IOC ຂີດເສັ້ນຕາຍ AIBA ແກ້ໄຂບັນຫາຕັດສິນມວຍ
ຄະນະກຳມະການໂອລິມປິກສາກົນ (IOC) ຂີດເສັ້ນຕາຍ ສະຫະພັນມວຍສາກົນສະໝັກຫລິ້ນນາໆຊາດ ຫລື AIBA ໃຫ້ຟ້າວຫາມາດຕະການແກ້ໄຂບັນຫາເລື່ອງການຕັດສິນມວຍທີ່ມີບັນຫາມາຕະຫລອດ ຕະຫລອດຮອດດ້ານການເງິນ ລວມທັງການບໍລິຫານງານພາຍໃນອົງກອນທີ່ບໍ່ໂປ່ງໃສ ພ້ອມຢຸດການສະໜັບສະໜູນດ້ານການເງິນແກ່ AIBA ຈົນກວ່າຈະແກ້ໄຂບັນຫາໃຫ້ດີຂຶ້ນ.
ໂທມັດ ບາກ ປະທານຄະນະກຳມະການໂອລິມປິກສາກົນ (IOC) ໄດ້ອອກຖະແຫລງການວ່າ: IOC ໄດ້ສັ່ງຢຸດການຈ່າຍເງິນສະໜັບສະໜູນແກ່ສະຫະພັນມວຍສາກົນສະໝັກຫລິ້ນນາໆຊາດ (AIBA) ຈົນກວ່າຈະມີການແກ້ໄຂບັນຫາການບໍລິຫານງານພາຍໃນອົງກອນ ແລະ ດ້ານການເງິນໄດ້ຊັດເຈນ, ພາຍຫລັງ AIBA ມີບັນຫາເລື່ອງນີ້ມາດົນນານ ຈົນປະທານ AIBA ຊິງ ກົວ ວູ ຊາວໄຕ້ຫວັນ ຖືກຄະນະກຳມະການບໍລິຫານລົງຄະແນນບໍ່ໄວ້ວາງໃຈ ແລະ ຄະນະກຳມະການຝ່າຍລະບຽບວິໄນສັ່ງຢຸດຈາກຕຳແໜ່ງ, ຈົນ ຊິງ ກົວ ວູ ໄດ້ຂໍລາອອກຈາກຕຳແໜ່ງໃນທີ່ສຸດ ຈາກການທີ່ທັງສອງຝ່າຍຕົກລົງກ່ອນຟ້ອງກັນ ລະຫວ່າງຜູ້ບໍລິຫານ AIBA ແລະ ຊິງ ກົວ ວູ.
ສະຖານະການຂອງ AIBA ໃນປັດຈຸບັນ ໄດ້ມີການແຕ່ງຕັ້ງຮອງປະທານ AIBA ຟຣັງໂກ ຟາລຊິເນລລີ ຈາກອີຕາລີ ຂຶ້ນຮັກສາການເປັນປະທານຊົ່ວຄາວ ແລະ ຈະມີກອງປະຊຸມໃຫຍ່ AIBA ໃນວັນທີ 27 ມັງກອນປີໜ້າ ຢູ່ດູໄບ ສະຫະນະຄອນ ອາຣັບ ເອມິເຣດ ເພື່ອໃຫ້ປະເທດສະມາຊິກຮ່ວມກັນພິຈາລະນາເລື່ອງການແຕ່ງຕັ້ງຜູ້ບໍລິຫານຊຸດໃໝ່.
ປະທານ IOC ຍັງກ່າວອີກວ່າ: ຜູ້ບໍລິຫານ IOC ມີຄວາມກັງວົນກ່ຽວກັບສະຖານະການຂອງ AIBA ໃນດ້ານຕ່າງໆ ທັງເລື່ອງການບໍລິຫານງານໃນອົງກອນ, ສະຖານະການດ້ານການເງິນທີ່ບໍ່ໂປ່ງໃສ ຕະຫລອດຮອດບັນຫາການຕັດສິນມວຍສາກົນສະໝັກຫລິ້ນ ແລະ ການຕໍ່ຕ້ານຢາໂດບ ຈຶ່ງໄດ້ຂີດເສັ້ນຕາຍໃຫ້ AIBA ເຮັດລາຍງານເລື່ອງເຫລົ່ານີ້ ພາຍໃນເດືອນມັງກອນປີໜ້າ ເພື່ອເບິ່ງວ່າ AIBA ຈະມີມາດຕະການໃດ ເພື່ອແກ້ໄຂບັນຫາເຫລົ່ານີ້.
