ຄຣາວພາຊາ ວຽງຈັນ ຈັດພິທີເປີດໄຟເອ້ຕົ້ນຄຣິດສມາດ

ຄືນວັນທີ 6 ທັນວານີ້, ໂຮງແຮມ ຄຣາວພາຊາ ວຽງຈັນ, ໄດ້ຈັດພິທີເປີດ ໄຟເອ້ ຍ່ອງໃສ່ຕົ້ນຄຣິສມາດ ຈຳນວນ 2 ຕົ້ນ, ຂຶ້ນທີ່ໂຮງແຮມດັ່ງກ່າວ, ເພື່ອເປັນການກະກຽມ ສະເຫລີມສະຫລອງ ວັນຄຣິດສມາດ 25 ທັນວານີ້, ໂດຍມີທ່ານ Oliver Horn ຜູ້ຈັດການທົ່ວໄປ ໂຮງແຮມຄຣາວພາຊາ ວຽງຈັນ, ມີບັນດາລູກຄ້າ ແລະ ພາກສ່ວນ ກ່ຽວຂ້ອງເຂົ້າຮ່ວມເປັນຈຳນວນຫລາຍ.

ໃນພິທີດັ່ງກ່າວ, ຜູ້ອຳນວຍການ ໄດ້ເລົ່າເຖິງປະຫວັດຄວາມເປັນມາຂອງວັນ ດັ່ງກ່າວ, ພ້ອມທັງມີການສະແດງສິລະປະ ແລະ ແຈກຂອງຂວັນໃຫ້ກັບຜູ້ເຂົ້າຮ່ວມຢ່າງ ຄຶກຄື້ນມ່ວນຊື່ນ, ນອກນີ້ ຍັງໄດ້ມີການໄຕ້ໄຟເອ້ຍ່ອງໃສ່ຕົ້ນຄຣິສມາດ ຈຳນວນ 2 ຕົ້ນໃຫ້ແຈ້ງສະຫວ່າງ ແລະ ສວຍງາມຂຶ້ນກວ່າເກົ່າ, ນອກຈາກຕົ້ນຄຣິດສມາດແລ້ວ ຍັງມີເຮືອນຈຳລອງ ແລະ ຂອງຂວັນເອ້ຍ່ອງຕ່າງໆໃຫ້ສົມຈິງ, ເພື່ອເຮັດໃຫ້ຜູ້ເຂົ້າພັກ ພາຍໃນໂຮງແຮມ, ໂດຍສະເພາະ ຊາວເອີຣົບ ໄດ້ສຳພັດກັບວັນດັ່ງກ່າວ ຄືກັບຢູ່ປະເທດ ຂອງຕົນເອງ, ພ້ອມທັງເຮັດໃຫ້ຊາວລາວ ກໍຄືປະເທດອື່ນໆ ໄດ້ຮັບຮູ້ເຖິງວັດທະນະທຳ, ປະເພນີຂອງຊາວເອີຣົບຫລາຍຂຶ້ນ.