ອັບເດດມີຜູ້ເສຍຊີວິດຢ່າງໜ້ອຍ 694 ຄົນ ຈາກເຫດການແຜ່ນດິນໄຫວທີ່ປະເທດມຽນມາ

ສໍານັກຂ່າວຣອຍເຕີລາຍງານວັນທີ 29 ມີນາ 2025 ຕາມການລາຍງານຂອງສະຖານີໂທລະພາບ MRTV ຕໍ່ເຫດການແຜ່ນດິນໄຫວ ທີ່ເກີດຂຶ້ນໃນສູນກາງຂອງປະເທດມຽນມາ ມີລາຍງານຜູ້ເສຍຊີວິດແລ້ວຢ່າງໜ້ອຍ 694 ຄົນ ແລະ ມີຜູ້ໄດ້ຮັບບາດເຈັບອີກ 1,670 ຄົນ ເຊິ່ງຄາດວ່າຈໍານວນຜູ້ເສຍຊີວິດ ແລະ ບາດເຈັບຈະເພີ່ມຂຶ້ນຢ່າງຕໍ່ເນື່ອງ.

ຄວາມເສຍຫາຍຈາກແຜ່ນດິນໄຫວ ສ່ວນໃຫຍ່ເກີດຂຶ້ນໃນເມືອງມັນທະເລ ເຊິ່ງເປັນເມືອງໃຫຍ່ອັນດັບສອງຂອງມຽນມາ ເນື່ອງຈາກຕັ້ງຢູ່ໃກ້ກັບຈຸດສູນກາງຂອງແຜ່ນດິນໄຫວ.

ໃນຂະນະທີ່ເຈົ້າໜ້າທີ່ກູ້ໄພຈາກອົງກອນ Moe Saydanar ໃຫ້ຮູ້ວ່າ ໄດ້ກູ້ຮ່າງຜູ້ເສຍຊີວິດຢ່າງໜ້ອຍ 60 ຄົນ ຈາກວັດ ແລະ ອາຄານຕ່າງໆ ໃນເມືອງປິນມານາ ໃກ້ກັບກຸງເນປີດໍ ແລະ ຍັງມີອີກຫລາຍຄົນທີ່ຕິດຢູ່ພາຍໃນອາຄານ.

ພ້ອມດຽວກັນ ຜູ້ນຳທະຫານມຽນມາກ່າວວ່າ ຈຳນວນຜູ້ເສຍຊີວິດ ແລະ ບາດເຈັບຄາດວ່າຈະເພີ່ມຂຶ້ນ ແລະຂໍຄວາມຊ່ວຍເຫຼືອຈາກຫຼາຍປະເທດ.