WHO ເຕືອນ ຢາຕ້ານໄວຣັສ HIV ໃນ 8 ປະເທດໃກ້ໝົດ ເພາະ USAID ຢຸດການຊ່ວຍເຫລືອ
ອົງການອະນາໄມໂລກ (WHO) ເປີດເຜີຍໃນວັນທີ 17 ມີນາວ່າ: ການທີ່ລັດຖະບານອາເມລິກາພາຍໃຕ້ການນໍາຂອງປະທານາທິບໍດີ ໂດນັລ ທຣໍາ ຢຸດໃຫ້ການຊ່ວຍເຫລືອຕ່າງປະເທດຜ່ານອົງການເພື່ອການພັດທະນາສາກົນຂອງອາເມລິກາ (USAID) ສົ່ງຜົນເຮັດໃຫ້ການຈັດຫາຢາຕ້ານໄວຣັສ HIV ໃຫ້ 8 ປະເທດຕ້ອງຢຸດສະງັກ ແລະ ຢາເຫລົ່ານີ້ອາດໝົດໃນມໍ່ໆນີ້.
WHO ລະບຸວ່າ: ອູແກຣນ, ເຮຕິ, ເກນຢາ, ເລໂຊໂທ, ຊູດັງໃຕ້, ບູກິນາຟາໂຊ, ມາລີ ແລະ ໄນຈີເຣຍ ອາດໃຊ້ຢາຕ້ານໄວຣັສ HIV ຈົນໝົດໃນມໍ່ໆນີ້.
ທ່ານ ທີໂດຣສ ອັດຮານອມ ກີບຣີເຢຊຸສ ຜູ້ອໍານວຍການໃຫຍ່ WHO ເຕືອນວ່າ: ການປ່ຽນແປງດັ່ງກ່າວອາດເຮັດໃຫ້ຄວາມກ້າວໜ້າໄລຍະ 20 ປີຜ່ານມາສູນລ້າ ແລະ ອາດເຮັດໃຫ້ມີຜູ້ຕິດເຊື້ອ HIV ໃໝ່ຫລາຍກວ່າ 10 ລ້ານຄົນ ແລະ ມີຜູ້ເສຍຊີວິດ 3 ລ້ານຄົນ.
ສໍານັກຂ່າວຣອຍເຕີລາຍງານວ່າ: ຄວາມພະຍາຍາມໃນການຮັບມືຕໍ່ໄວຣັສ HIV, ພະຍາດໂປລິໂອ, ພະຍາດມາລາເຣຍ ແລະ ວັນນະໂຣກ ໄດ້ຮັບຜົນກະທົບຈາກການທີ່ປະທານາທິບໍດີ ທຣໍາ ຢຸດໃຫ້ການຊ່ວຍເຫລືອຕ່າງປະເທດ ພາຍຫລັງເຂົ້າຮັບຕໍາແໜ່ງໃນເດືອນມັງກອນ.
ຂະນະດຽວກັນ, ການຂາດເຂີນເງິນທຶນອາດເຮັດໃຫ້ສຸກສາລາຢູ່ອັບການິດສະຖານທີ່ໄດ້ຮັບການສະໜັບສະໜູນຈາກ WHO ຕ້ອງປິດລົງປະມານ 80% ຈາກທັງໝົດ.
ນອກຈາກນີ້, WHO ຍັງມີແຜນຈະຫລຸດເປົ້າໝາຍການຈັດສັນເງິນທຶນສໍາລັບປະຕິບັດການສຸກເສີນຈາກ 1.2 ພັນລ້ານໂດລາ ເຫລືອ 872 ລ້ານໂດລາໃນປີງົບປະມານ 2026-2027.
