ຍັງສະຫລຸບສາເຫດບໍ່ທັນໄດ້ ເຫດດິນຍຸບຢູ່ບ້ານປາກເປັ່ງ ແຕ່ຄາດວ່າຈະລາຍງານຜົນໄວໆນີ້

ເພຈຂ່າວ Khammouan News ຂອງແຂວງຄຳມ່ວນ ລາຍງານວັນທີ 29 ມີນາ 2025 ວ່າ: ວັນທີ 25 ມີນາ 2025 ຜ່ານມາ ທ່ານ ຄໍາປຽນ ມະນີຄໍາ ຫົວໜ້າພະແນກພະລັງງານ ແລະ ບໍ່ແຮ່ ແຂວງຄຳມ່ວນ ພ້ອມດ້ວຍ ພາກສ່ວນທີ່ກ່ຽວຂ້ອງຂອງແຂວງ ແລະ ເມືອງ, ອົງການປົກຄອງບ້ານປາກເປັ່ງ, ຄະນະທິມງານວິຊາການພາກສະໜາມ ໂດຍມີຄະນະວິຊາການຂອງບໍລິສັດ ຊີໂນ-ອາກຣີ ພັດທະນາບໍ່ແຮ່ ຈໍາກັດ ລົງກວດກາຄວາມຄືບໜ້າ ຂອງການສຳຫຼວດຫາສາເຫດ ແລະ ການປົວແປງຄືນບໍລິເວນທີ່ເກີດດິນຍຸບ ຢູ່ເຂດບ້ານປາກເປັ່ງ, ເມືອງທ່າແຂກ, ແຂວງຄຳມວນ.

ຜ່ານການລົງກວດກາເຫັນວ່າ ບໍລິສັດໄດ້ປັບປຸງຖົມດິນຄືນບໍລິເວນດິນຍຸບສຳເລັດແລ້ວ ແລະ ໄດ້ມອບໃຫ້ອົງການປົກຄອງບ້ານ ແລະ ບໍລິສັດ ເອົາໃຈໃສ່ຕິດຕາມກວດກາຢ່າງໃກ້ຊິດ, ພ້ອມທັງລາຍງານເປັນແຕ່ລະໄລຍະ.

ສຳລັບຜົນການສຳຫຼວດຊອກຫາສາເຫດຂອງດິນຍຸບ ທີ່ທາງພາກລັດ ແລະ ບໍລິສັດເອກະລາດ ລົງສຳຫຼວດພາກສະໜາມຕົວຈິງນັ້ນ, ທາງຂະແໜງການທີ່ກ່ຽວຂ້ອງຂອງສູນກາງ ແລະ ອົງການປົກຄອງທ້ອງຖິ່ນ ຮ່ວມກັບບໍລິສັດ ກຳລັງສັງລວມຂໍ້ມູນເພື່ອສະຫຼຸບສາເຫດທີ່ພາໃຫ້ເກີດບັນຫາດິນຍຸບດັ່ງກ່າວ ແລະ ກະກຽມລາຍງານຜົນໃຫ້ແກ່ທຸກພາກສ່ວນຮັບຮູ້ໃນໄວໆນີ້.