ອີຣັກປະກາດສົງຄາມ IS ຈົບແລ້ວ
ນາຍົກລັດຖະມົນຕີອີຣັກປະກາດວ່າ: ການເຮັດສົງຄາມກັບກຸ່ມຫົວຮຸນແຮງ IS ໃນໄລຍະ 3 ປີຜ່ານມາ ເພື່ອຂັບໄລ່ກອງກຳລັງຫົວຮຸນແຮງອອກນອກປະເທດນັ້ນ ໄດຈົບລົງແລ້ວ.
ສຳນັກຂ່າວຕ່າງປະເທດລາຍງານຈາກນະຄອນຫລວງແບກແດດ ປະເທດອີຣັກ ໃນວັນທີ 9 ທັນວາວ່າ: ທ່ານ ໄຮເດີ ອັດ ອາບາດີ ນາຍົກລັດຖະມົນຕີອີຣັກ ຖະແຫລງວ່າ: ການເຮັດສົງຄາມກັບກຸ່ມຫົວຮຸນແຮງ IS ໃນໄລຍະ 3 ປີຜ່ານມາ ໂດຍທະຫານກອງທັບອີຣັກ. ທັງນີ້ເພື່ອຂັບໄລ່ກອງກຳລັງຫົວຮຸນແຮງອອກນອກປະເທດໄດ້ຈົບລົງແລ້ວ ໂດຍທະຫານກອງທັບອີຣັກສາມາດຄວບຄຸມພື້ນທີ່ຊາຍແດນຂອງອີຣັກເບື້ອງທີ່ຕິດກັບຊີຣີໄວ້ໄດ້ແລ້ວ. ດັ່ງນັ້ນ ຈຶ່ງປະກາດຢຸດສົງຄາມກັບ IS.
ນາຍົກລັດຖະມົນຕີອີຣັກກ່າວອີກວ່າ: ສັດຕູຂອງພວກເຮົາໄດ້ສັງຫານພົນລະເຮືອນຂອງພວກເຮົາ, ແຕ່ໃນທີ່ສຸດພວກເຮົາກໍໄດ້ຮັບໄຊຊະນະດ້ວຍຄວາມເປັນອັນໜຶ່ງອັນດຽວກັນຂອງພວກເຮົາ. ແລະ ຄວາມມຸ່ງໝັ້ນຂອງພວກເຮົາ ເຊິ່ງເຮັດໃຫ້ພວກເຮົາໄດ້ຮັບໄຊຊະນະໃນໄລຍະເວລາບໍ່ດົນ.
ສ່ວນ ພົນໂທ ອັບດຸນ ອາມີ ຣາຊີດ ຢາ ອັດລາ ທະຫານລະດັບສູງຂອງກອງທັບອີຣັກ ກ່າວວ່າ: ປະຕິບັດການສູ້ຮົບກັບກຸ່ມຫົວຮຸນແຮງ IS ໄດ້ຂໍ້ຢຸດຕິລົງແລ້ວ ຫລັງທະຫານກອງທັບອີຣັກສາມາດເຂົ້າຍຶດຄອງພື້ນທີ່ຕາມເຂດຊາຍແດນກັບຊີຣີໄວ້ໄດ້ໝົດແລ້ວ. ກຸ່ມຫົວຮຸນແຮງ IS ເຄີຍຍຶດຄອງພື້ນທີ່ສ່ວນໃຫຍ່ທາງເໜືອ ແລະ ຕາເວັນຕົກຂອງນະຄອນຫລວງແບກແດດ ຫລັງປະຕິບັດການສູ້ຮົບສາຍຟ້າແຫລບໃນປີ 2013 ສ້າງຄວາມເສຍຫາຍຮຸນແຮງໃຫ້ປະເທດອີຣັກ, ແຕ່ກອງທັບອີຣັກໄດ້ຕອບໂຕ້ດ້ວຍການສະໜັບສະໜູນຈາກການໂຈມຕີທາງອາກາດຂອງກອງທັບພັນທະມິດທີ່ມີອາເມລິກາເປັນແກນນຳ ຈົນສາມາດຍຶດກັບຄືນເມືອງໃຫຍ່ ແລະ ຂັບໄລ່ກອງກຳລັງ IS ອອກໄປໄດ້ໃນທີ່ສຸດ.
