ຜູ້ນຳທົ່ວໂລກຄັດຄ້ານທ່ານ ທຣຳ ຮັບຮອງ ເຢລູຊາເລມເປັນເມືອງຫລວງອິດສະລາແອນ
ສະຖານີຂ່າວຊີບີເອສນິວລາຍງານວ່າ: ຄຳປະກາດຂອງປະທານາທິບໍດີ ໂດນັນ ທຣຳ ຜູ້ນຳອາເມລິກາ ທີ່ໃຫ້ການຮັບຮອງສະຖານະເຢລູຊາເລມເປັນເມືອງຫລວງຂອງອິດສະລາແອນ ແລະ ສັ່ງເລີ່ມຂະບວນການຍ້າຍສະຖານທູດອາເມລິກາອອກຈາກນະຄອນຫລວງເທລອາວີຟໄປນະຄອນເຢລູຊາເລມນັ້ນ ກໍ່ໃຫ້ເກີດສຽງວິຈານຕຳໜິທັນທີຈາກໂລກອາຣັບ ແລະ ຜູ້ນຳຫລາຍປະເທດທົ່ວໂລກ.
ປະທານາທິບໍດີຝຣັ່ງກ່າວວ່າ: ເປັນການຕັດສິນໃຈທີ່ໜ້າຜິດຫວັງ. ນາຍົກລັດຖະມົນຕີອີຕາລີລະບຸອະນາຄົດຂອງນະຄອນເຢລູຊາເລມ ຄວນປ່ອຍໃຫ້ເປັນໄປຕາມຂະບວນການເຈລະຈາສັນຕິພາບຕາເວັນອອກກາງ ແລະ ສະຫະປະຊາຊາດ (UN) ຕຳໜິການເຄື່ອນໄຫວແຕ່ພຽງຝ່າຍດຽວຂອງອາເມລິກາ. ຜູ້ນຳໂລກ ແລະ ນັກການທູດຕ່າງສະແດງຄວາມຜິດຫວັງທີ່ປະທານາທິບໍດີ ທຣຳ ປະກາດຮັບຮອງສະຖານະເຢລູຊາເລມເປັນເມືອງຫລວງອິດສະລາແອນຢ່າງເປັນທາງການ ແລະ ເທົ່າກັບເຮັດໃຫ້ອິດສະລາແອນສົມຫວັງຕໍ່ການອ້າງສິດທິຄອບຄອງມາດົນນານຢູ່ເຢລູຊາເລມ ດິນແດນສັກສິດຂອງຊາວມຸດສະລິມ, ຊາວຄຣິສ ແລະ ຊາວຢິວ. ຜູ້ນຳຫລາຍປະເທດປະສານສຽງເຕືອນວ່າ: ຈະເປັນອັນຈະລາຍຕໍ່ຂະບວນການສັນຕິພາບ ແລະ ກໍ່ໃຫ້ເກີດຄວາມຮຸນແຮງຕາມມາໄດ້. ນາຍົກລັດຖະມົນຕີ ເທເຣຊາ ເມ ຂອງອັງກິດ ຄັດຄ້ານຕໍ່ຄຳປະກາດຂອງອາເມລິກາ ແລະ ຢືນຢັນວ່າ: ອັງກິດບໍ່ມີນະໂຍບາຍຍ້າຍສະຖານທູດອັງກິດໃນອິດສະລາແອນ. ດ້ານນາຍົກລັດຖະມົນຕີ ອັງເກລາ ແມເຄິລ ຂອງເຢຍລະມັນ ບໍ່ສະໜັບສະໜູນການຕັດສິນໃຈຂອງອາເມລິກາ ແລະ ສະຖານະເຢລູຊາເລມຄວນປ່ອຍໃຫ້ເປັນໄປຕາມການເຈລະຈາລະຫວ່າງອິດສະລາແອນກັບປາແລັສຕິນ. ທ່ານ ອັນໂຕນິໂອ ກູເຕີເຣສ ເລຂາທິການສະຫະປະຊາຊາດ ກ່າວຄັດຄ້ານການດຳເນີນການແຕ່ພຽງຝ່າຍດຽວຂອງອາເມລິກາ.
