ກັກຕົວພະນັກງານຂອງອົງການກວດກາແຫ່ງລັດ 4 ຄົນ ແລະ ພັກພວກ 3 ຄົນສວຍໃຊ້ຕຳແໜ່ງ, ໜ້າທີ່ຮັບສິນບົນ
ວາລະສານກວດກາ ລາຍງານວັນທີ 31 ມີນາ 2025 ນີ້ວ່າ: ວັນທີ 10 ກຸມພາ ຜ່ານມາ ພາຍຫລັງມີຂໍ້ມູນຫຼັກຖານຄົບຖ້ວນກ່ຽວກັບການກະທຳຜິດຂອງພະນັກງານຈຳນວນໜຶ່ງ ຄະນະກວດກາສູນກາງພັກ-ອົງການກວດກາແຫ່ງລັດ ໄດ້ມອບໃຫ້ເຈົ້າໜ້າທີ່ກ່ຽວຂ້ອງນຳໃຊ້ມາດຕະການກັກຕົວພະນັກງານຂອງອົງການກວດກາແຫ່ງລັດ 4 ຄົນ. ໃນນີ້ມີພະນັກງານຂັ້ນຫົວໜ້າກົມ 1 ຄົນ, ຂັ້ນຮອງຫົວໜ້າກົມ 1 ຄົນ ແລະ ພະນັກງານຂັ້ນຮອງພະແນກ 2 ຄົນ ນອກຈາກນັ້ນກໍໄດ້ກັກຕົວບຸກຄົນທີ່ກ່ຽວຂ້ອງອີກ 3 ຄົນ ທີ່ມີການພົວພັນກັບການໃຫ້ສິນບົນແກ່ເຈົ້າໜ້າທີ່ຂອງອົງການກວດກາແຫ່ງລັດຈຳນວນ.
ປັດຈຸບັນແມ່ນກຳລັງດຳເນີນການສືບສວນ-ສອບສວນ ຕໍ່ພວກກ່ຽວຕາມຂັ້ນຕອນຂອງກົດໝາຍ.
ນີ້ແມ່ນປະຕິບັດຕາມມະຕິກອງປະຊຸມໃຫຍ່ຄັ້ງທີ XI ຂອງພັກ ຕິດພັນກັບການເພີ່ມທະວີການເຄື່ອນ ໄຫວປະຕິບັດໜ້າທີ່, ຕິດຕາມກວດກາສະກັດກັ້ນ ແລະ ຕ້ານການສໍ້ລາດບັງຫຼວງ, ຢູ່ໃນລະບົບການ ຈັດຕັ້ງ ແລະ ຖັນແຖວພະນັກງານຂອງລັດ, ຄະນະກວດກາສູນກາງພັກ-ອົງການກວດກາແຫ່ງລັດຍາມໃດກໍເອົາໃຈໃສ່ການຕິດຕາມກວດກາຢູ່ພາຍໃນ ຕໍ່ພະນັກງານພາຍໃນອົງການຂອງຕົນ ໂດຍສະເພາະແມ່ນກວດກາ, ເກັບກຳຂໍ້ມູນ ແລະ ແກ້ໄຂພຶດຕິກຳສວຍໃຊ້ຕຳແໜ່ງ, ໜ້າທີ່, ຮັບສິນບົນທີ່ຂັດກັບລະບຽບກົດໝາຍ.
