ສາທານະຄອນຫຼວງປຸກລະດົມຊຸມຊົນເອົາໃຈສະກັດກັ້ນໄຂ້ເລືອດອອກ

ວັນທີ 6 ເມສານີ້, ພະແນກສາທາລະນະສຸກນະຄອນຫຼວງວຽງຈັນໄດ້ຈັດເວທີສົນທະນາກ່ຽວກັບວຽກງານໂຄສະນາສຸຂະສຶກສາປຸກລະດົມຊຸມຊົນເອົາໃຈໃສ່ປ້ອງກັນ ແລະ ຄວບຄຸມພະໄຂ້ເລືອດອອກຂຶ້ນທີ່ພະແນກຂອງຕົນ, ໂດຍການເຂົ້າຮ່ວມຂອງຫົວໜ້າພະແນກ ສາທາລະນະສຸກນະຄອນຫຼວງວຽງຈັນ, ຮອງເຈົ້າເມືອງ, ໂຄສົກວິທະຍຸ, ຫ້ອງການສາທາລະນະສຸກເມືອງ ແລະ ນາຍບ້ານຕ່າງໆເຂົ້າຮ່ວມນຳດ້ວຍ.

ທ່ານຫົວໜ້າພະແນກສາທາລະນະສຸກນະຄອນຫຼວງວຽງຈັນກ່າວໃນພິທີວ່າ: ເນື່ອງຈາກການລະບາດຂອງພະຍາດໄຂ້ຍຸງລາຍຢູ່ປະເທດເຮົາໃນປັດຈຸບັນຍັງມີລັກສະນະເພີ່ມຂຶ້ນເລື້ອຍໆ, ໂດຍສະເພາະຢູ່ນະຄອນຫຼວງວຽງຈັນ ຍັງມີການລາຍງານກໍລະນີຜູ້ຕິດເຊື້ອພະຍາດດັ່ງກ່າວເພີ່ມຂຶ້ນໃນແຕ່ລະອາທິດ,ດັ່ງນັ້ນເພື່ອເປັນການປຶກສາຫາລື, ຖອດຖອນບົດຮຽນ ແລະ ປະສົບການໃນວຽກງານໂຄສະນາດັ່ງກ່າວ, ພວກເຮົາຈຶ່ງໄດ້ຈັດເວທີສົນທະນາຄັ້ງນີ້ຂຶ້ນ, ເພື່ອຈະນຳເອົາບົດຮຽນ ແລະ ປະສົບການຕ່າງໆທີ່ຖອດຖອນໄດ້ໄປປັບປຸງວຽກງານໂຄສະນາດັ່ງກ່າວໃຫ້ເຂັ້ມແຂງ ແລະ ມີປະສິດທິພາບຂຶ້ນ, ໃນເວທີສົນທະນາຄັ້ງນີ້ຜູ້ເຂົ້າຮ່ວມຕ່າງກໍໄດ້ສະແດງຄວາມຄິດເຫັນ ແລະ ປະສົບການຕ່າງໆກ່ຽວກັບວຽການໂຄສະນາສຸຂະສຶກສາປຸກລະດົມຊຸມຊົນເອົາໃຈໃສ່ປ້ອງກັນ ແລະ ຄວບຄຸມໄຂ້ເລືອດອອກໃນບ້ານ, ເມືອງຂອງຕົນໃນໄລຍະຜ່ານມາ, ຊຶ່ງສ່ວນຫຼາຍຕ່າງກໍຍົກໃຫ້ເຫັນປະສິດທິຜົນຂອງການປະ ຕິບັດຄຳຂັວນ 5 ປ ທີ່ກະຊວງສາທາລະນະສຸກວາງອອກ, ໂດຍສະເພາະແມ່ນການລ້ຽງປາຫາງນົກຍົກເພື່ອກິນໜອນນ້ຳຍຸງລາຍແມ່ນຊ່ວຍກຳຈັດການແຜ່ພັນຂອງຍຸງລາຍທີ່ເປັນພາຫະນຳເຊື້ອໄຂ້ ເລືອດອອກໄດ້ເປັນຢ່າງດີ.