ປິດສະໜາມບິນຮີດໂທຊົ່ວຄາວ ຫລັງໄຟໄໝ້ໂຮງໄຟຟ້າໃກ້ຄຽງ ຄາດກະທົບຖ້ຽວບິນ 1,300 ກວ່າຖ້ຽວ
ສະໜາມບິນຮີດໂທໃນນະຄອນຫລວງລອນດອນຂອງອັງກິດ ປະກາດປິດໃຫ້ບໍລິການຊົ່ວຄາວ ຫລັງເກີດໄຟໄໝ້ສະຖານີໄຟຟ້າໃກ້ຄຽງໃນເມືອງເຮຍ ທາງຕາເວັນຕົກຂອງລອນດອນ ສົ່ງຜົນເຮັດໃຫ້ເກີດໄຟຟ້າດັບໃນພື້ນທີ່ສະໜາມບິນ ແລະ ກະທົບເຮືອນ 16,300 ກວ່າຫລັງ.
ເບື້ອງຕົ້ນຄາດວ່າສະໜາມບິນຮີດໂທອາດຈະປິດເຖິງ 23:59 ໂມງ ຕາມເວລາທ້ອງຖິ່ນ ໂດຍຜົນຈາກການປິດສະໜາມບິນກະທັນຫັນສົ່ງຜົນເຮັດໃຫ້ຖ້ຽວບິນຢ່າງໜ້ອຍ 120 ຖ້ຽວບິນ ຕ້ອງປ່ຽນເສັ້ນທາງບິນໄປລົງຈອດຢູ່ສະໜາມບິນອື່ນ.
ຂະນະທີ່ເບື້ອງຕົ້ນ ເວັບໄຊກວດສອບພິກັດຖ້ຽວບິນ Flightradar24 ປະເມີນວ່າ: ຈະມີຖ້ຽວບິນຢ່າງໜ້ອຍ 1,351 ຖ້ຽວບິນ ທີ່ໄດ້ຮັບຜົນກະທົບຈາກການປິດສະໜາມບິນຮີດໂທ ເຊິ່ງເປັນສະໜາມບິນໜາແໜ້ນທີ່ສຸດຂອງອັງກິດ.
ດ້ານໂຄສົກສະໜາມບິນຮີດໂທເຕືອນວ່າ: ຈະມີຄວາມຂັດຂ້ອງໃນມໍ່ໆນີ້ ແລະ ໄດ້ແຈ້ງຜູ້ໂດຍສານບໍ່ໃຫ້ເດີນທາງໄປສະໜາມບິນບໍ່ວ່າຈະໃນສະຖານະການໃດໆຈົນກວ່າສະໜາມບິນຈະເປີດໃຫ້ບໍລິການອີກ.
ອ້າງອີງ:
- https://www.bbc.com/news/live/cly24zvvwxlt
- https://www.theguardian.com/uk-news/live/2025/mar/21/hayes-substation-fire-heathrow-airport-live-updates-power-cut-outage?filterKeyEvents=false&page=with%3Ablock-67dcd5998f080f2f26ae1547#top-of-blog
