ກອງປະຊຸມສະຫຼຸບວຽກງານພະລັງງານ ແລະ ບໍ່ແຮ່ທົ່ວປະເທດ ປະຈໍາປີ 2024
ວັນທີ 31 ມີນາ 2025 ກະຊວງພະລັງງານ ແລະ ບໍ່ແຮ່ ສະຫຼຸບວຽກງານພະລັງງານ ແລະ ບໍ່ແຮ່ທົ່ວປະເທດປະຈໍາປີ 2024 ໂດຍການເປັນປະທານຂອງທ່ານ ໂພໄຊ ໄຊຍະສອນ ລັດຖະມົນຕີກະຊວງພະລັງງານ ແລະ ບໍ່ແຮ່. ມີຮອງລັດຖະມົນຕີ, ຫົວໜ້າກົມ, ຮອງກົມຂອງບັນດາກະຊວງ , ສະພາແຫ່ງຊາດລາວ, ຜູ້ອໍານວຍການໃຫຍ່ລັດວິສະຫະກິດໄຟຟ້າລາວ, ຫົວໜ້າພະແນກ ພະລັງງານ ແລະ ບໍ່ແຮ່ນະຄອນຫຼວງວຽງຈັນ ແລະ ບັນດາແຂວງໃນທົ່ວປະເທດເຂົ້າຮ່ວມ.
ຈຸດປະສົງຂອງກອງປະຊຸມ ເພື່ອປຶກສາຫາລື ວາງທິດທາງໜ້າທີ່ ແລະ ຄາດໝາຍແຕ່ລະດ້ານ ເພື່ອສືບຕໍ່ພັດທະນາວຽກງານພະລັງງານ ແລະ ບໍ່ແຮ່ສໍາລັບປີ 2025 ໃຫ້ບັນລຸເປົ້າໝາຍທີ່ວາງໄວ້.
ທ່ານ ໂພໄຊ ໄຊຍະສອນ ລັດຖະມົນຕີກະຊວງພະລັງງານ ແລະ ບໍ່ແຮ່ ກ່າວເປີດກອງປະຊຸມ ບາງຕອນທ່ານກ່າວວ່າ: ປີຜ່ານມາ ຂະແໜງພະລັງງານ ແລະ ບໍ່ແຮ່ ຕົກຢູ່ໃນໄລຍະເງື່ອນໄຂສະພາບຄວາມຫຍຸ້ງຍາກຕ່າງໆທີ່ເກີດຂຶ້ນໃນໂລກ ຄວາມຂັດແຍ້ງ ທາງດ້ານເສດຖະກິດ ບັນຫາໄພເງິນເຟີ້ ແລະ ບັນຫາຄວາມຫຍຸ້ງຍາກອື່ນໆ ແຕ່ຂະແໜງພະລັງງານ ແລະ ບໍ່ແຮ່ ກໍ່ສາມາດປຸກລະດົມຈິດໃຈພະນັກງານສະມາຊິກພັກຂອງຕົນ ເປັນເຈົ້າການສູງ ຜ່ານຜ່າ ພ້ອມກັນ ໄປຄຽງຄູ່ກັບບັນຫາດ້ານເສດຖະກິດທີ່ເກີດຂື້ນໃນປັດຈຸບັນ ຜົນສໍາເລັດຂອງວຽກງານພະລັງງານ ແລະ ບໍ່ແຮ່ໃນໄລຍະຜ່ານມານັ້ນ ຖືເປັນຂະບວນການທີ່ດີໃຫ້ແກ່ການສ້າງສາພັດທະນາປະເທດຊາດ.
ທີ່ມາ: ວິທະຍຸກະຈາຍສຽງ
