UN ຂໍ ສປປ ເກົາຫລີ ຮັກສາ ການຕິດຕໍ່ກັບໂລກພາຍນອກ
ຮອງເລຂາທິການສະຫະປະຊາຊາດ ເປີດເຜີຍວ່າ: ໄດ້ຮຽກຮ້ອງໃຫ້ ສປປ ເກົາຫລີ ເປີດຊ່ອງທາງຕິດຕໍ່ສື່ສານກັບໂລກພາຍນອກ ໂດຍສະເພາະກັບ UN ເອົາໄວ້ຕໍ່ໄປ ເພື່ອປ້ອງກັນຄວາມສ່ຽງການເກີດ “ຄວາມເຂົ້າໃຈຜິດ” ທີ່ອາດສົ່ງຜົນໃຫ້ຄວາມຂັດແຍ່ງລຸກລາມ.
ສຳນັກຂ່າວຕ່າງປະເທດລາຍງານຈາກນະຄອນນິວຢອກ ປະເທດສະຫະລັດອາເມລິກາ ໃນວັນທີ 9 ທັນວາວ່າ: UN ເປີດເຜີຍລາຍງານຂອງທ່ານ ເຈຟຟຣີ ເຟລແມນ ຮອງເລຂາທິການດ້ານກິດຈະການການເມືອງ ກ່ຽວກັບຜົນການຢ້ຽມຢາມນະຄອນຫລວງພຽງຢາງ ໃນອາທິດຜ່ານມາວ່າ: ໄດ້ມີການພົບປະຫາລືກັບທ່ານ ຣີ ຢອງໂຮ ຮອງລັດຖະມົນຕີການຕ່າງປະເທດ ສປປ ເກົາຫລີ ແລະ ທ່ານ ປຣາກ ມາຢອງກຸກ ຮອງລັດຖະມົນຕີກະຊວງການຕ່າງປະເທດ ສປປ ເກົາຫລີ ເຊິ່ງເຈົ້າໜ້າທີ່ລະດັບສູງດ້ານການທູດທັງສອງທ່ານຂອງລັດຖະບານພຽງຢາງເຫັນພ້ອມວ່າ: ສະຖານະການປັດຈຸບັນຢູ່ແຫລມເກົາຫລີເປັນສະພາບເຄັ່ງຕຶງ ແລະ ອັນຕະລາຍທີ່ສຸດຕໍ່ສະຖຽນລະພາບ ແລະ ຄວາມໝັ້ນຄົງຂອງໂລກ.
ຂະນະດຽວກັນ, ທ່ານ ເຟລແມນ ໄດ້ຂໍໃຫ້ລັດຖະບານພຽງຢາງເປີດຊ່ອງທາງຕິດຕໍ່ສື່ສານກັບໂລກພາຍນອກ ໂດຍສະເພາະກັບ UN ເອົາໄວ້ຕໍ່ໄປ ເພື່ອຫລຸດຄວາມສ່ຽງຂອງ “ຄວາມເຂົ້າໃຈຜິດ” ທີ່ອາດເຮັດໃຫ້ຄວາມຂັດແຍ່ງຂະຫຍາຍເປັນວົງກວ້າງ. ນອກຈາກນີ້ ຮອງເລຂາທິການ UN ຢືນຢັນການເດີນໜ້າມອບຄວາມຊ່ວຍເຫລືອດ້ານມະນຸດສະທຳໃຫ້ແກ່ ສປປ ເກົາຫລີ ຕໍ່ໄປ ໂດຍປັດຈຸບັນ UN ມີເຈົ້າໜ້າທີ່ປະຈຳຢູ່ ສປປ ເກົາຫລີ ປະມານ 50 ຄົນ ຈາກອົງການ 6 ແຫ່ງ ສ່ວນຫລາຍເປັນໜ່ວຍງານດ້ານມະນຸດສະທຳ ລວມທັງການຈັດສັນການຊ່ວຍເຫລືອດ້ານໂພຊະນາການ ແລະ ສາທາລະນະສຸກ ເຊັ່ນໂຄງການອາຫານໂລກ (WFC).
