ໂທລະສັບໄອໂຟນ X ຄຳ ມີຈໍາໜ່າຍໃນລາວແລ້ວ
ໃນວັນທີ 6 ທັນວານີ້, ຢູ່ໂຮງແຮມເສດຖາປາລາດ ນະຄອນຫລວງວຽງຈັນ, ທ່ານ ສິນຈະເລີນ ຜູ້ບໍລິຫານບໍລິສັດສິນເທັກ ໄດ້ຖະແຫລງຕໍ່ສື່ມວນຊົນວ່າ: ບໍລິສັດຕົນໄດ້ຮັບສິດແຕ່ພຽງຜູ້ດຽວ ເພື່ອຈໍາໜ່າຍໄອໂຟນ X ຄຳ ມາຈຳຫນ່າຍໃນ ສປປ ລາວ, ຊຶ່ງຖືວ່າເປັນນະວັດຕະກຳໃໝ່ທີ່ສາມາດຕອບສະໜອງຄວາມຕ້ອງການຂອງລູກຄ້າທີ່ມັກຄວາມຫລູຫລາໃນລາຄາປະມານ 50 ລ້ານກີບ/ໜ່ວຍ.
ທ່ານປະທານບໍລິສັດຜູ້ຜະລິດໄອໂຟນ X ຈາກປະເທດໄທ ກ່າວວ່າ: ພວກເຮົາໄດ້ຄິດຄົ້ນມາເປັນເວລາດົນພໍສົມຄວນແລ້ວກໍໄດ້ຮັບການສ້າງຂື້ນທີ່ນະຄອນຫລວງປາຣີ ປະເທດຝຣັ່ງ, ໂດຍນຳໃຊ້ຄຳ 24K ມາເປັນສ່ວນປະສົມກັບສີ້ນສ່ວນຕ່າງໆໃນຕົວເຄື່ອງ 10 ກວ່າລາຍການ, ສະນັ້ນ ຄຸນນະພາບຈຶ່ງເຫນືອກວ່າ ແລະ ລາຄາ ຈຶ່ງສູງຂຶ້ນ ແລະ ເຫມາະກັບຜູ້ທີ່ມີຖານະມີຮັ່ງມີໃນສັງຄົມ. ປັດຈຸບັນ, ໄອໂຟນຮຸ່ນຄຳນີ້, ໄດ້ມີຈຳຫນ່າຍແລ້ວຫລາຍກວ່າ 10 ປະເທດໃນໂລກ ແລະ ຫລ້າສຸດກໍມາເປີດຕົວໃນຕະຫລາດຂອງລາວຄັ້ງນີ້.
ຜູ້ອຳນວຍການບໍລິສັດສິນເທັກ ກ່າວອີກວ່າ: ການເປີດຕົວໂທລະສັບໄອໂຟນຮຸ່ນດັ່ງກ່າວນີ້, ເພື່ອສ້າງທາງເລືອກໃໝ່ທີ່ດີກວ່າໃຫ້ກັບຄົນລາວ, ໂດຍສະເພາະນັກທຸລະກິດ ຫລື ຜູ້ທີ່ມີບົດບາດໃນສັງຄົມ, ເພາະການຜະລິດແມ່ນເນັ້ນໃສ່ລູກຄ້າຊັ້ນສູງ ແລະ ແນວໃດກໍຕາມ, ນີ້ເປັນພຽງການເລີ້ມຕົ້ນໃນຕະຫລາດລາວຈຶ່ງບໍ່ໄດ້ຄາດຫວັງສູງສຳລັບຍອດຈຳໜ່າຍ, ແຕ່ຄິດວ່າຫລາຍຄົນຢາກຈະສຳພັດ ແລະ ຊົມໃຊ້ມັນ.
