ຈະໃຊ້ເຈົ້າໜ້າທີ່ 1,000ກວ່າຄົນ ອຳນວຍຄວາມສະດວກການສັນຈອນໄລຍະປີໃໝ່ລາວ
ພັນເອກ ຄໍາສອນ ສີດາວົງ ຫົວໜ້າກົມຕໍາຫຼວດຈະລາຈອນ ກົມໃຫຍ່ຕໍາຫຼວດ ກະຊວງປ້ອງກັນ ຄວາມສະຫງົບ ໄດ້ກ່າວໃນພິທີຖະແຫຼງຂ່າວງານສັບປະດາແຫ່ງຊາດດ້ານຄວາມປອດໄພທາງຫຼວງ ປະຈຳປີ 2025 ພາຍໃຕ້ຄໍາຂວັນ “ຖະໜົນເພື່ອຊີວິດ ຂັບລົດຊ້າ, ຊີວິດຍືນຍາວ” ໃນວັນທີ 29 ມີນາ 2025 ນີ້ວ່າ:
ໄລຍະສະເຫຼີມ-ສະຫຼອງປີໃໝ່ລາວ ປີມະໂລງ ພສ 2568 ທີ່ໃກ້ຈະມາເຖິງນີ້ ເລີ່ມແຕ່ວັນທີ 11-17 ເມສາ 2025 ທາງເຈົ້າໜ້າທີ່ຕຳຫຼວດຈະລາຈອນ ທົ່ວປະເທດ ຈະໄດ້ເຂັ້ມງວດໃນການກວດກາ ການສັນຈອນຕາມທາງຫຼວງ ໂດຍຈະເນັ້ນໃສ່ກວດກາຄວາມໄວ, ກວດກາທາດເຫຼົ້າໃນລົມຫາຍໃຈຂອງຜູ້ຂັບຂີ່, ການໃສ່ໝວກກັນກະທົບຂອງຜູ້ຂັບຂີ່ ແລະ ຜູ້ຊ້ອນທ້າຍ ໂດຍນໍາໃຊ້ເຈົ້າໜ້າທີ່ຕຳຫຼວດຈະລາຈອນ ທັງໝົດ 1,172 ສະຫາຍ (ສະເພາະກົມຕຳຫຼວດຈະລາຈອນ ມີ 60 ສະຫາຍ) ຈະຕັ້ງຈຸດກວດກາການບັງຄັບໃຊ້ກົດໝາຍ ແລະ ລະບຽບການກ່ຽວກັບຈະລາຈອນທາງບົກ ຈໍານວນ 143 ຈຸດ (ສະເພາະກົມຕຳຫຼວດຈະລາຈອນ ມີ 4 ຈຸດ) ຕາມເສັ້ນທາງຫຼວງແຫ່ງຊາດ ທາງຫຼວງແຂວງ ທາງຫຼວງຂອງເມືອງ ແລະ ທາງໃນຕົວເມືອງ.
ທັງນີ້ ເພື່ອເຮັດໃຫ້ການເຫຼີມສະຫຼອງສົ່ງທ້າຍປີເກົ່າ ພສ 2567 ຕ້ອນຮັບປີໃໝ່ລາວ ພສ 2568 ໃຫ້ມີຄວາມສະຫງົບ ມີຄວາມປອດໄພ ມີບັນຍາກາດເບີກບານມ່ວນຊື່ນ ເປັນຂະບວນຟົດຟື້ນ ປາສະຈາກຜົນເສຍຫາຍທາງດ້ານສຸຂະພາບຊີວິດ ຊັບສິນ ແລະ ຄົນທີ່ຮັກແພງ-ສະມາຊິກພາຍໃນຄອບຄົວ ຈາກການເກີດອຸປະຕິເຫດ ໄລຍະບຸນປີໃໝ່ລາວ.
ທີ່ມາ: ໜັງສືພິມ ວຽງຈັນໃໝ່
