ມຽນມາພົບຜູ້ເສຍຊີວິດຈາກແຜ່ນດິນໄຫວແລ້ວ 3 ຄົນ ລັດປະກາດສະຖານະການສຸກເສີນ
ສໍານັກຂ່າວ Reuters ລາຍງານວ່າ: ເຫດການແຜ່ນດິນໄຫວທີ່ເກີດຂຶ້ນວັນທີ 28 ມີນາ ສົ່ງຜົນເຮັດໃຫ້ມີຜູ້ເສຍຊີວິດແລ້ວຢ່າງໜ້ອຍ 3 ຄົນ ຢູ່ເມືອງຕອງອູ ປະເທດມຽນມາ ແຮງສັ່ນສະເທືອນເຮັດໃຫ້ມັດສະຢິດແຫ່ງໜຶ່ງພັງຖະຫລົ່ມລົງມາບາງສ່ວນ. ຂະນະທີ່ສື່ທ້ອງຖິ່ນຂອງມຽນມາລາຍງານວ່າ: ມີຜູ້ເສຍຊີວິດຢ່າງໜ້ອຍ 2 ຄົນ ແລະ ໄດ້ຮັບບາດເຈັບ 20 ຄົນ ຫລັງຈາກໂຮງແຮມແຫ່ງໜຶ່ງພັງຖະຫລົ່ມຢູ່ເມືອງອອງບັນ.
ສໍານັກງານສໍາຫລວດທາງທໍລະນີວິທະຍາແຫ່ງອາເມລິກາ (USGS) ລາຍງານວ່າ: ແຜ່ນດິນໄຫວເຊິ່ງເກີດຂຶ້ນໃນຕອນບ່າຍວັນທີ 28 ມີນາ ມີຄວາມຮຸນແຮງ 7.7 ຣິກເຕີ ແລະ ມີສູນກາງຢູ່ເລິກລົງໄປ 10 ກິໂລແມັດ ກ່ອນຈະເກີດອັບເຕີຊັອກຮຸນແຮງ 6.4 ຣິກເຕີ ປະມານ 12 ນາທີຫລັງຈາກແຜ່ນດິນໄຫວຄັ້ງທໍາອິດ.
ຂະນະມີລາຍງານອີກວ່າ: ຢູ່ສະໜາມບິນສາກົນມັນທະເລ ບັນດາຜູ້ໂດຍສານພາກັນແລ່ນໜີຢ່າງວຸ້ນວາຍ. ຂະນະທີ່ປະຊາຊົນເປີດເຜີຍຕໍ່ສໍານັກຂ່າວ Reuters ວ່າ: ພວກເຂົາເຫັນອາຄານຫລາຍແຫ່ງພັງຖະຫລົ່ມ ໂດຍມັນທະເລເປັນເມືອງທ່ອງທ່ຽວຊື່ດັງ ແລະ ເປັນສູນກາງທາງທຸລະກິດຂອງມຽນມາ ມີປະຊາກອນຫລາຍກວ່າ 1 ລ້ານຄົນ ແລະ ເປັນທີ່ຕັ້ງຂອງວັດເກົ່າແກ່ຫລາຍແຫ່ງ ເຊິ່ງມີຄວາມສໍາຄັນຕໍ່ຊາວມຽນມາເຊິ່ງສ່ວນຫລາຍນັບຖືສາສະໜາພຸດ.
ເວັບໄຊ Global New Light of Myanmar ລາຍງານວ່າ: ແຜ່ນດິນໄຫວເຮັດໃຫ້ຂົວສະກາຍ (Sagaing Bridge) ແລະ ອາຄານຫລາຍຫລັງຢູ່ເມືອງມັນທະເລ, ເນປີດໍ, ພິນມານາ, ອອງບັນ ແລະ ອິນເລ ພັງທະລາຍລົງມາ ລວມທັງຍັງມີຄວາມເສຍຫາຍເກີດຂຶ້ນຕາມທາງດ່ວນສາຍຢາງກຸ້ງ-ມັນທະເລ ສົ່ງຜົນເຮັດໃຫ້ຕ້ອງປິດຖະໜົນບາງສ່ວນຕາມໄລຍະທາງ.
ສ່ວນລັດຖະບານຂອງມຽນມາປະກາດສະຖານະການສຸກເສີນຈາກແຜ່ນດິນໄຫວໃນພື້ນທີ່ໃຈກາງປະເທດ ຄວບຄຸມເມືອງມັນທະເລ ເມືອງໃຫຍ່ອັນດັບສອງ, ນະຄອນຫລວງເນປີດໍ, ພື້ນທີ່ສະກາຍ, ພະໂຄ ແລະ ມະເກວ ລວມທັງລັດສານທາງຕາເວັນອອກ ໂດຍກອງທັບລະບຸຜ່ານ Telegram ວ່າ: “ລັດຖະບານຈະສອບສວນສະຖານະການຢ່າງວ່ອງໄວ ແລະ ດໍາເນີນການກູ້ໄພ ພ້ອມໃຫ້ການຊ່ວຍເຫລືອດ້ານມະນຸດສະທໍາ”.
ອ້າງອີງ:
- https://edition.cnn.com/world/live-news/myanmar-thailand-earthquake-03-28-25-intl-hnk/index.html?t=1743157942456
- https://www.reuters.com/world/asia-pacific/strong-earthquake-central-myanmar-panic-bangkok-2025-03-28/
