມາລະຍາດອັນດີງາມຂອງຜູ້ຂັບຂີ່ຕື່ມອີກ.
ເພື່ອຄວາມເປັນລະບຽບຮຽບຮ້ອຍ ຮັບປະກັນຄວາມປອດໄພໃນເວລາສັນຈອນຕາມທ້ອງຖະໜົນ ຜູ້ຂັບຂີ່ລົດທົ່ວໄປຄວນໄດ້ຮຽນຮູ້ລະບຽບການສັນຈອນທາງບົກໃຫ້ເຂົ້າໃຈເລິກເຊິ່ງ, ການຂັບຂີ່ຕ້ອງມີໃບອະນຸຍາດການຂັບຂີ່ຈາກພາກສ່ວນກ່ຽວຂ້ອງຄັກແນ່ບໍ່ແມ່ນວ່າຂັບເປັນແລ້ວຂັບໄປໂລດ, ໃນເມື່ອຂັບລົດເປັນແລ້ວ ຕ້ອງຮູ້ຈັກຂັບໃຫ້ລະອຽດໃນດ້ານຕ່າງໆ ໂດຍສະເພາະ ແມ່ນການຈອດລົດ ຈອດແນວໃດຈຶ່ງຈະປອດໄພ ເພາະນັ້ນມັນໝາຍເຖິງອຸປະຕິເຫດທີ່ອາດຈະເກີດຂຶ້ນ, ຈົ່ງຈອດລົດໃຫ້ຖືກວິທີຕາມລະບຽບການສັນຈອນທາງບົກເພື່ອຮັກສາຄວາມເປັນລະບຽບຮຽບຮ້ອຍ ຄວາມສະຫງົບໃນສັງຄົມ ຫຼຸດຜ່ອນອຸປະຕິເຫດຕາມທ້ອງຖະໜົນທັງຫຼຸດຜ່ອນອັດຕາການເຈັບ, ການເສຍຊີວິດຂອງຜູ້ໃຊ້ລົດໃຊ້ຖະໜົນ ສຳຄັນແມ່ນ ຮັກສາໄດ້ຄວາມສັກສິດຂອງລະບຽບກົດໝາຍ.
