ຊາວອິດສະລາແອນປະທ້ວງທ່ານ ເນທັນຢາຮູ ຕໍ່ຕ້ານລັດຖະບານ ພ້ອມສະໜັບສະໜູນການເຈລະຈາຊ່ວຍເຫລືອຕົວປະກັນ

         ຊາວອິດສະລາແອນຈໍານວນຫລາຍຊຸມນຸມໃຫຍ່ໃນເມືອງເທລອາວີບ ເພື່ອຕໍ່ຕ້ານລັດຖະບານ ແລະ ປະທ້ວງທ່ານ ເບັນຈາມິນ ເນທັນຢາຮູ ນາຍົກລັດຖະມົນຕີອິດສະລາແອນ ພ້ອມສະໜັບສະໜູນການເຈລະຈາເພື່ອຊ່ວຍເຫລືອຕົວປະກັນ ພາຍຫລັງທ່ານ ເນທັນຢາຮູ ຕັດສິນໃຈເປີດປະຕິບັດການທາງທະຫານຢູ່ເຂດກາຊາອີກ ເພື່ອກົດດັນໃຫ້ກຸ່ມຮາມັດປ່ອຍຕົວປະກັນທັງໝົດທີ່ຄວບຄຸມໄວ້ນັບແຕ່ການໂຈມຕີອິດສະລາແອນຄັ້ງໃຫຍ່ໃນວັນທີ 7 ຕຸລາ 2023.

        ຜູ້ຊຸມນຸມສ່ວນຫລາຍເບິ່ງວ່າ: ການຕັດສິນໃຈຂອງທ່ານ ເນທັນຢາຮູ ຈະຍິ່ງເຮັດໃຫ້ຕົວປະກັນຕົກຢູ່ໃນອັນຕະລາຍ, ທ່ານມັກບໍ່ຄໍານຶງເຖິງຄວາມປອດໄພຂອງປະຊາຊົນ. ຜູ້ຊຸມນຸມບາງຄົນສະແດງຄວາມເຫັນວ່າ: ທ່ານ ເນທັນຢາຮູ ຄືສັດຕູອັນຕະລາຍທີ່ສຸດຂອງອິດສະລາແອນ.

         ກອງທັບອິດສະລາແອນອ້າງວ່າ: ກຸ່ມຮາມັດປະຕິເສດຈະຂະຫຍາຍໄລຍະເວລາການຢຸດຍິງໄລຍະທໍາອິດ ເຊິ່ງມີຜົນບັງຄັບໃຊ້ນັບແຕ່ວັນທີ 19 ມັງກອນຜ່ານມາອອກໄປອີກ. ຂະນະທີ່ກຸ່ມຮາມັດປະຕິເສດຂໍ້ກ່າວຫາດັ່ງກ່າວ ພ້ອມລະບຸວ່າ: ອິດສະລາແອນເປັນຝ່າຍລະເມີດຂໍ້ຕົກລົງຢຸດຍິງທີ່ຮ່ວມໄກ່ເກ່ຍໂດຍກາຕາ, ອີຢິບ ແລະ ອາເມລິກາ.

         ການໂຈມຕີຄັ້ງຫລ້າສຸດທີ່ຖະຫລົ່ມໃສ່ພື້ນທີ່ຂ່ານຢູນິສທາງພາກໃຕ້ຂອງເຂດກາຊາ ເຮັດໃຫ້ທ່ານ ຊາລາ ອັລ-ບາດາວີລ ຜູ້ນໍາທາງການເມືອງລະດັບສູງຂອງກຸ່ມຮາມັດ ພ້ອມພັນລະຍາຂອງທ່ານເສຍຊີວິດ ໂດຍທ່ານ ເນທັນຢາຮູ ລະບຸວ່າ: ການເຈລະຈາຢຸດຍິງຕໍ່ຈາກນີ້ຈະຕ້ອງດໍາເນີນໄປພາຍໃຕ້ສະຖານະການສູ້ຮົບເທົ່ານັ້ນ, ພ້ອມປະກາດເຕືອນຊາວປາແລັສຕິນຢູ່ເຂດກາຊາໃຫ້ຢຸດການພົວພັນກັບກຸ່ມຮາມັດ ແລະ ອົບພະຍົບໄປພື້ນທີ່ປອດໄພ.

ອ້າງອີງ:

• https://www.bbc.com/news/articles/cq5zxe5l58go
• https://www.reuters.com/world/middle-east/israel-anti-government-protests-flare-after-dismissal-top-security-agency-chief-2025-03-22/
• https://www.aljazeera.com/news/2025/3/22/thousands-of-israelis-protest-shin-bet-chiefs-dismissal-for-captives