ຫົວໜ້າກະຕໍ້ທີມຊາດລາວຫວັງຍາດຫລຽນໃດໜຶ່ງ ໃນລາຍການແຂ່ງຂັນຊີງແຊ້ມໂລກ

ຫົວໜ້າກະຕໍ້ທີມຊາດລາວຊາຍຫວັງຍາດຫລຽນໃດໜຶ່ງໃນການແຂ່ງຂັນກະຕໍ້ຊີງແຊ້ມໂລກທີ່ປະເທດໄທ ຈັດຂຶ້ນລະຫວ່າງວັນທີ 11-17 ທັນວານີ້. ຂະນະທີ່ສະຫະພັນກະຕໍ້ແຫ່ງຊາດລາວ ສົ່ງນັກກິລາຈໍານວນ 30 ຄົນເຂົ້າຮ່ວມ 7 ລາຍການຄື: ທີມຊຸດຊາຍ-ຍິງ; ຄູ່ຊາຍ-ຍິງ; ດຽວຊາຍ-ຍິງ, ລອດບ້ວງຊາຍ.

ທ້າວ ວິໄຊ ພົມມະວົງສາ ຫົວໜ້າທີມກະຕໍ້ທີມຊາດລາວ ໃຫ້ສໍາພາດວ່າ: ພາຍຫລັງໄດ້ຮັບແຈ້ງການຈາກສະຫະພັນກະຕໍ້ແຫ່ງຊາດລາວໃນຕົ້ນເດືອນພະຈິກເປັນຕົ້ນມາ ພວກເຮົາກໍໄດ້ລວມຕົວກັນອີກຄັ້ງ ຫລັງຈາກສໍາເລັດການເຂົ້າຮ່ວມແຂ່ງຂັນໃນງານມະຫະກໍາຊີເກມຄັ້ງທີ 29 ທີ່ປະເທດມາເລເຊຍ ເພື່ອເຂົ້າຮ່ວມການແຂ່ງຂັນກະຕໍ້ຊີງແຊ້ມໂລກທີ່ປະເທດໄທ ເຊິ່ງຈັດຂຶ້ນໃນເດືອນທັນວານີ້. ສໍາລັບການແຂ່ງຂັນຄັ້ງນີ້ ທາງຄະນະສະຫະພັນໄດ້ສົ່ງນັກກິລາເຂົ້າຮ່ວມແຂ່ງຂັນທັງໝົດ 30 ຄົນໃນ 7 ລາຍການ ເພື່ອຝຶກຊ້ອມໃຫ້ມີຄວາມສາມາດ, ພະລະກໍາລັງ ແລະ ທັກສະໃຫ້ຄ່ອງແຄ້ວກວ່າເກົ່າ ທັງນີ້ເພື່ອກະກຽມເຂົ້າຮ່ວມການແຂ່ງຂັນລາຍການຕ່າງໆໃນລະດັບພາກພື້ນ ແລະ ສາກົນ. ມາຮອດປັດຈຸບັນພວກເຮົາມີຄວາມພ້ອມ 100% ແລ້ວທີ່ຈະເຂົ້າຮ່ວມການແຂ່ງຂັນດັ່ງກ່າວ. ສໍາລັບການຝຶກຊ້ອມໄດ້ເລີ່ມແຕ່ຕົ້ນເດືອນພະຈິກເປັນຕົ້ນມາຂອງທຸກໆມື້ ໂດຍແບ່ງເປັນ 3 ເວລາຄື: ເວລາ 7-9 ໂມງ ເຊົ້າ, ເວລາ 9-11 ໂມງສວຍ ແລະ ເວລາ 15-17 ໂມງແລງ ຢູ່ສະໜາມຝຶກຊ້ອມເດີ່ນໂຮງຮຽນມັດທະຍົມສົມບູນເຈົ້າອານຸວົງ ແລະ ສະໜາມກິລາໂອແລັມປິກເຊຍ ບ້ານດົງໂດກ ເມືອງໄຊທານີ ເພື່ອຫວັງຍາດເອົາຫລຽນໃດໜຶ່ງມາສູ່ ສປປ ລາວ ອີກຄັ້ງ.

ທ້າວ ວິໄຊ ພົມມະວົງສາ ໄດ້ກ່າວຕື່ມວ່າ: ການເຂົ້າຮ່ວມແຂ່ງຂັນຄັ້ງນີ້ພວກເຮົາສົ່ງນັກກິລາທີມຊາດຊຸດໃໝ່ລຸ້ນເຍົາວະຊົນສ່ວນຫລາຍ ເພື່ອສ້າງນັກກິລາລຸ້ນສືບທອດຫລາຍຂຶ້ນກວ່າເກົ່າ ແລະ ເຮັດໃຫ້ເຍົາວະຊົນໄດ້ມີໂອກາດສະແດງຄວາມສາມາດໃນເວທີພາກພື້ນ ພ້ອມທັງພັດທະນາຕົນເອງຂຶ້ນເລື້ອຍໆເພື່ອນໍາເອົາບົດຮຽນກັບມາພັດທະນາວົງການກິລາກະຕໍ້ລາວໃຫ້ທຽບເທົ່າກັບບັນດາປະເທດໃນພາກພື້ນ ແລະ ສາກົນ. ສໍາລັບນັກກິລາທີມຊາດຊາຍພວກເຮົາໄດ້ເຂົ້າຮ່ວມ 3 ລາຍການຄື: ທີມຊຸດ, ຄູ່ ແລະ ດ່ຽວ.